Amuliyumye-yumye Ikucita Nyendo Zyakupilukila
1 Sena cilamukonda kucita nyendo zyakupilukila? Cilabakonda basikumwaya banji. Mulakonzya mwakali kuyoowa kukusaanguna ikapati nomwakali kupilukila kuli basiŋanda batakatondezya kuyandisya kuswiilila nomwakabaswaya lwakusaanguna. Pele mbomuyaabuyuma-yuma kwiinda muli Leza ikwaambaula makani mabotu ikucita nyendo zyakupilukila, mulakonzya mulalamwa mbouli mulimo muuba-uba alimwi uugwasya. (1 Bate. 2:2, Ci) Munzila nzi?
2 Kuli kwiindana kupati akati kalweendo lwakupilukila alimwi alwakusaanguna. Lweendo lwakupilukila lucitwa kumuzibe kutali mweenzu alimwi ncuuba-uba kubandika kumuzibe kwiinda kumweenzu. Ibubotu bujanika akaambo kakutola lubazu mumulimo ooyu mbwakuti nyendo zyakupilukila zilakonzya kusololela kuziiyo zya Bbaibbele zili kabotu.
3 Notubeleka kuŋanda aŋanda tulaindulula-indulula kusikila bantu batakali kuyanda kuswiilila notwakabaswaide ciindi camusule. Ino nkaambo nzi ncotuzumanana kubaswaya? Tulizi kuti bukkale bwabantu bulacinca cakuti muntu iwakalikuboneka kulengaana naa wakalikukazya ciindi notwakaswaide ulakonzya wayanda kuswiilila twapilukila ciindi citobela. Akaambo kaboobo tulalibambila lweendo lwakupilukila akupaila kuli Jehova kuti atulongezye kutegwa nzyotuyooamba zikakonzye kupa kuti muntu ayande kuswiilila.
4 Ikuti naa mumulimo wesu wakuŋanda aŋanda cakulisungula tulakambauka kubantu batakali kuyanda kuswiilila notwakabaswaide, sena inga tatusolekesyi cakulisungula ikupilukila kuli boonse abo ibatondezya kuti balayanda kuswiilila mulumbe wa Bwami?—Inc. 10:34, 35.
5 Bunji bwesu sunu tuli mukasimpe nkaambo sikumwaya umwi wakacita nyendo zyakupilukila kulindiswe cabusicamba. Ikuti kamuli akati kabaaba, mulakonzya kulibuzya kuti, ‘Ino kukusaanguna ndakamutondezya ciimo nzi sikumwaya? Sena ndakauzumina mulumbe wa Bwami mpoona-mpoona mbundakaumvwida ciindi cakusaanguna? Sena kuli mbundakali kutondezya bulenga?’ Muciindi caboobo tweelede kukkomana kuti sikumwaya iwakapilukila wakatubona kuti twakaleelede kucitilwa lweendo lwakupilukila alimwi ‘Leza [wakwe] wakamuyumya-yumya,’ wakatuswaya akuzumanana kutuyiisya kasimpe. (1 Bate. 2:2, Ci) Ino mbuti kumakani aabantu baya banga kukusaanguna balatondezya kuti bayanda kuswiilila pele bamana batalika kutuzelauka? Kulayandika kapati kusungwaala mbubwena mbuli ceeci cakuluula mbocitondezya.
6 Bumwi buzuba mafwumofwumo basikumwaya bobile nobakali mubukambausi bwamumugwagwa, bakaswaanganya mukaintu umwi wakali kukuba mwana mukapulemu. Oyu mukaintu wakazumina kubweza magazini mpoona wakatamba bacizi aba kuti bakamuswaye kuŋanda yakwe mu Nsondo insondo yakalikutobela. Bakasika aciindi mpobakapangenye pele siŋanda wakabaambila kuti wakanyina ciindi cakukanana ambabo. Nokuba boobo wakasyomezya kuti uyoojanika nsondo yakalikutobela. Bacizi aba bakadooneka kapati kuti naa inga wasyomeka kucipangano cabo cino ciindi pele mukaintu ulya wakali kubalindila. Ciiyo ca Bbaibbele cakatalikwa elyo kuyaambele kwamukaintu oyu kwakali kugambya. Nokwakainda buyo ciindi cisyoonto wakatalika kujanika kumiswaangano lyoonse akutola lubazu mumulimo wamumuunda. Ulibbapatizidwe lino.
