Ziiyo zya Bbaibbele Zinji—Zilayandika
1 Jehova Leza uli mukwiilongezya mbunga yakwe yaanyika akuvwula ikuyaambele lyoonse. Imwaka wamulimo wamana, ibantu ibali 375,923 bakabbapatizigwa nyika yoonse mbwiizulwa—imweelwe waakati-kati wabasikwiiya bapya ibainda ku 1,000 abuzuba naa ibatandila ku 43 muwoola lyomwe-lyomwe! Kunyina makani amapenzi ibakwesu ngobayaanaangawo mumasena aasiyene-siyene aamunyika mumakumi-makumi aamyaka aayinda, imulimo wa Bwami uyaambele alimwi kwaba ikuvwula kwaatala. Cilakkomanisya kaka ikubala zyakuyaambele ikuli mukucitwa mukumwaya makani mabotu!
2 Mumwaka wamulimo mwakali, aswebo mumutabi wa Zambia twakabaa myeelwe yaakati-kati iiyungizidwe yabasikumwaya abapainiya bakugwasilizya, mumawoola aakabelekwa mubukambausi, mumyeelwe yatubbuku, mabroshuwa alimwi amamagazini aakamwaigwa. Kwakali myeelwe yaatala yabantu bakajanika lya Ciibalusyo, myeelwe yaatala yanyendo zyakupilukila amumulimo waziiyo zya Bbaibbele. Iziiyo zya Bbaibbele zyakayungizigwaa 2 pasenti. Nokuba boobo, ibunji bwabasikwiiya Bbaibbele aba tabali mukuyaambele pe kuti beelele kubbapatizigwa. Kakuli iziiyo zya Bbaibbele izyakacitwa zyakali 110,960, ibantu ibali buyo 5,281 mbobakabbapatizigwa.
3 Amukulwaizye Luyandisisyo Lwakucitya Ciiyo: Swebo tobeni tuyandika kugamika mizeezo yesu aakuzumanana katuli bayumu alimwi ibankutwe munzila yakumuuya. Basikutobela ba Kristo bakasimpe ‘balalisanga kumana milimo mibotu.’ (Tit. 2:14) Iciindi notulanga-langa mulimo wesu, sena tujana kuti lyoonse tulakulwaizigwa cabunkutwe kupilukila kuli baabo mbotwakasiila mabbuku mumuunda? Sena lyoonse tulabikkila maanu kutalisya ziiyo zya Bbaibbele zyaaŋanda kubantu boonse batondezya luyandisisyo? (Rom. 12:11) Naa ambweni sena tuyandika kuyungizya luyandisisyo lwesu lwakucita nyendo zyakupilukila alimwi akutalisya ziiyo zya Bbaibbele zyaaŋanda?
4 Ikubala Bbaibbele tobeni, ikujanika lyoonse aamiswaangano alimwi akubala mabbuku aambi kuyootugwasya kupakamana akuyumizigwaa muuya wa Leza lyoonse munzila yakumuuya. (Ef. 3:16-19) Eci ciyooyumya lusyomo lwesu muli Jehova alimwi luyando lwesu kubantuma luyoovwula. Tuyookulwaizigwa kuyiisya kasimpe kumuntu umbi, elyo kwiinda mukucita boobo mulimo wesu unookkomanisya, uyoozwidilila alimwi unookkazika moyo. Inzya, tuyandika kubaa ziiyo zya Bbaibbele zinji!
5 Amusaangune Kwiiyaa Mukwasyi: Ibazyali Banakristo ibajisi bana mbobakkala limwi beelede kwiibikkila maanu ipulogilamu yabo yaciiyo ca Bbaibbele camukwasyi calyoonse. (Dt. 31:12; Int. 148:12, 13; Tus. 22:6) Inga cagwasya kapati ikuti naa bazyali baiya broshuwa ya Ncayanda mpoonya abbuku lya Luzibo abana babo ikutegwa beelele kuba basikumwaya batabbapatizidwe alimwi akweelela kulyaaba akubbapatizigwa. Aino, imakani aambi alakonzya kubandikwa kweelana azintu ziyandika aciindi eco alimwi aciimo camwana. Imuzyali uuyiyaa mwanaakwe uutanabbapatizigwa ulakonzya kucibala ciiyo, ciindi alimwi anyendo zyakupilukila mumulimo wakwe wamumuunda mbubwenya mbokulailidwe mu Kabbokesi Kamubuzyo kamu Mulimo Wesu Wabwami wa April 1987.
