Kugwasya ‘Baabo Basalidwe’
1. Ino mbaani Jehova mbali bunganyizizya muciindi cesu?
1 Imuntu amuntu ulijisi bube mumoyo wacikonzyanyo. (Mt. 12:35) Ibbaibbele lyaamba muntu uujisi ‘moyo wakuyanda inkondo.’ (Int. 55:21) Bamwi ‘mbakali.’ (Tus. 29:22) Pele kuli baabo “basalidwe buumi butamani.” (Inc. 13:48) Muciindi cesu Jehova ulalibunganyizizya aabo basalidwe buumi. (Hag. 2:7) Ino mbuti mbotukonzya kubagwasya kuti babe bakombi ba Jehova?
2. Ino ncinzi cijatikizyidwe mukuzuzikizya mulimo wesu wakugwasya bantu kuba basikwiiya?
2 Kamubikkila Maanu Mukupilukila: Ikukulanga munzila yeelede ikucita nyendo zyakupilukila kulayandika kutegwa tuzuzikizye mulimo wakuyiisya bantu. (Mt. 28:19, 20) Sena tulafwambaana ikupilukila notujana bantu batondezya luyandisisyo? Sena tulapilukila kuli baabo boonse mbotusiila mabbuku naa aabo batondezya luyandisisyo mumakani mabotu? Sena tulazumanana kubagwasya kuti baye ambele kumuuya? Mbwaanga bantu balijatikizyidwe, tweelede kusolekesya ikubagwasya akaambo kaluyandisisyo ndobatondezya.
3. Ino ncinzi ncotukonzya kucita twamana kubandika amuntu ngutwajana mumulimo?
3 Nomuciyeeyede zyomwali kubandika amuntu ooyo watondezya luyandisisyo, amulembe zina lwakwe alimwi akkeyala. Amulembe mutwe wamakani ngomwali kubandika, imagwalo ngomwabala alimwi abbuku ndimwamusiila. Aboobo, amube amakanze aakupilukila cakufwambaana.
4. Ino mbuti mbomukonzya kucita nyendo zyakupilukila zigwasya?
4 Mbotukonzya Kucita Nyendo Zyakupilukila: Nomupilukila, cilagwasya kuba muntu uusangalizya, mulongwe akutondezya kuti mulabayanda bamukamwiniŋanda. Mubandi wanu weelede kuti kaulimvwisya alimwi kauzwa mu Magwalo. Amulibambile mubandi uuzwa mu Bbaibbele uukkomanisya ngomuya kubandika, mwaakumaninzya mukabuzye mubuzyo walo uuya kwiingulwa mwaakumuswaya alimwi. Taciyandiki kubandika twaambo tukonzya kumupa kutalika kukazyanya itutali twamumagwalo twakonzya kuleta mukamwiniŋanda. Amusole kubandika twaambo tomukonzya kuzuminizyanya moonse.—Kol. 4:6.
5. Ino mupainiya umwi wakasoleka buti canguzu, alimwi mbubotu nzi mbwaakajana?
5 Ikucita nyendo zyakupilukila kuyandika kusolekesya, pele bulumbu bujanwa bulakkazika moyo. Imupainiya waku Japan wakabikka mbaakani yakucita nyendo zyakupilukila amwezi. Wakatalika kuyobola mazina aabaabo mbaakali kujana mumulimo wakuŋanda aŋanda alimwi wakali kupilukila munsondo njiyona. Wakali kulibambila kabotu zyakuya kwaamba alimwi akuubeleka mulimo wakwe kajisi lusyomo mumulumbe ngwaakali kwaambilizya. Naakapilukila wakakonzya kutalisya ciiyo amuntu umwi wakamwaambila kuti: “Ndakali kukaka lyoonse kubandika andinywe. Nciindi cakutaanguna sunu kumuswiilila.” Ikuzumanana kwamupainiya ooyu akaambo kaluyando, kwakagwasya. Nowakamana mwezi wakalipoota ziiyo zya Bbaibbele zili kkumi.
6. Nkaambo nzi ncotweelede kuzumanana kucita nyendo zyakupilukila?
6 Ibukkale bwabantu bulacinca-cinca lyoonse. (1 Kor. 7:31) Kulayandika kusoleka ziindi zinji kutegwa mumujane aŋanda muntu uulaa luyandisisyo lwakwiiya. Kwiinda mukubikkila maano mukupilukila, tulakozya kugwasya baabo basalidwe kuba munzila iisololela kubuumi butamani.—Mt. 7:13, 14.