7 Amubambe Ntalisyo Mbotu Mulweendo Lwakusaanguna: Intalisyo mbotu iikonzya kupa kuti tuzwidilile mulweendo lwesu lwakupilukila kanjikanji iyakwa mulweendo lwakusaanguna. Amuswiilile kabotu-kabotu kutwaambo twaamba siŋanda. Tumwaambila nzi? Sena mukombi? Sena ubikkila kapati maanu kutwaambo twabukkale? Sena uyandisisya kapati zyasayaansi? zyaciindi? zintu zituzingulukide? Kumamanino aakuswaya kwanu mulakonzya kubuzya mubuzyo uupa kuyeeya akusyomezya kuyoobandika kwiingula kuzwa mu Bbaibbele ciindi mwaakupilukila.
8 Mucikonzyanyo, kuti naa siŋanda wazumina cisyomezyo camu Bbaibbele ca paradaiso anyika, inga kweelela kuzumanana amubandi uujatikizya mutwe oyo. Kamutanazwa buyo mulakonzya kubuzya ategwa: “Mbuti mbotunga twaba masimpe kuti Leza uyoozuzikizya cisyomezyo eeci?” Mpoona amuyungizye kuti: “Antela inga ndainda ciindi banamukwasyi bambi nobanooliwo aŋanda mpoona inga ndamutondezya kwiingula kwa Bbaibbele kumubuzyo ooyu.”
9 Ikuti naa siŋanda taatondezya kuyanda kwiiya mutwe wamakani uuli woonse, mulakonzya kubuzya mubuzyo umwi uupedwe kupeeji lyakunze lya Mulimo Wesu Wabwami akuubelesya kuba aakutalikila mumubandi wanu uutobela.
10 Kamubamba Malembe Aaluzi: Kapepa kanu mpomulemba bantu bajanika kuŋanda aŋanda keelede kuti kakaluzi alimwi kakazulide kulembwa. Amulembe zina akkeyala yasiŋanda mbumwazwida buyo aŋanda yakwe. Mutaliyeeyeli buyo namba yaŋanda naa zina lyamugwagwa—amulange-lange makani oonse mube masimpe kuti muliluzi. Amulembe mbuli mbwaboneka muntu oyo. Amulembe mutwe wamakani ngumwabandika, magwalo ngomwabala, mabbuku aali oonse ngomwasiya alimwi amubuzyo ngomuyooingula mwaakupilukila. Amubikkilizye buzuba aciindi nomwaswaya lwakusaanguna alimwi anomwaamba kuti muyoopilukila. Mbwaanga kapepa kanu kalembwa kabotu lino, mutakazimizyi pe! Amukayobole abusena buli kabotu kutegwa mwakabelesya mwakayanda ciindi ciboola. Amuzumanane kumuyeeya muntu oyo alimwi ambomuyoobandika anguwe ciindi ciboola.
11 Kamwaazi Makanze Aanu: Cakusaanguna, ikwiinda mukuba muntu uuambaula kabotu alimwi wabulongwe, amusolekesye kucita kuti siŋanda atalibiliki pe. Amumutondezye muntu oyo kuti mulamulanganya kakutakwe kulizibizya kapati pe. Mwamana amumuyeezye naa kuli mubuzyo ngomwakabuzide ciindi cakamana nomwakaswaide. Amuuswiilile kabotu-kabotu muzeezo wakwe alimwi amutondezye kulumba kapati kumuzeezo wakwe. Mpoona amutondezye ncoubeleka muzeezo wa Bbaibbele. Ikuti kakukonzyeka amumutondezye muzeezo uukozyanya kuzwa mubbuku lya Luzibo Lutola Kubuumi Butamani. Kamuyeeyede kuti makanze aanu mapati nomupilukila nkusola kutalisya ciiyo ca Bbaibbele.