6 Amuyaambele Mukulibambila Kwanu Nobeni: Twalanga myeelwe yamamagazini, mabroshuwa alimwi amabbuku aamwaigwa, tatudooneki kuti imbuto zinji kapati zili mukumwaigwa. Imbuto ezi zyakasimpe izyabyalwa zitondezya kuti bantu banji balakonzya kusikilwa akuba basikwiiya bapya. Pele sena mulimi inga unookkomene na ikuti lyoonse kaile kubyala buyo kakunyina kubikkila maanu kuti nzyalima zikomene akubizwa? Peepe. Mbubonya obo imulimo wakupilukila nkotwakabyala ulayandika.
7 Sena lyoonse mulabikka ambali ciindi cakucita nyendo zyakupilukila? Amupilukile cakufwambaana kubantu bakatondezya luyandisisyo. Amucite nyendo zyakupilukila kamujisi mbaakani yakutalisya ciiyo ca Bbaibbele. Sena nyendo zyakupilukila zyoonse mulazilemba kabotu akuzibamba kabotu akutondezya kabotu-kabotu nkomwakapilukila kale ankomutanasika? Mpomulemba zina lyamukamwini ŋanda, amubone kwaamba kuti mwalemba deeti nomwakasaanguna kumusikila, izyakasiigwa, bupanduluzi mubufwaafwi bwazintu zyakabandikwa alimwi akaambo ikanga kayoobandikwa mwaakupilukila. Amusiye busena aakulembela makani aambi mwamana kucita lweendo lwakupilukila lomwe-lomwe.
8 Amuyeeye Mbomunga Mwacita Lweendo Lwakupilukila: Ntwaambo nzi tumwi ntomweelede kubikkila maanu nomucita lweendo lwakupilukila kumuntu wakatondezya luyandisisyo? (1) Amusangaalizye, amuseke-seke, amutondezye busungu alimwi amukanane cabulongwe. (2) Amubandike makani naa mibuzyo njakkomanina. (3) Mubandi amuubye-ubye alimwi kaujatikizya Magwalo. (4) Alweendo lumwi alumwi, amusoleke kuyiisya mukamwini ŋanda cintu cimwi ncayoobona kuti inga camugwasya. (5) Amubusye luyandisisyo mumakani aayoobandikwa mulweendo lutobela. (6) Mutatoli ciindi cilamfwu kapati pe. (7) Mutabuzyi mibuzyo iinga yatyompya mukamwini ŋanda naa iikonzya kumunyemya. (8) Amubelesye bupampu, mutabukaa kukazya mizeezo iilubide naa iziyanza zyamukamwini ŋanda kuti katanasima kabotu muzintu zyakumuuya nzyomumuyiisya.—Kuti kamuyanda makani aambi aakonzya kumugwasya mbomunga mwazwidilila kucita nyendo zyakupilukila alimwi akutalisya ziiyo zya Bbaibbele, amubone pepa lyamukati mu Mulimo Wesu Wabwami wamu May 1997.
9 Amuzisole Nzila Zyoonse: Mumbungano imwi, cakakonzyeka kujana mazina aabantu boonse bakkala mubusena bumwi bwatakali kuzumigwa kunjila cinjile-njile, alimwi amanamba aaŋanda zyabo oonse akazyibwa. Imagwalo akalembwa kumuntu amuntu wakali kukkala mubusena obo alimwi imatulakiti obile akabikkilizigwa. Kumamanino aalugwalo alumwi, kwakakulwaizigwa ciiyo ca Bbaibbele caaŋanda alimwi kwakabikkwaa anamba yaluwaile inyenzi ikutegwa sikutambula lugwalo aumwi aingule naa kakonzya. Nokwakainda mazuba masyoonto buyo, imukubusi umwi wakaumya luwaile kalomba ciiyo. Ilweendo lwakupilukila lwakacitwa buzuba bwakatobela, aboobo iciiyo cakatalisigwa mubbuku lya Luzibo. Ibuzuba obo mboonya imangolezya wakajanika ku Ciiyo Cabbuku Cambungano, alimwi wakazumanana kujanika lyoonse amiswaangano yoonse. Ndilyonya, wakatalika kubala Bbaibbele abuzuba alimwi wakayaambele akweelela kubbapatizigwa.
