Cikolo Camulimo Weendelezyegwa a Leza Camu 2015 Cilatugwasya Kuyaambele Mukuyiisya Kwesu

¹ Sintembauzyo Davida wakalemba kuti: “Nzyondaamba amulomo wangu anzyondiyeeya mumoyo azibe zyeezyo zikukonda, O Jehova, O Ndomba yangu alimwi O Muvwuni wangu.” (Int. 19:14) Andiswe tuyanda kuti majwi eesu kaamukonda Jehova nkaambo tulalumba coolwe ncotujisi cakwaamba kasimpe mumbungano alimwi amumulimo wamumuunda. Cikolo Camulimo Weendelezyegwa a Leza ninzila imwi Jehova njabelesya kutuyiisya mulimo wakukambauka. Lwiiyo oolu lulacitika nsondo ansondo mumbungano ziinda ku 111,000 nyika yoonse. Lwabagwasya bakwesu abacizyi nyika yoonse mbwiizulwa ibazwa mubukkale busiyene-siyene kuba babelesi bacibwene ibamakani mabotu, ibayiisya munzila iikwelelezya, yabupampu, alimwi ayabusicamba.—Mil. 19:8; Kol. 4:6.

² Mulongo wacikolo camu 2015 unoobikkilizya akulanga-langa makani aali mucibeela cakuti “Makani Aajanika mu Jwi lya Leza” alimwi acakuti “Bupanduluzi Bwamabala Aamu Bbaibbele” izijanika mu Bbaibbele lya Busanduluzi Bwanyika Mpya, alimwi amakani aazwa mumamagazini aa Ngazi Yamulindizi. Kuyungizya waawo, kuli kucinca kwacitwa kujatikizya ciindi cipedwe cibeela cakunomoona twaambo tugwasya twakazwa mukubala Bbaibbele alimwi a Makani Na. 1. Kucinca ooku alimwi amalailile aajatikizya mbozyeelede kweendelezyegwa zibeela zyamucikolo alitondezyedwe mumincali iitobela.

³ Kunomoona Twaambo Tugwasya Twakazwa Mukubala Bbaibbele: Bakwesu bapedwe cibeela eeci banoojisi maminiti obilo aakulanga-langa kaambo komwe kamu Magwalo kakazwa mukubala Bbaibbele kwansondo ansondo. Kulibambila kabotu kuyoopa kuti baambe kaambo kagwasya kumbungano muciindi cipedwe. Mpoonya, baswiilizi bayoopegwa maminiti aali cisambomwe mbuli lyoonse kutegwa baambe mutuvwaluvwalu tuli 30 naa kutasika aawo twaambo twakabakkomanisya mukubala Bbaibbele kwansondo ansondo. Kuyandika kulibambila alimwi akubikkila maano kutegwa twaambe kaambo kagwasya mutuvwaluvwalu tuli 30, pele kucita boobo kulatugwasya. Alimwi cipa kuti abamwi baambe ncobakaiya mukuvwuntauzya kwabo.

⁴ Makani Na. 1: Ciindi cipedwe cibeela cakubala Bbaibbele cacesyegwa akuba maminiti otatwe naa kutasika aawo alimwi kunoobalwa buyo cibeela cisyoonto. Aabo bapegwa cibeela cakubala beelede kulibambila kabotu kwiinda mukubala cakupozya balikke akubikkila maano kwaabala mbwaayelede kubalwa mabala alimwi akubala cakutagaba-gaba kutegwa kaambo kalimvwisye. Bantu ba Jehova boonse beelede kusolekesya kubala kabotu nkaambo kubala kulayandika kapati mubukombi bwesu. Eelo kaka tulikkomene nkaambo bunji bwabana besu babala kabotu! Tulabalumba bazyali akaambo kakusolekesya caluyando kugwasya bana babo kuba babali babotu.

⁵ Makani Na. 2: Eeci cinooli cibeela cijisi maminiti osanwe icipegwa kumucizyi. Sicikolo weelede kubelesya mutwe wamakani ngwapedwe. Ikuti naa makani azwa mu Bbaibbele lya Busanduluzi Bwanyika Mpya, sicikolo weelede kubikkila maano kutondezya makani mbwaakonzya kubelesyegwa mumulimo wamumuunda mucilawo cambungano. Ikuti naa makani ayeeme amuntu waambwa mu Bbaibbele kuzwa mu Ngazi Yamulindizi, sicikolo weelede kubala makani aajanika ansi aazina lyamuntu ooyo waambwa mu Bbaibbele, kusala magwalo aakubelesya, alimwi akutondezya ncotukonzya kwiiya kucikozyanyo camuntu waambwa mu Bbaibbele. Magwalo aambi aayendelana amutwe wamakani inga abelesyegwa. Mulangizi wacikolo uyoopa mugwasyi omwe.