12 Inzila yakugaminina iibelesyedwe mubbuku lya Luzibo yapa kuti bunji bwesu ‘tuliyumye-yumye’ kuziiyo zya Bbaibbele ikuyumya-yumya basikwiiya kujanika kumiswaangano alimwi akuyanzana ambunga ya Jehova. Ikaindi twakali kulindila mane bantu baiya kwaciindi cili mbocibede katutana batamba kuti bayanzane andiswe. Lino basikwiiya banji balajanika kumiswaangano mbubatalikila buyo kwiiya alimwi akaambo kaboobo baunkaambele kufwaambaana.
13 Ibanabukwetene bakakambauka kwiinda mukwiizya kumubelesinyina. Naakatondezya kuti ulayanda kwiiya kasimpe bakamulomba kuti abe aciiyo ca Bbaibbele mubbuku lya Luzibo. Aciindi mpoona bakamwaambila kuti wakeelede kuti kajanika kumiswaangano kwalo mibuzyo yakwe minji nkoiingulwa. Oyu mwaalumi taakazumina buyo kubaa ciiyo ca Bbaibbele pele cakali kucitwa ziindi zyobile munsondo yomwe alimwi wakatalika kujanika kumiswaangano lyoonse ku Ŋanda ya Bwami.
14 Amubelesye Broshuwa ya Ncinzi Leza Ncayanda Kulindiswe?: Kumuswaangano Wacooko wa “Batumwa Baluumuno lwa Bunaleza” twakatambula broshuwa ya Ncinzi Leza Ncayanda Kulindiswe? Eyi broshuwa ilagwasya kapati kutalika ziiyo zya Bbaibbele kubantu bayoowa Leza kufwumbwa naa bayiide buti. Ijisi kkoosi yakwiiya iili kabotu iijatikizya njiisyo zya Bbaibbele zyantalisyo. Eyi broshuwa iyoogwasya kapati ikuyiisya luzibo lwa Leza. Ilakapandulula kasimpe munzila iisalala alimwi nguba-uba cakuti umwi aumwi wandiswe uyookonzya kuyiisya bamwi ncayanda Leza kulindiswe. Kulalangilwa kuti basikumwaya banji bayoobaa coolwe cakweendelezya ciiyo ca Bbaibbele mubroshuwa eyi.
15 Ibantu bamwi ibayeeya kuti tabajisi ciindi cakwiiya bbuku lya Luzibo balakonzya kuyanda kubaa ziiyo zifwaafwi-fwaafwi mubroshuwa ya Ncayanda. Bayoozikkomanina zintu nzyobayooiya! Mumapeeji obilo naa otatwe buyo bayoojana bwiinguzi bwamibuzyo njobalikulibuzya bantu kwa myaanda ya myaka: Ino Leza nguni? Ino Diabolosi nguni? Mmakanze nzi ngajisi Leza kujatikizya nyika? Ino Bwami bwa Leza ninzi? Mbuti mbomunga mwacijana cikombelo cini-cini? Nokuba kuti broshuwa iiyisya kasimpe munzila nguba-uba, mulumbe wanjiyo mubotu kapati. Ijatikizya twaambo tupati-pati twalo baalu ntobayooindulula abasikubbapatizigwa alimwi ibeleka mbuli cibelesyo cakusaanguna kamutana njila muciiyo cini-cini mubbuku lya Luzibo.
