Malailile Aajatikizya Muswaangano Wabuumi Amulimo Wesu wa Bunakristo

Izili Mukati

• Majwi Aantalisyo 2

• Mbono Izili mu Jwi lya Leza 3-5

  • Makani 3

  • Mbono Zyakumuuya 4

  • Kubala Bbaibbele 5

• Amusungwaale Mumulimo Wamumuunda 6-14

  • Kutalisya Mubandi 7

  • Kupilukila 8

  • Kugwasya Bantu Kuti Babe Basikwiiya 9

  • Kupandulula Nzyomusyoma 10

  • Makani 11

  • Ceelede Kucitwa 12

  • Bukkale 13

  • Kubelesya Mavidiyo Azyakumwaya 14

• Kupona Buumi bwa Bunakristo 15-16

  • Ciiyo ca Bbaibbele Cambungano 16

• Majwi Aamamanino 17

• Kulumbaizya Akupa Lulayo 18

• Ciindi 19

• Kuswaya kwa Mulangizi Wabbazu 20

• Nsondo ya Muswaangano Wabbazu naa Wacooko 21

• Nsondo ya Ciibalusyo 22

• Mulangizi Wamuswaangano Wabuumi Amulimo 23

• Sicuuno Wamuswaangano Wabuumi Amulimo 24

• Sikugwasyilizya Kupa Lulayo 25

• Makkilasi Aambi 26

• Mavidiyo 27

1. Malailile aali mupepa eeli alabagwasya boonse ibajisi cibeela mu Muswaangano Wabuumi Amulimo Wesu wa Bunakristo. Boonse bajisi zibeela beelede kwaabala malailile aajatikizya cibeela cabo icili mu Kabbuku Kamuswaangano Wabuumi Amulimo kabatanatalika kulibambila cibeela eeco. Basikumwaya boonse beelede kukulwaizyigwa kulilembya mucikolo. Bamwi ibajanika lyoonse lyamiswaangano yambungano abalo balakonzya kulilembya ikuti kabazizumina njiisyo zyamu Bbaibbele alimwi ikuti bukkale bwabo kabweendelana anjiisyo zya Bunakristo. Mulangizi Wamuswaangano Wabuumi Amulimo weelede kubandika zyeelelo zyakulilembya mucikolo amuntu uutali sikumwaya pele uujisi luyandisisyo lwakunjila mucikolo mpoonya akumwaambila naa uleelela. Eeci ceelede kucitwa kaliko asikumuyiisya Bbaibbele (naa muzyali kamboni). Nzila eeyi ilikozyenye ayeeyo muntu nayanda kuba sikumwaya uutanabbapatizyigwa.—od cibalo 8 munc. 8.

MAJWI AANTALISYO

2. 1 min. Nsondo ansondo, lwamana lwiimbo lwakujalula amupailo, sicuuno Wamuswaangano Wabuumi Amulimo unakwaamba makani aanoopa baswiilizi kulangila zili mupulogilamu yabuzuba oobo. Sicuuno weelede kubikkila maano kutwaambo ituyoobagwasya kapati basimbungano.

MBONO IZILI MU JWI LYA LEZA

3. Makani: 10 min. Mutwe wamakani alimwi atwaambo tupati-pati tobilo naa totatwe zilibikkilizyidwe mu Kabbuku Kamuswaangano Wabuumi Amulimo. Makani aaya ayelede kupegwa amwaalu naa mukutausi weelela. Ikuti kwatalikwa bbuku lipya mukubala Bbaibbele kwansondo ansondo, kunakweebelelwa kavidiyo ikapandulula makani aali mubbuku lipya eelyo. Mwaambi ulakonzya kwaamba twaambo ituli mukavidiyo itweendelana amutwe wamakani. Pele weelede kuba masimpe kuti twaambo ituli mukabbuku kamuswaangano watwaamba. Alimwi ikuti ciindi kacizumizya, weelede kuzibelesya kabotu zifwanikiso, zyalo izibambilidwe kusalazya twaambo tuli mumakani. Alimwi ulakonzya kubikkilizya amalifalensi amwi ikuti kaayendelana amakani aabandikwa.

