Nyendo Zyakupilukila Zisololela Kuziiyo zya Bbaibbele
1. Nkaambo nzi nyendo zyakupilukila ncozyiyandika kapati?
1 Jesu wakalailila basikumutobela kuti kabatakambauki buyo, pele ‘akugwasya bantu kuba basikwiiya akubayiisya.’ (Mt. 28:19, 20) Imukambausi ulakambauka, pele mwiiyi ulacita kwiinda waawo. Ulayiisya, ulapandulula alimwi akupa bumboni. Inzila iimwi mbotuyiisya bantu bajisi luyandisisyo, nkwiinda mukucita nyendo zyakupilukila katujisi makanze aakutalisya ziiyo zya Bbaibbele zyaaŋanda.
2. Ino nkuuli bani nkotweelede kupilukila?
2 Ino nkuuli bani nkotweelede kupilukila? Amubone kuti mwapilukila kuli baabo boonse batambula mabbuku naa aabo batondezya luyandisisyo noluceya mumakani mabotu. Ikuti mwajana bantu batondezya luyandisisyo nomupa bumboni kubuleya, amusoleke kubweza makkeyala naa namba yaluwaile ikutegwa mubusye luyandisisyo. Imbaakani yanu aibe yakutalisya zyiiyo zya Bbaibbele. Amuzumanane kuyandaula baabo ibayanda kwiiya Bbaibbele, alimwi mulalangilwa kubajana.—Mt. 10:11.
3, 4. Ino ncinzi cibikkilizyidwe mukucita nyendo zyakupilukila zili ampindu?
3 Amubabikkile Maano: Ikulibambila nyendo zyakupilukila zili ampindu, kulakonzya kucitwa mulweendo lwakusaanguna. Ibakambausi bacibwene kumutwe balazyibikkila maano basiŋanda zyobayandisisya, eelyo balazibelesya ikutalisya mibandi. Ibamwi bacibona kuti cilagwasya ikubuzya mubuzyo kumamanino ikutegwa babusye luyandisisyo lwasiŋanda lwakuyooswiilila mukuswaya kutobela. Akaambo kakubabikkila maano bantu, tulabayeeya nociba ciindi notwazwa aŋanda yabo, calo citupa kupilukila cakufwambaana. Ikuti kacikonzyeka, amupilukile iluyandisisyo noluciliko, ambweni kwainda buzuba bomwe naa obilo.
4 Nomucita nyendo zyakupilukila, amutalikile waawo mpomwakaulekela mubandi wanu. Aabe makanze aanu kubabalila Lugwalo lomwe lujisi kaambo kakulwaizya nomubaswaya, alimwi amube bantu balibambide kuswiilila. Amumuzyibe kabotu siŋanda. Aboobo mukuswaya kwenu kutobela, amumwaambile kasimpe kuzwa mu Jwi lya Leza ikaamba nzyalibilika.
5. Ino ninzila nzi iitakatazyi njomunga mwabelesya ikutalika ziiyo zya Bbaibbele?
5 Amube Bankutwe Kukutalisya Ciiyo ca Bbaibbele: Amucite nyendo zyakupilukila kamujisi makanze aakutalisya ciiyo ca Bbaibbele. Ino eeci inga cacitwa buti? Amwaambe kuti muyanda kumwaambila kaambo kapati, mpoona amuvwunune bbuku lya Luzibo naa lya Ncayanda akusala muncali ngomuyeeya kuti ulakonzya kumukkomanisya muntu ooyo. Amubale muncali, mubuzye mubuzyo alimwi amukanane kujatikizya lugwalo lomwe naa obilo aayo aatazubuludwe. Eeci cilakonzya kucitwa mpoona amulyango mumaminiti aali musanu kusikila kukkumi. Amumanizye kwiinda mukubuzya mubuzyo kuzwa mulugwalo akubamba bubambe bwakuti muyoozumanana amubandi wanu ciindi ciboola.
6. Mbuti mbotukonzya kutondezya kuti tulamvwisya mbokuyandika kucita nyendo zyakupilukila?
6 Ikuyungizya luyandisisyo lwabaabo mbotujana mumulimo, ncintu ciyandika kapati. Aboobo, amubikke ciindi ambali mumulongo wanu wazintu zyomucita amvwiki kutegwa mucite nyendo zyakupilukila. Ikucita boobo kuyoomupa kubeleka kabotu mumulimo alimwi kuyoomuletela lukkomano lwini-lwini.