16 Ikulomba kuti mutalike kwiiya a muntu ciindi mwapilukila mulakonzya kwaamba kuti: “Sena mulizi kuti ikutola buyo maminiti masyoonto mulakonzya kujana bwiinguzi bwamubuzyo wa Bbaibbele mupati?” Mpoona amubuzye mubuzyo uuli kumatalikilo aaciiyo cimwi mubroshuwa. Mucikonzyanyo kuti naa mwaswaya muntu uucembeede mulakonzya kwaamba kuti: “Tulizi kuti kaindi Jesu wakali kuponya bantu. Pele ncinzi Jesu ncayoocita kumbele kubantu baciswa? ibacembeede? ibafwide?” Kwiingula kujanwa muciiyo 5. Imuntu uukomba ulakonzya kukkomanina mubuzyo wakuti: “Sena Leza ulaiteelela mipailo yoonse?” Ulaingulwa muciiyo 7. Ibanamukwasyi inga bayanda kuziba kuti: “Ino Leza uyanda nzi kubazyali akubana?” Inga bakujana kwiingula bayiya ciiyo 8. Imibuzyo imwi njakuti: “Sena bafwide balakonzya kucisa baumi?” uupanduludwe muciiyo 11; “Nkaambo nzi ncokuli zikombelo zinji boobu izilitaminina kuba zya Bunakristo?” ulabandikwa muciiyo 13; alimwi awakuti “Ninzi ncomweelede kucita kutegwa mube balongwe ba Leza?” uujanika muciiyo 16.
17 Amubagwasye Aabo Babelesya Mulaka Umbi: Ino mbuti kumakani aabasiŋanda babelesya mulaka umbi? Kuti kacikonzyeka, beelede kuyiisigwa mumulaka ngobazi kabotu. (1 Kor. 14:9) Mulangizi wabbazu ulakonzya kupa mbungano imwi aimwi mulongo wambungano zyamilaka iimbi mubusena obo. Kwiinda mukulanga-langa mulongo oyu, imulembi uuyookonzya kutuma mafoomu aategwa Follow-Up Slips (S-70) aali oonse ngatambula kuzwa kuli basimbungano kumbungano zibelesya mulaka oyo. Aaya taelede kutumwa ku Sosaiti. Ikuti kakunyina mbungano aafwaafwi alimwi kakunyina basikumwaya banyenzi bakonzya kwaambaula mulaka ngwazi siŋanda, sikumwaya ulakonzya kusoleka kwiiya asiŋanda kubelesya broshuwa ya Ncayanda mumilaka yobilo.
18 Sikumwaya uubelesya mulaka wa Cingisi wakatalika ciiyo ca Bbaibbele kumwaalumi uubelesya mulaka waci Vietnamese alimwi akumukaintu wakwe uubelesya mulaka waci Thai. Imabbuku alimwi ama Bbaibbele aamu Cingisi, Vietnamese alimwi aci Thai akali kubelesyegwa muciiyo eci. Nokuba kuti kutamvwana mumilaka kwakaletede buyumuyumu kukusaanguna, sikumwaya wakalemba ategwa: “Ikuyaambele kwa [banabukwetene aba] munzila yakumuuya kwalibonya ndilyona. Babona mbokuyandika kutalika ikujanika kumiswaangano antoomwe abana babo bobilo alimwi balabala Bbaibbele mbuli mukwasyi lyoonse masiku. Imwanaabo musimbi wamyaka iili cisambomwi ulaa ciiyo cakwe ca Bbaibbele alikke.”
19 Iciindi nokuyiigwaa bantu babelesya mulaka umbi, amwaambaule cakutabinda, mabala kaazwa kabotu-kabotu alimwi amubelesye mabala mauba-uba. Nokuba boobo amuyeeye kuti bantu babelesya mulaka umbi beelede kupegwa bulemu. Tabeelede kucitwa mbuli kuti mbana basyoonto.
