Ikulanga-Langa Kuyaambele Kwamulimo Uubindeene Wakugwasya Bantu Kuba Basikwiiya
1 Katanaunka kujulu Jesu, wakalailila basikumutobela kuyiisya bantu “bamisyobo yoonse.” Ikutegwa eci cikonzeke, bakeelede kubeleka canguzu mumulimo wakukambauka akuyiisya akuucita mulimo oyu nyika yoonse mboizulwa. (Mt. 28:19, 20; Inc. 1:8) Sena oyu mulimo bakali kuubona kuti ulaminya? Mwaapostolo Johane taakali kuyeeya boobo pe. Naakabeleka kwamyaka ili 65 mumulimo wakugwasya bantu kuba basikwiiya, wakalemba kuti: “Oku nkokuyanda Leza, kuti twabamba milazyo yakwe, alimwi milazyo yakwe tiili miyumu.”—1 Joh. 5:3.
2 Makani aamu Magwalo aajatikizya mulimo wa Banakristo bakusaanguna asinizya kuti bakabeleka cakubindaana mumulimo wabo wakugwasya bantu kuba basikwiiya ba Jesu Kristo. (2 Tim. 4:1, 2) Eci teebakacicitila kwiinzya buyo mulawo, bakacicita akaambo kakuyandisya kutembaula Leza akugwasya bantu kubaa bulangizi bwalufwutuko. (Inc. 13:47-49) Akaambo kakuti aabo bakaba basikwiiya abalo bakatalika kugwasya beenzinyina kuba basikwiiya, imbungano ya Bunakristo yakakomena cakufwambaana mumwaanda wamyaka wakusaanguna.—Inc. 5:14; 6:7; 16:5.
3 Mulimo Wakugwasya Bantu Kuba Basikwiiya Uli Mukucitwa Cakufwambaana: Mulimo mupati uutanacitidwe wakugwasya bantu kuba basikwiiya uli mukucitwa mumwaanda uno wamyaka wa 20! Kusikila sunu, tuulunzuma twabantu twaamvwa makani mabotu akubweza ntaamu. (Lk. 8:15) Mbwaanga ciindi canyika eyi ciyabumana, muzike musyomesi uucenjede watupa zibelesyo zipa kuti bantu babombe myoyo baiye kasimpe cakufwambaana.—Mt. 24:45.
4 Mu 1995 twakatambula bbuku lyakuti Luzibo Lutola Kubuumi Butamani, mpoonya mu 1996 kwakazwa broshuwa yakuti Ncinzi Leza Ncayanda Kulindiswe? Ikujatikizya bbuku lya Luzibo, Ngazi Yamulindizi ya Chichewa yamu January 15 1996, apeeji 14 yakati: “Eeli bbuku lyamapeeji aali 192 inga lyayiigwa mukaindi kasyoonto buyo, elyo aabo basalilidwe buumi butamani baleelede kujana luzibo lunji mubbuku eli cakuti balyaabe kuli Jehova akubbapatizigwa.”—Inc. 13:48.
5 Ipepa lyamukati lya Mulimo Wesu Wabwami wa June 1996 ilyakajisi mutwe wakuti “Mbobagwasyigwa Bantu Kuba Basikwiiya Abbuku lya Luzibo,” lyakatupa mbaakani eyi: “Ikweelana aciimo alimwi akuteelela kwasikwiiya, inga mwakonzya kumanizya zibalo zinji muciiyo comwe citola woola lyomwe kakunyina kubindaana. Basikwiiya balayaambele kuti naa mwiiyi alimwi asikwiiya kabatalovwi-lovwi kuciiyo mvwiki amvwiki.” Icibalo cakazumanana kuti: “Icintu ceelede kulangilwa ncakuti muntu aamanizya kwiiya bbuku lya Luzibo, weelede kulibonya kuti ulayanda cini-cini kubelekela Leza.” Mukabbokesi Kamubuzyo kamu Mulimo Wesu Wabwami wamu October 1996 kwakapandululwa kuti: “Mwiiyi uucizi kuyiisya ulalangilwa kugwasya sikwiiya uuli woonse kubweza ntaamu yakubelekela Jehova kwiinda muluzibo.”