4. Mbono Zyakumuuya: 10 min. Cibeela eeci cijatikizya kubuzya akwiingula alimwi tacijisi ntalisyo naa majwi aamamanino. Ceelede kweendelezyegwa amwaalu naa mukutausi iweelela. Mwaambi weelede kubuzya baswiilizi mibuzyo yoonse. Alimwi ulakonzya kubona naa cileelela kutubala naa kutatubala tupango toonse tubikkidwe. Aabo ibapegwa coolwe cakwiingula beelede kucita oobo mutuvwaluvwalu ituli 30 naa kutasika aawo.

5. Kubala Bbaibbele: 4 min. Cibeela eeci ceelede kupegwa sicikolo musankwa. Sicikolo weelede kubala cibeela ncaapegwa kakunyina kwaamba majwi aantalisyo naa aamamanino. Makanze aasicuuno wamuswaangano anooli aakugwasya basicikolo kubala munzila iiluzi, kubala nzyobamvwa bantu, kupasaula kukanana, ikukankaizya caambwa, kucinca-cinca jwi, ikwiima mweelede alimwi akukanana mbwakanana muntu lyoonse. Mbwaanga zibeela zyakubala Bbaibbele zimwi nzifwaafwi mpoonya zimbi nzilamfwu, mulangizi Wamuswaangano Wabuumi Amulimo weelede kubikkila maano kujatikizya mbwabala sicikolo umwi aumwi ciindi nasala weelede kupegwa cibeela eeci.

AMUSUNGWAALE MUMULIMO WAMUMUUNDA

6. 15 min. Cibeela eeci camuswaangano cibambilidwe kugwasya boonse kulibambila mulimo wamumuunda alimwi akubagwasya kuyungizya luzyibo lwabo lwakubandika abantu alimwi akuyiisya. Kuti kakuyandika, baalu balakonzya kupegwa zibeela zyabasicikolo. Sicikolo umwi aumwi weelede kubelekela aciiyo icili mubroshuwa ya Kubala Alimwi Akuyiisya naa ya Amubayande Bantu icibikkidwe mu Kabbuku Kamuswaangano Wabuumi Amulimo. Zimwi ziindi, kunooli cibeela cacitondezyo. Cibeela eeci ceelede kweendelezyegwa amwaalu naa mukutausi weelela. — Amubone muncali 15 uutondezya mbozyeelede kweendelezyegwa zibeela zyamibandi.

7. Kutalisya Mubandi: Cibeela eeci cilakonzya kupegwa asicikolo musankwa naa musimbi. Sikugwasyilizya weelede kuba muntu ngobakozyenye limwi zizo naa munamukwasyi. Sicikolo alimwi asikugwasyilizya balakonzya kucita cibeela cabo kabakkede naa kabaimvwi.—Kutegwa muzyibe ceelede kucitwa alimwi abukkale kujatikizya cibeela eeci, amubone muncali 12 alimwi a 13.

8. Kupilukila: Cibeela eeci cilakonzya kupegwa asicikolo musankwa naa musimbi. Sikugwasyilizya weelede kuba muntu ngobakozyenye limwi zizo. (km 5/97 p. 2) Sicikolo alimwi asikugwasyilizya balakonzya kucita cibeela cabo kabakkede naa kabaimvwi. Sicikolo weelede kutondezya mbwayelede kubandika amuntu ngobakabandikide kale.—Kutegwa muzyibe ceelede kucitwa alimwi abukkale kujatikizya cibeela eeci, amubone muncali 12 alimwi a 13.