20 Amuzibelesye kabotu zifwanikiso zibotu izili mubroshuwa ya Ncayanda. Ikuti naa “cifwanikiso cileelene amajwi aali cuulu,” izifwanikiso zinji zili mubroshuwa ziyooamba makani manji kuli siŋanda. Amumulombe kubala magwalo mu Bbaibbele lyakwe. Ikuti naa ciiyo kacikonzya kucitwa aciindi umwi wamukwasyi uuzi mulaka wasikumwaya naliko kutegwa kapandulula, kakunyina akudooneka eco inga cagwasya kapati.—Amubone Mulimo Wesu Wabwami wa May 1984, peeji 8; October 1990, mapeeji 7-8.
21 Mutamuki Kucita Nyendo Zyakupilukila: Nciindi cilamfwu buti ncomweelede kulindila kamutana cita lweendo lwakupilukila? Basikumwaya bamwi balapilukila mbukwaindila buyo buzuba bomwe naa obilo kuzwa nobaswaya ciindi cakusaanguna. Bamwi balapilukila kwainda buyo ciindi mubuzuba mbubonya! Sena oko nkufwambaanisya? Kanjikanji basiŋanda inga tababoneki kutongooka pe. Ziindi zinji inga ngusikumwaya uupilukila weelede kutola ntaamu iiluzi antoomwe akuliyumya-yumya. Amulange-lange zyakuluula zitobela.
22 Bumwi buzuba sikumwaya wamyaka iili 13 wakali kubeleka mumulimo wakuŋanda aŋanda naakabona bamakaintu bobile kabeenda antoomwe. Kayeeyede kukulwaizigwa kwakukambaukila bantu kufwumbwa nkobakonzya kujanwa, wakaunka kuli bamakaintu aba mumugwagwa. Bakalitondezya kuyanda kuswiilila mulumbe wa Bwami elyo aumwi wakabweza bbuku lya Luzibo. Oyu mukwesu mwana-mwana wakabweza makkeyala aabo, wakapilukila nokwakainda mazuba obilo eelyo wakatalisya ziiyo zya Bbaibbele kuli boonse bobile.
23 Umwi mucizi ulibambila kupilukila nsondo iitobela. Pele kwainda buzuba naa obilo kuzwa kukuswaya kwakwe kwakusaanguna ulainda kuli siŋanda kumupa magazini muli makani ngobakabandika. Ulamwaambila siŋanda kuti: “Ndakabona cibalo eci elyo ndakayeeya kuti ambweni mulakonzya kuyanda kucibala. Tatukonzyi kubandika lino pele ndiyooboola mu Citatu kumazuba mbubona mbotwakamvwana. Sena eco ciindi cicili kabotu kulindinywe?”
24 Ikuti naa muntu watondezya kuyanda kwiiya kasimpe tulakonzya kuba masimpe kuti uyookazigwa munzila imwi. Ikupilukila kwesu cakufwambaana kuzwa notwaswaya ciindi cakusaanguna kuyoomuyumya ikukonzya buyumuyumu boonse mbwanga waba ambubo kuzwa kubasazinyina, balongwe akuli bambi buyo.
25 Amucite Kuti Bayande Kuswiilila Aabo Bajanika Mumasena Aabuleya: Bunji bwesu tulakkomana kukambauka mumigwagwa, musiigwa myootokala, muzyeenzya zyabuleya, mumantoolo, mumapaaki amumwi-mumwi. Kunze lyakumwaya mabbuku tweelede kucita kuti bantu bayande kuswiilila. Akaambo kaboobo tweelede kusoleka kubweza zina, kkeyala alimwi kuti kacikonzyeka namba ya fooni yamuntu oonse ngutuswaanganya uutondezya kuyanda kuswiilila. Tacikatazi mbuli mbomunga mwayeeyela ikubweza zintu ezi. Mubandi wenu watandila kusika kumamanino, amubweze kabbuku kanu akubuzya kuti: “Sena kuli nzila imwi njotunga twazumanana mubandi wesu ciindi cimbi?” Naa kwaamba kuti: “Ndiyanda kuti mukabale cibalo cimwi ncendisyoma kuti ciyoomukonda. Sena inga ndamuletela kuŋanda yanu naa kuopesi?” Umwi mukwesu ubuzya buyo kuti: “Mujanwa kunamba nzi yafooni?” Ulaluula ategwa mumyezi yotatwe boonse kuleka buyo bantu botatwe bakakkomana kumupa manamba aabo aafooni.