10 Ikakamu kabasikumwaya kamwi kakacita bubambe bwakucita nyendo zyakupilukila caantoomwe. Imucizi umwi naakasika aŋanda imwi mpaakali kuya, imuntu ngwaakali kuyanda tanaakaliko pe, pele mukaintu umbi uucili mwana-mwana wakaingula, akwaamba kuti: “Ndali kulindila ndinywe buya.” Muntu oyu musyule wakatambwide bbuku lya Luzibo kuzwa kumuntu ngocizyibene limwi. Iciindi bacizi aba nobakamuswaya, wakalilibalide kale bbuku lyoonse mbolibede ziindi zyobile alimwi wakaakkomanina makani ngolijisi. Wakati kwiina naakagambwa kuti Bakamboni bakamuswaya buzuba obo nkaambo wakali kupailila kuti bamuswaye akwiiya Bbaibbele anguwe. Ciiyo cakatalisigwa, wakatalika kujanika amiswaangano yambungano alimwi wakayaambele cakufwaambana.
11 Calino-lino mucizi umwi iwakabbapatizigwa myaka iitandila ku 25 yainda, wakapa banyina ibbuku lya Luzibo. Banyina ibankamu yabukombi imwi, bakatalika kulibala bbuku eli. Nobakamanizya kubala zibalo zyobile, bakaita mwanaabo musimbi akumwaambila cintu ncaatakali kulangila icakamugambya, bakati: “Ndiyanda kuba umwi wa Bakamboni ba Jehova!” Bakatalika kwiiya elyo ono balibbapatizidwe.
12 Amuzisole Nzila Ezi: Sena kuli nomwakasolede kuzigama buya kuzilomba nomuyanda kutalisya ziiyo? Mulakonzya kwiile kwaamba kuti: “Ikuti kamuyanda kubaa ciiyo ca Bbaibbele caaŋanda citabbadelwi, ndilakonzya kumutondezya mumaminiti masyoonto buyo mbocicitwa. Ikuti mucikkomanine, mulakonzya kuzumanana.” Ibantu banji kwiina nobeenkeenka kuzumina ciiyo munzila eyi alimwi balabikkila maanu mucitondezyo caciiyo ca Bbaibbele.
13 Mbomwatalikila buyo kwiiya, amumutondezye sikwiiya mbokulibambilwa kacitanasika ciindi cakwiiya kwiinda mukubala zibalo zyamagwalo zyaambidwe buyo alimwi akweenga mabala aalaa twaambo twiingula mibuzyo iisimbidwe. Amukankaizye buyo twaambo tupati-pati. Nokuba kuti kwiiya kuciindi cakumatalikilo inga takunooli kwalyoonse, cilayandika kapati kuti ciiyo ca Bbaibbele kacicitwa lyoonse. Amuyeeye mbuli mbomuyootalisya mupailo kutondezya kuti ncintu ciyandika caciiyo alimwi ambomuyoomugwasya sikwiiya kwiinda mu Magwalo ikulibambila kukazigwa. Lyoonse amucitye ciiyo kuba cintu cikondelezya!
14 Aino, basikwiiya Bbaibbele balindeene mbobayaambele. Bamwi tababikkili maanu kapati kuzintu zyakumuuya mbuli bamwi alimwi bamwi balamuka ikumvwisya zintu zili mukuyiigwa. Bamwi lyoonse bajata bubi eelyo inga kabatakonzyi kucimanizya cibalo coonse mbocibede ansondo muciindi ciyandika. Aboobo, zimwi ziindi inga cayandika kutola ciindi kumana ciiyo comwe alimwi myeezi iimbi inga yayandika kutegwa limanizyigwe bbuku lyoonse. Ziindi zimwi tulakonzya kusaanguna kwiiya broshuwa ya Ncayanda mpoonya akunjila mubbuku lya Luzibo. Kucita boobo, kubikkilizyaa kujanika kwabo amiswaangano yambungano kuyoogwasya sikwiiya omwe-omwe ikuyuma mukasimpe.
15 Kunze lyazyeezi zyoonse, amupailile kujana ciiyo ca Bbaibbele! (1 Joh. 3:22) Akati kazintu zilaampindu kapati mubuumi bwa Munakristo nkubelesyegwaa Jehova mukugwasya muntu umwi kuba sikwiiya wa Jesu Kristo. (Inc. 20:35; 1 Kor. 3:6-9; 1 Tes. 2:8) Ono nceciindi cakubutondezya kapati busungu mumulimo wakujana ziiyo zya Bbaibbele, kumwi katusyomede kuti Jehova uyootulongezya notusoleka kutalisya ziiyo zimbi!
Cifwanikiso icili apeeji 3]
Sena mulakupailila ikutalisya ciiyo ca Bbaibbele icipya?