Kulibambila—Nzila Iipa Kuzwidilila Mukupilukila
1. Ino muunzila nzi mulimo wa Bunakristo mbowakali kuyookomena?
1 Jesu wakabayiisya kabotu-kabotu basikumutobela kutegwa babe bakambausi “[ba]makani mabotu aa-Bwami” bazwidilila. (Mt. 4:23; 9:35) Jesu wakabayiisya ciindi naakali kukambaukila buyo ku Palesitaini. Nokuba boobo, katanaunka kujulu, Jesu wakacisalazya kuti mulimo wa Bunakristo wakali kuyookomena kutegwa ‘bayiisye bantu bamisyobo yoonse.’—Mt. 28:19, 20.
2. Ino ncinzi cibikkilizyidwe mukutobela malailile ngaakapa Jesu aakugwasya bantu kuba basikwiiya?
2 Mulimo ooyo wakali kuyoobikkilizya kupilukila kubantu aabo bakatondezya luyandisyo kumakani mabotu aa Bwami bwa Leza alimwi akubayiisya kuti bajatisye makani oonse ngaakalailila Kristo. Kutegwa tuzwidilile mukupilukila, tweelede kulibambila kabotu.
3. Nomuba mukuswaya kwakusaanguna, ino mbuti mbomukonzya kupa kuti kube nzila yakuyoopilukila?
3 Amulibambile Kakucili Ciindi: Basikumwaya bamwi balasoleka kubuzya mubuzyo kumamanino aamubandi mukuswaya kwakusaanguna alimwi mpoonya basyomezya kuyoopilukila kuti bakaingule. Bacibona kuti kubandika twaambo tuli mubbuku lya Bbaibbele Ncoliyiisya ciindi nobapilukila cilabagwasya kutalisya ciiyo ca Bbaibbele mpoonya aawo.
4. Ino nkaambo nzi ncotuteelede kulindila kuti mane tukatambule mamagazini mapya ndeliya tukapilukile?
4 Kuba amamagazini obile amwezi tacaambi kuti tweelede kulindila kuti mane tukatambule mamagazini mapya ndeliya tukapilukile. Inga cakonzyeka kupa kuti muntu abe aluyandisisyo kwiinda mukubandika twaambo twaambidwe mumagazini njajisi kale.
5. Ino cigwasya buti kuba amakanze ciindi nomupilukila?
5 Amube Amakanze: Kamutana kupilukila, amulange-lange kwamaminiti masyoonto twaambo ntomwakalemba tujatikizya bantu nkomupilukila alimwi amubone ncomuyanda kuya kucita. Mucikozyanyo, amubandike kaambo komwe kali mubbuku naa magazini njomwakasiya. Ambweni amusiye bbuku alimbi libandika kaambo nkomwakabandika. Ikuti naa mwakabuzya mubuzyo, makanze aanu inga aba aakuyanda kuwiingula mubuzyo ooyo. Ciindi nomupandulula lugwalo lukankaizya kaambo nkomubandika, amusoleke kubala cacigaminina kuzwa mu Bbaibbele.
6. Ino makanze nzi ngotujisi ciindi notupilukila?
6 Makanze Eesu: Masimpe, makanze eesu ngakutalisya ciiyo ca Bbaibbele. Umwi mukwesu wakayanda kutalisya ciiyo ca Bbaibbele ciindi naakapilukila kumulombwana umwi, pele mulombwana ooyo wakakaka. Mukwesu wakapilukila alimwi kajisi mamagazini mapya akwaamba kuti: “Ncondalonda sunu nkuzooyingula mubuzyo omwe wamu Bbaibbele wakatazya bantu mazuba aano.” Naakamana kuswiilila ncaakaamba mulombwana ooyu, mukwesu wakabala lugwalo alimwi amuncali uujatikizya kaambo aako uuli mubbuku libelesyegwa kweendelezya ziiyo zya Bbaibbele. Eeci cakasololela kukutalisya ciiyo ca Bbaibbele cicitwa lyoonse.
7. Ino mbuti kuba bantu balibambilide kabotu mbokwamugwasya mukutalisya ciiyo ca Bbaibbele?
7 Cilagwasya kapati kujana ciindi cakulibambila kupilukila. Tuyookkomana kapati, alimwi tuyooba acoolwe cakugwasya muntu ‘uusalidwe buumi butamani’ kunjila mumugwagwa uutola kubuumi.—Inc. 13:48.