26 Amubelesye Fooni Kujana Akucita Kuti Muntu Ayande Kuswiilila: Umwi mucizi painiya ubelesya fooni kwaambaula aabantu bakkala mumaanda aakwabililwa kapati. Ulacita nyendo zyakupilukila munzila njiyona eyi. Mulweendo lwakusaanguna ulaamba: “Ndilizi kuti tamundizi pe. Ndisoleka kwaambaula aabantu bali mubusena bwanu akubandika kaambo kuzwa mu Bbaibbele. Ikuti kamujisi ciindi, ndiyanda kumubalila cisyomezyo cili ku . . .” Amana kubala lugwalo ulaamba: “Sena inga taciboti kucibona caboola ciindi eco? Ndakkomana kumubalila makani aaya. Ikuti naa mwakkomana andinywe, inga ndatuma alimwi akubandika lugwalo lumbi.”
27 Atuma fooni alimwi ulamuyeezya siŋanda mubandi ngobakajisi ciindi cakamana akwaamba kuti uyanda kubala kuzwa mu Bbaibbele bukkale mbobuyooba ciindi bubi boonse bwaakuzwisigwa. Mpoona ulabandika asiŋanda cakukosaula-kosaula kuzwa mu Bbaibbele. Muciindi naakali kubandika kwiinda mufooni, bantu bali 35 bakamutamba kumaandaabo elyo wakatalisya ziiyo zya Bbaibbele zili ciloba! Sena cilamuyumina cimwi ciindi kucita nyendo zyakupilukila kubantu bayanda kuswiilila akaambo kakuciswa naa mapenzi amwi? Kuti kakuli boobo sena inga tamubandiki ambabo kwiinda mufooni?
28 Amupilukile Kuli Baabo Bayanda Kuswiilila Mumasena Aamakwebo: Nzinji zijatikizidwe mukubeleka kucintoolo acintoolo kunze lyakumwaya buyo mamagazini. Basizintoolo banji balijisi luyando lwini-lwini lwakwiiya kasimpe elyo kuyanda oko kweelede kukulwaizigwa. Zimwi ziindi cilakonzyeka ikubaa mubandi wa Bbaibbele naa ciiyo nkukwena kubusena oko. Kuziindi zimwi inywebo amuntu oyo uuyanda kwiiya mulakonzya kuswaangana ciindi nobalyookezya masikati naa aciindi cimbi cilikabotu.
29 Imulangizi weendeenda wakaswaya sikantoolo umwi akulomba kutondezya mbocicitwa ciiyo ca Bbaibbele. Naakabuzigwa kuti naa kutondezyegwa oko kulatola ciindi cilamfwu buti, mulangizi weendeenda wakaamba kuti kulatola buyo maminiti aali 15. Naakamvwa boobo sikantoolo wakabikka cikwankwani amulyango citi: “Ndilajoka mumaminiti aali 20,” wakakwela zyuuno zyobilo mpoona bakabandika mincali yosanwe yakusaanguna mubbuku lya Luzibo. Oyo muntu wamoyo mubotu wakakkomana kapati akaambo kazintu nzyaakayiya cakuti wakajanika ku Muswaangano Wabuleya alimwi a Ciiyo ca Ngazi Yamulindizi mu Nsondo alimwi wakazumina kuzumanana ciiyo ca Bbaibbele nsondo yakalikutobela.
