Kabbokesi Kamubuzyo

◼ Nkucenjela nzi nkotweelede kubaako ciindi notuyanzana amuntu uutali mwanakazima naa mwaalumima mumulimo wesu wakumuunda?

Tulijisi kaambo kakulangila kuti bakwesu abacizyi lyoonse balayanda kukakatila kuzyeelelo zisumpwidwe alimwi ziluzi mukulilemeka kwabo. Nokuba boobo, tukkede munyika mbyaabi alimwi iilendekezya iijisi buyo minyinza misyoonto kumakani aakulilemeka kubotu. Nokuba kuti inga katuli aamakanze mabotu loko, pele tweelede kucenjela lyoonse kutaleta masampu naa kutajatikizigwa mucintu citeelede. Eeci cijatikizya kucenjela ciindi notuli mumulimo wakumuunda.

Mumulimo wakumuunda kanjikanji tujana bantu batali banakazima abatali basankwama balitondezya kukayanda ncobeni kasimpe. Ikuti katuli tolikke nitwaswaya kumane ngotwajana tali mwanakazima naa mwaalumima kumane uli buyo alikke aŋanda, inga cabota kapati kupa bukambausi bwesu katuli amulyango kwiinda kunjila mukati. Kuti naa kuyanda mpokuli, inga mwalibambila kuya kupilukila eelyo nomuya kubaa sikumwaya uumbi nokuba ciindi bamwi mumukwasyi nobanikuliko abalo. Ikuti eeci tiicakonzeka, inga mwapa sikumwaya mwanakazinyina naa mwaaluminyina wa siŋanda. Eeci ncimwi buyo akucita ciiyo ca Bbaibbele kumuntu uutali mwaaluminyoko naa mwanakazinyoko.—Mt. 10:16.

Tweelede kucenjela alimwi notusala wakubelekaa walo mumulimo wakumuunda. Nokuba kuti basikumwaya batali banakazinyina naa baaluminyina zimwi ziindi inga babeleka antoomwe, eeci cilainda kubota kuti kabali banji. Aboobo buya, nokuba mumulimo wakumuunda, tacili cintu camaanu kubaa muntu uutali mwanakazinyoko naa mwaaluminyoko kwaciindi cilamfwu kuti kamutakwetene aawe. Aboobo, mukwesu weendelezya nkamu iiya mumuunda weelede kubikkila maanu azintu eezi naabanya basikumwaya, kujatikizya abakubusi, ambobati beleke limwi.

Kwiinda mukweeleka kabotu zintu, tuya kuleka ‘kubikka imfumpu niiba yomwe’ kulindiswe tobeni nokuba kubantu bambi.—2 Kor. 6:3.