9. Kugwasya Bantu Kuti Babe Basikwiiya: Cibeela eeci cilakonzya kupegwa asicikolo musankwa naa musimbi. Sikugwasyilizya weelede kuba muntu ngobakozyenye limwi zizo. (km 5/97 p. 2) Sicikolo alimwi asikugwasyilizya balakonzya kucita cibeela cabo kabakkede naa kabaimvwi. Cibeela eeci ceelede kutondezya ciiyo ca Bbaibbele icatalika kale. Takuyandiki majwi aantalisyo naa aamamanino ccita kuti sicikolo ubelekela acibeela eeco. Talili lyoonse nokuyandika kuti mane buya cibeela coonse mpaazwa makani cibalwe cakupozya, nokuba kuti eeci cilakonzya kucitwa.

10. Kupandulula Nzyomusyoma: Ikuti kaali makani, cibeela eeci ceelede kupegwa amukwesu. Pele ikuti kacili citondezyo, cilakonzya kupegwa asicikolo musankwa naa musimbi. Sikugwasyilizya weelede kuba muntu ngobakozyenye limwi zizo. Sicikolo weelede kupa bwiinguzi busalede kukaambo kali mukubandikwa kweelana alifalensi. Sicikolo ulakonzya kusala kwaamba lifalensi mwaazwa makani aakwe naa pe ciindi napa cibeela eeci.

11. Makani: Cibeela eeci cilakonzya kupegwa asicikolo musankwa alimwi cilapegwa kaali makani kumbungano. Ikuti makani kaazwa mukaambo kali mumakani aayungizyidwe A mubroshuwa ya Amubayande Bantu, sicikolo ulakonzya kutondezya tupango mbotukonzya kubelesyegwa mubukambausi. Mucikozyanyo, ulakonzya kupandulula kapango aako nokeelede kubelesyegwa, ncokaamba, alimwi ambwakonzya kumupandulwida muntu. Pele ikuti makani kaayeeme akaambo ikali muziiyo zili mu broshuwa ya Amubayande Bantu, sicikolo weelede kupandulula kaambo aako mbokakonzya kubelesyegwa mubukambausi. Ulakonzya kubelesya cikozyanyo cili mukaambo 1 naa kwaamba tupango tuli toonse tuyungizyidwe muciiyo, ikuti kakuyandika.

12. Ceelede Kucitwa: Makani aali mumuncali ooyu amincali iitobela aamba kujatikizya cibeela ca “Kutalisya Mubandi” alimwi a “Kupilukila.” Ccita kuti kwatondezyegwa bumbi, mbaakani yasicikolo njakwaamba kasimpe kamu Bbaibbele keendelana abukkale bwamuntu alimwi akusiya kaambo kakuyoobandika mulweendo luboola. Sicikolo weelede kusala makani aakacitika caino-ino alimwi aakonzya kumugwasya muntu ngobabandika limwi. Ulakonzya kusala kutondezya vidiyo naa kwaabila cakumwaya cimwi kuzwa mu Zibelesyo Nzyotubelesya Kapati Mukuyiisya. Muciindi cakuswata zyoonse nzyobayakwaamba, basicikolo beelede kutondezya luzyibo lwabo lwakubandika, mbuli kumubikkila maano muntu alimwi akukanana mbuli mbobakanana lyoonse.

13. Bukkale: Sicikolo weelede kutondezya bukkale bwakubusena ooko. Mucikozyanyo:

1. (1) Kuŋanda Aŋanda: Mubukkale oobu, sicikolo ulakambauka kuŋanda aŋanda,—tacikwe makani naa ucita boobo cakaanzambwene, naa kubelesya fooni, naa lugwalo,—kumane akupilukila kumuntu.

2. (2) Bukambausi Bwamukwiizya: Mubukkale oobu, sicikolo wacinca mubandi ngobajisi akutalika kukambauka. Eeci cilakonzya kubikkilizya kwaamba kaambo kamu Magwalo kumulimo, kucikolo, mucilawo mobakkala, mulweendo naa kubusena bumbi nobacita milimo yabo yabuzuba abuzuba.