30 Ikulomba kuti mutalike kwiiya amuntu uuli kubusena bwamakwebo, mulakonzya kwaamba boobu: “Iprogilamu yesu yaciiyo ca Bbaibbele itola buyo maminiti aali 15 kutondezya mboicitwa. Ikuti kacili kabotu inga ndakkomana kumutondezya mboicitwa.” Mpoonya amuleke aciindi mpomwamvwana. Ikuti kacitakonzyeki kubaa mubandi mulamfwu kubusena bwa makwebo inga cainda kugwasya ikuswaya sicintoolo kuŋanda yakwe.
31 Amupilukile Nokuba Kuti Taakwe Nomwakasiya Mabbuku: Kufwumbwa kuyanda kuswiilila kwatondezyegwa kuyandika kucitila lweendo lwakupilukila kufwumbwa naa kwakasiigwa mabbuku naa pe. Aino kuti naa casalala kuti siŋanda masimpe tayandi kuswiilila mulumbe wa Bwami, ncibotu kusoleka buyo kumbi.
32 Mumulimo waŋanda aŋanda mucizi umwi wakaswaanganya mukaintu wakali sibulongwe kapati pele wakaka kutambula mamagazini. Sikumwaya wakalemba kuti: “Kumana kwamazuba manji ndakali kumuyeeya elyo ndakayeeya kuti ndaambaule anguwe alimwi.” Limwi mucizi wakapaila, waliyumya-yumya akukonkomona amulyango wamukaintu oyu. Mucoolwe oyu siŋanda wakamwiitila mukati. Ciiyo ca Bbaibbele cakatalikwa elyo cakacitwa alimwi buzuba bwakatobela. Muciindi siŋanda wakaboola mukasimpe.
33 Amulibambile Ciindi Kaciciliko Kutegwa Muzwidilile: Cilakulwaizigwa kuti kweelede kuba ciindi nsondo ansondo cakucita nyendo zyakupilukila. Ikuti twalibambila kabotu nzinji zinga zyacitwa. Amulibambile kuswaya mubusena mumona momuyoobelekela kuŋanda aŋanda.
34 Aabo bazwidilila kucita nyendo zyakupilukila akutalika ziiyo zya Bbaibbele baamba kuti kulayandika kapati kutondezya luyandisisyo lwini-lwini mubantu akuzumanana kubayeeya nomuba muciindi katuzwide kale kukubaswaya. Alimwi cilayandika kubaa makani aa Bbaibbele aakubandika aakwelelezya akubikka ntalisyo yalweendo lwakupilukila kamutana zwa kukuswaya kwakusaanguna. Kunze lyaboobo kulayandika kupilukila kufwambaana oko kuli muntu uutondezya kuyanda kwiiya. Makanze aakutalika ziiyo zya Bbaibbele ayelede kuyeeyegwa lyoonse.
35 Ciimo ciyandika kapati mukuzwidilila kucita nyendo zyakupilukila nkuliyumya-yumya. Ino kujanwa buti? Imwaapostolo Paulo ulaingula akwaamba kuti ‘twakayuma-yuma’ kukambauka makani mabotu kuli bamwi kwiinda muli “Leza.” (1 Bate. 2:2, Ci) Kuti kamuyandika kukomena mulubazu olu amupaile kuli Jehova kutegwa amugwasye. Mpoona kweendelana amipailo yanu amupilukile moonse muli bantu bayanda kwiiya. Jehova uyoomulongezya ncobeni akaambo kakusoleka kwanu!
Kabbokesi kali apeeji 3]
Mbomunga Mwazwidilila Kucita Nyendo Zyakupilukila
■ Amutondezye kuti bantu mubalanganya ncobeni.
■ Amusale makani aakubandika aa Bbaibbele aakwelelezya.
■ Amubambe ntalisyo mbotu yakuswaya kumwi akumwi kutobela.
■ Amuzumanane kumuyeeya muntu oyu mwazwa.
■ Amupilukile kwainda buzuba naa obilo kuccilizya muntu uuyanda kwiiya.
■ Kamwaayeyeede makanze aanu aakutalika ciiyo ca Bbaibbele.
■ Amupaile kutegwa mugwasigwe kuliyumya-yumya mumulimo ooyu.