⁶ Makani Na. 3: Eeci cinooli cibeela cijisi maminiti osanwe icipegwa kumukwesu naa mucizyi. Ikuti capegwa mucizyi, ceelede kukananwa mbuli mbokwapandululwa mu Makani Na. 2. Makani aazwa mu Ngazi Yamulindizi ayelede kupegwa kaali makani kubaswiilizi boonse. Sicikolo weelede kubelesya mutwe wamakani ngwapedwe, kusala magwalo aakubelesya, akutondezya ncotukonzya kwiiya kucikozyanyo camuntu waambwa mu Bbaibbele.

⁷ Bubambe Bupya Kujatikizya Makani Na. 3 Aapegwa Kubakwesu: Ikuti makani azwa mu Bbaibbele lya Busanduluzi Bwanyika Mpya, ayelede kupegwa kaali citondezyo caciiyo camukwasyi naa mulimo wamumuunda. Kanji-kanji mulangizi wacikolo uyoopa mugwasyi alimwi anzila yakubelesya. Sikugwasyilizya weelede kuti kali umwi wabanamukwasyi basicikolo naa mukwesu wamumbungano. Magwalo aamwi aatondezya njiisyo zyamu Bbaibbele aayendelana amutwe wamakani inga abelesyegwa. Ciindi aciindi, mwaalu ulakonzya kupegwa kucita cibeela eeci. Baalu balakonzya kulisalila mugwasyi alimwi anzila yakubelesya. Cakutadooneka, ciyoobakulwaizya bamumbungano kubona baalu kabapa citondezyo cakuyiisya kabotu amunamukwasyi naa mukwesu uumwi.

⁸ Lulayo: Mulangizi wacikolo uyoobelesya maminiti obilo amana makani aasicikolo umwi aumwi kulumbaizya alimwi akupa lulayo lugwasya kuzwa mubbuku lya Amugwasyigwe Alwiiyo Lujanwa mu Cikolo Camulimo Weendelezyegwa a Leza. Ciindi mulangizi wacikolo naita sicikolo kuti ape makani mucikolo, takaambilizyi cibeela mpatiibelekele sicikolo. Sicikolo umwi aumwi amana kupa makani aakwe, mulangizi wacikolo weelede kumulumbaizya sicikolo, kwaamba cibeela sicikolo mpaali kubelekela alimwi akwaamba kaambo sicikolo ncaacita kabotu mucibeela eeco, naa kupandulula calubomba ikaambo ncociyandika kuti sicikolo akabikkile maano alimwi mucibeela eeco.

⁹ Foomu yalulayo yasicikolo ilakonzya kujanwa apeeji 79 kusikila apeeji 81 mubbuku lyakwe lya Cikolo Camulimo. Sicikolo amana kupa makani aakwe, mulangizi wacikolo uyoobuzya sicikolo kumbali kuti naa wakacilanga-langa cakucita icili acibeela mpaali kubelekela, mpoonya uyoolemba majwi aayelede mubbuku lyasicikolo. Sicikolo ulakonzya kulumbaizyigwa alimwi akupegwa lugwasyo lumbi yamana miswaangano naa aciindi cimbi. Lulayo ndwapegwa sicikolo umwi aumwi mucikolo weelede kulubona kuti ncoolwe cakumugwasya kuyaambele kumuuya.—1Tim. 4:15.

¹⁰ Ikuti sicikolo waindilizya aciindi ncapedwe, mulangizi wacikolo naa sikumugwasyilizya weelede kupa citondezyo mbuli kulizya kalangu naa kuuma-uma cintu ikutondezya munzila yabupampu kuti ciindi ncapedwe sicikolo camana. Sicikolo weelede kutondezya kuti wacibona citondezyo kwiinda mukumanizya kaambo nkaamba akuzwa acibumbili.—Amubone bbuku lya Cikolo Camulimo, p. 282, munc. 4.

¹¹ Boonse aabo basika azyeelelo ziyandika bakulwaizyigwa kulilembya mu Cikolo Camulimo Weendelezyegwa a Leza. (Amubone bbuku lya Cikolo Camulimo, p. 282, munc. 6.) Lwiiyo lujanika mucikolo eeci lwapa kuti bantu ba Jehova kabacikonzya kukambauka akuyiisya makani mabotu aa Bwami cakusinizya, cabulemu, alimwi acaluyando. Tacidoonekwi kuti Jehova ulakkomana kutembaulwa abaabo boonse bagwasyigwa alwiiyo oolu luzwa kuli Leza!—Int. 148:12, 13; Is. 50:4.