3. (3) Bukambausi Bwakubuleya. Bukkale oobu, sicikolo ulakonzya kubelesya kakkocci, kuunkila bantu kumasena nkobacitila makwebo, bukambausi bwamumugwagwa, naa mupaakki, mobapakiŋila myoota naa kufwumbwa kubusena nkobajanika bantu.

14. Kubelesya Mavidiyo Azyakumwaya: Kweelana abukkale, sicikolo ulakonzya kusala kutondezya vidiyo naa kwaabila cakumwaya. Ikuti cibeela casicikolo cilabikkilizya akutondezya vidiyo naa ikuti sicikolo wasala kuti atondezye vidiyo, ulakonzya kubandika vidiyo pele tayelede kwiitondezya.

KUPONA BUUMI BWA BUNAKRISTO

15. Lwamana lwiimbo lutalisya cibeela eeci, maminiti aali 15 aatobela anoojisi mbazu yomwe naa zyobilo zibambilidwe kugwasya baswiilizi kutobela ncolyaamba Jwi lya Leza. Ccita kuti kwatondezyegwa bumbi, zibeela eezyi zinoopegwa abaalu naa bakutausi ibeelela, ccita buyo kuti ncibeela caziyandika mumbungano, calo cinoopegwa buyo abaalu. Ikuti cibeela kacili cakubandika abaswiilizi, mwaambi ulakonzya kubuzya mibuzyo kubikkilizya ayeeyo iitabikkidwe mucibeela. Ntalisyo tayeelede kulampa kutegwa kube ciindi cakwaamba twaambo tupati-pati alimwi akuti baswiilizi bakonzye kutola lubazu. Ikuti cibeela eeco kacibikkilizya kubuzya-buzya, sikubuzyigwa weelede kuboola kucibumbili.

16. Ciiyo ca Bbaibbele Cambungano: 30 min. Cibeela eeci ceelede kupegwa amwaalu iweelela. (Mumbungano imuli baalu basyoonto, bakutausi beelela balakonzya kubelesyegwa ikuti kwayandika.) Kabunga kabaalu keelede kusala aabo ibeelela kusololela Ciiyo ca Bbaibbele Cambungano. Aabo bazumizyidwe beelede kweendelezya munzila iili kabotu kutegwa ciiyo kacicitwa muciindi cibikkidwe, beelede kukankaizya magwalo imuli twaambo tupati-pati alimwi akugwasya boonse kujana mpindu kutwaambo twayiigwa. Bayoogwasyigwa kwiinda mukulanga-langa busolozi bwakamwaigwa kujatikizya mbozisololelwa zibeela zyakubuzya akwiingula. (w23.04 p. 24, kabbokesi) Camana kubandikwa munzila iilimvwisya cibalo cansondo eeyo, takuyandiki kulampya mubandi kwiinda mukuyungizya zimbi zyakwaamba. Ikuti kacikonzyeka, basikweendelezya abasikubala ibaindene-indene beelede kubelesyegwa nsondo ansondo. Ikuti sicuuno Wamuswaangano Wabuumi Amulimo walailila kuti ciiyo cifwiinsyigwe, sikweendelezya weelede kuzyiba mbwatiicite kutegwa ciiyo cifwiinsyigwe. Ulakonzya kusala kuti mincali imbi itabalwi.

MAJWI AAMAMANINO

17. 3 min. Sicuuno Wamuswaangano Wabuumi Amulimo uyakwiinduluka twaambo tugwasya itwayiigwa. Alimwi weelede kwaamba twaambo tumwi tuyakuyiigwa nsondo iitobela. Ikuti kakucili ciindi, ulakonzya kubayeezya basicikolo ibanoojisi zibeela nsondo iitobela kwiinda mukwaamba mazina aabo. Ccita kuti kwatondezyegwa bumbi, magwalo naa zyakwaambilizya iziyandika kapati zyeelede kubalwa kumbungano asicuuno mucibeela eeci. Zintu zicitwa lyoonse, mbuli kulibambila kuunka mumulimo wakukambauka alimwi amilongo yakusalazya, tazyeelede kwaambilizyigwa acibumbili, pele zyeelede kubikkwa abboodi lyamakani. Ikuti naa tacikonzyeki ikubala magwalo naa zyakwaambilizya muciindi ncapedwe sicuuno, nkokuti weelede kulomba bakwesu ibajisi zibeela mucibeela ca Kupona Buumi bwa Bunakristo kuti bafwiinsye zibeela zyabo. (Amubone muncali 16 alimwi a 19.) Muswaangano unakumana alwiimbo alimwi amupailo.

KULUMBA ALIMWI ALULAYO

18. Sicikolo umwi aumwi amana kupa cibeela cakwe, sicuuno Wamuswaangano Wabuumi Amulimo unoobelesya buyo miniti yomwe kulumba sicikolo akupa lulayo luyeeme aciiyo cibikkidwe. Ciindi sicuuno naita sicikolo kuti ape cibeela cakwe, tayelede kwaamba lulayo mpabelekela sicikolo. Nokuba boobo, sicikolo amana kupa cibeela cakwe alimwi akulumbaizyigwa, sicuuno weelede kwaamba cibeela sicikolo mpaali kubelekela alimwi akwaamba kaambo sicikolo ncaacita kabotu mucibeela eeco naa kupandulula calubomba ikaambo sicikolo ncayelede kubelekela acibeela eeco alimwi ambwayelede kucita boobo. Sicuuno ulakonzya kwaamba mbazu zimbi kujatikizya mbocacitwa citondezyo ikuti naa wabona kuti kucita boobo kulakonzya kumugwasya sicikolo naa baswiilizi. Lulayo lumbi lugwasya iluzwa mubroshuwa ya Amubayande Bantu, Kubala Alimwi Akuyiisya naa mubbuku lya Cikolo Camulimo lulakonzya kupegwa kumbali yamana miswaangano naa aciindi cimbi, ambweni kujatikizya cibeela calulayo ncaapedwe naa mbazu iimbi buyo.—Kutegwa muzyibe makani manji kujatikizya mukuli wasicuuno Wamuswaangano Wabuumi Amulimo alimwi asikugwasyilizya kupa lulayo, amubone muncali 19, 24, alimwi a 25.

CIINDI

19. Kunyina weelede kulya ciindi, naba sicuuno Wamuswaangano Wabuumi Amulimo tayelede kwiindilila aciindi ncapedwe. Nokuba kuti Kabbuku Kamuswaangano Wabuumi Amulimo kalaamba ciindi cibeela cimwi acimwi ncoceelede kutola, ikuti naa makani ngomupedwe amana tamweelede kuyandaula makani aamwi kutegwa mumanizye ciindi ncomubikkilidwe. Ikuti zibeela zimwi zyamuswaangano zyaindilila aciindi cibikkidwe, sicuuno Wamuswaangano Wabuumi Amulimo naa sikugwasilizya weelede kupa lulayo kumbali. (Amubone muncali 24 a 25.) Muswaangano woonse, kubikkilizya anyimbo alimwi amipailo weelede kucitwa muwoola lyomwe amaminiti aali 45.

KUSWAYA KWA MULANGIZI WABBAZU

20. Ikuti mbungano yaswaigwa amulangizi wabbazu, pulogilamu yeelede kucitwa kweelana ambokupandulwidwe mu Kabbuku Kamuswaangano Wabuumi Amulimo, pele zintu izyeelede kucinca nzyeezyi: Mucibeela ca Kupona Buumi bwa Bunakristo, Ciiyo ca Bbaibbele Cambungano tacinoocitwi, pele mubusena bwancico kunoopegwa makani aamulimo aamaminiti aali 30 aamulangizi wabbazu. Kaatanatalika makani aamulimo, sicuuno Wamuswaangano Wabuumi Amulimo unakwiinduluka zyayiigwa buzuba oobo akwaamba ziyakuyiigwa nsondo iitobela alimwi akubala zyakwaambilizya ziyandika mpoonya akwiita mulangizi wabbazu kuti ape makani. Amana makani aamulimo, mulangizi wabbazu unoojala muswaangano alwiimbo ndwaasala. Ulakonzya kwiita mukwesu uumbi kutegwa ajale muswaangano amupailo. Takweelede kuba makkilasi aambi aabelesya mwaambo wambungano ciindi mulangizi wabbazu naaswaya. Kabunga kalakonzya kucita muswaangano mbuli mbokacita lyoonse nokuba kuti mulangizi wabbazu waswaya mbungano. Nokuba boobo, kabunga keelede kusangana mbungano kumakani aamulimo aapegwa amulangizi wabbazu.

NSONDO YA MUSWAANGANO WABBAZU NAA WACOOKO

21. Munsondo yamuswaangano wabbazu naa wacooko, kunyina miswaangano yambungano yeelede kucitwa. Mbungano yeelede kuyeezyegwa kuti umwi aumwi naa mukwasyi weelede kulicitila zibeela zyamuswaangano zyansondo eeyo.

NSONDO YA CIIBALUSYO

22. Ikuti Ciibalusyo cili mukati kansondo, kunyina Muswaangano Wabuumi Amulimo weelede kucitwa.

MULANGIZI WAMUSWAANGANO WABUUMI AMULIMO

23. Mwaalu iwasalwa akabunga kabaalu nguunooba mulangizi Wamuswaangano Wabuumi Amulimo. Unoojisi mukuli wakubona kuti muswaangano ooyu weendelezyegwa kabotu alimwi akuti zibeela zyacitwa kweelana amalailile aapedwe mupepa eeli. Weelede kunoobandika ciindi aciindi asikugwasyilizya kupa lulayo. Mbwaatambwida buyo Kabbuku Kamuswaangano Wabuumi Amulimo kamyezi yobilo, mulangizi Wamuswaangano Wabuumi Amulimo uyoopanga mulongo wazibeela zyabasicikolo zyamyezi eeyo. Eeci cilabikkilizya azibeela zitali zyabasicikolo alimwi abaabo beelede kuba basicuuno bamuswaangano bakazumizyigwa akabunga kabaalu. (Amubone mincali 3-16 a 24.) Ciindi napanga mulongo, weelede kubikkila maano ciimo casicikolo, luzyibo alimwi ambwakonzya kwaanguluka kwaamba makani aayo. Weelede kucita mbubwenya oobo akuzibeela zitali zyabasicikolo. Cibeela cimwi acimwi casicikolo, kubikkilizya acibeela calulayo ncanoopegwa sicikolo zyeelede kupegwa kuli sicikolo nsondo zyotatwe kabutanasika buzuba mbwapa cibeela cakwe kubelesya foomu iitegwa Buumi Amulimo Wesu wa Bunakristo Cibeela Ncomupedwe (S-89). Mulangizi Wamuswaangano Wabuumi Amulimo weelede kuba masimpe kuti mulongo woonse wabikkwa abboodi lyamakani. Kabunga kabaalu kalakonzya kusala mwaalu uumbi naa mukutausi uukonzya kunoogwasyilizya. Nokuba boobo, baalu balikke mbabeelede kupa zibeela zitali zyabasicikolo.

SICUUNO WAMUSWAANGANO WABUUMI AMULIMO

24. Nsondo iili yoonse, mwaalu omwe unooba sicuuno Wamuswaangano Wabuumi Amulimo. (Mumbungano imuli baalu basyoonto, bakutausi beelela balakonzya kubelesyegwa ikuti kwayandika.) Unoojisi mukuli wakulibambila majwi aantalisyo amajwi aamamanino. Alimwi nguunakwiita bakwesu ibajisi zibeela zyoonse zyamuswaangano, alimwi kweelana amweelwe wabaalu, awalo ulakonzya kuba azibeela zimwi mumuswaangano. Majwi aambwa camana cibeela cimwi acimwi tayelede kuvwula pe. Kabunga kabaalu keelede kusala baalu ibeelela kupegwa mukuli ooyu. Baalu ibeelela, banoocincana kuba basicuuno. Kweelana abukkale mbobubede mumbungano yanu, mulangizi Wamuswaangano Wabuumi Amulimo ulakonzya kuba sicuuno ziindi zinji kwiinda baalu bamwi ibeelela. Ikuti mwaalu uleelela kweendelezya Ciiyo ca Bbaibbele Cambungano, nkokuti inga weelela kuba sicuuno wamuswaangano. Alimwi amuzyibe kuti mwaalu uupedwe coolwe cakuba sicuuno, caluyando weelede kubalumba munzila iikonzya kubagwasya basicikolo alimwi akubapa lulayo kuti kaluyandika. Kuyungizya waawo, sicuuno nguujisi mukuli wakubona kuti muswaangano tawiindilili aciindi cibikkidwe. (Amubone muncali 17 alimwi a 19.) Ikuti sicuuno kayanda alimwi ikuti busena mbupati acibumbili, kulakonzya kubikkwa maikkulofooni yasicuuno kutegwa kaimina mpawo ciindi naita mukwesu uujisi cibeela cimwi acimwi kuzooimina kukatebulu kamwaambi. Mbubwenya buyo, sicuuno ulakonzya kusala kukkala kumbele aali katebulu ciindi cacibeela ca Kubala Bbaibbele alimwi acibeela ca Amusungwaale Mumulimo Wamumuunda. Eeci cilakonzya kugwasya kubamba ciindi.

SIKUGWASYILIZYA KUPA LULAYO

25. Ikuti kacikonzyeka, mukuli ooyu weelede kupegwa kumwaalu, nkokuti mwaambi uucibwene. Mulimo wakwe ngwakupa lulayo kumbali, ikuti kakuyandika, kubaalu abakutausi ibapegwa coolwe cakukanana makani, kubikkilizya azibeela izili mu Muswaangano Wabuumi Amulimo, makani aabuleya, kweendelezya naa kubala lya Ciiyo ca Ngazi Yamulindizi alimwi aa Ciiyo ca Bbaibbele Cambungano. (Amubone muncali 19.) Ikuti kakuli baalu banji mumbungano ibacibwene kukanana akuyiisya, nkokuti mwaka amwaka kulakonzya kusalwa mwaalu uumbi uucibwene kulanganya mukuli ooyu. Takuyandiki kuti mane lyoonse kapa lulayo kujatikizya makani aali woonse aapegwa.

MAKKILASI AAMBI

26. Kweelana ambobali banji basicikolo, mbungano zilakonzya kuba amakkilasi aambi aabasicikolo. Kkilasi imwi aimwi yeelede kuba asikupa lulayo iweelela, kwaambisya mwaalu. Ikuti kaceelela, mukutausi iweelela ulakonzya kupegwa mukuli ooyu. Kabunga kabaalu keelede kusala uukonzya kupegwa mukuli ooyu alimwi akuti naa kweelede kuba kucincana naa pe. Sikupa lulayo weelede kwaatobela malailile aali mumuncali 18. Ikuti kakuli kkilasi iimbi, basicikolo beelede kwaambilwa kuti baunke mukkilasi eeyo ciindi nocamana cibeela ca Mbono Zyakumuuya mucibeela cakuti Mbono Izili mu Jwi lya Leza. Beelede kujoka kusangana basimbungano boonse camana cibeela camamanino casicikolo.

MAVIDIYO

27. Mavidiyo aasalidwe anoobelesyegwa mumuswaangano ooyu. Mavidiyo aamuswaangano anoojanika mu aapu ya JW Library^® alimwi alakonzya kukkopwa kubelesya mafooni, matabbuleti alimwi azibelesyo ziindene-indene.

© 2023 Watch Tower Bible and Tract Society of Pennsylvania

S-38-CG 11/23