6 Ibbuku lya Luzibo Lyagwasya: Umwi mukaintu mukubusi ciindi naakabbapatizigwa wakaamba mbuli mbwaakali kulimvwa kumakani aakwiiya bbuku lya Luzibo. Kwaciindi cili mbocibede wakali kwiiya bbuku lya Kupona Kukabe Kutamani. Iciindi nolyakazwa bbuku lya Luzibo, imucizi wakali kumuyiisya wakacinca bbuku lyakwiiya watalika kubelesya lipya. Teelyakalampa, sikwiiya wakabona kuti wakali kuyandika kubweza ntaamu, elyo cakamupa kuti aye ambele kuzwa ciindi eco. Ooyu mukaintu mukubusi, imucizi wesu ono waamba kuti: “Ibbuku lya Kupona Kukabe Kutamani lyakandigwasya kuyanda Jehova, pele bbuku lya Luzibo lyalo lyakandigwasya kubweza ntaamu yakumubelekela.”
7 Amubone buyo umbi mukaintu mbwaakafwambaana kwiiya kasimpe. Naakamanizya ciiyo cabili, wakajanika kumuswaangano wambungano ku Ŋanda ya Bwami ciindi naakaswaide mulangizi wabbazu. Eeyo nsondo ciindi naakali kwiiya ciindi catatu, wakamwaambila kuti wakalyaaba kuli Jehova, elyo wakali kuyanda kuba sikumwaya uutabbapatizidwe. Wakaswaangana abaalu bakazumina kuti abe sikumwaya, elyo nsondo yakatobela wakatalika kuya mumulimo wamumuunda. Wakabikkila maanu kapati muciiyo cakwe ca Bbaibbele cakuti wakalomba mazuba aakulyookezya kumulimo wakwe kutegwa kaiya ziindi zyobile naa zyotatwe ansondo akubeleka ciindi cilamfwu mumulimo wamumuunda. Cimwi ciindi bakali kumanizya zibalo zyobile naa zyotatwe nobakali kwiiya. Wakatalika kutobela zintu nzyaakali kwiiya mubukkale bwakwe boonse, wakalimanizya bbuku lya Luzibo munsondo zyone akubbapatizigwa!
8 Mulumi wamucizi umwi ulyaamba kuti wakali mulumi “uutasyomi cini-cini mumakani aa Leza.” Bumwi buzuba, mukwesu wakamulomba kuti atalike kumuyiisya Bbaibbele mubbuku lya Luzibo mucizuminano cakuti oyu mwaalumi ulakonzya kuleka kuti naa wayanda mbobatimanine buyo ciiyo comwe naa kufwumbwa ciindi kuzwawaawo. Oyu mwaalumi wakazumina kuti asole, nokuba kuti taakayiide kabotu kacili mukubusi alimwi taakabalide bbuku lili lyoonse lyaamba makani aa Leza kwamyaka iinda ku 20. Ino wakalimvwa buti kujatikizya kwiiya bbuku lya Luzibo? Wakati: “Cakali kukondelezya kubona kuti eeli bbuku ligwasya kwiiya Bbaibbele lyakalembwa munzila nguba-uba boobu. Makani akalembwa cakulondoka cakuti teelyakalampa ndakatalika kulangila ciiyo citobela caluyandisisyo lwini-lwini. Mwiiyi wangu wakaatobela kabotu malailile aa Sosaiti aambobagwasigwa bantu kuba basikwiiya, elyo kwiinda mulugwasyo lwamuuya wa Jehova, ndakabbapatizigwa nokwakainda myezi yone. Masimpe, inga ndaamba kuti, naa twabaa luyando lwakugwasya bantu kuba basikwiiya, twazumanana kuyandaula baabo balaa myoyo iiluzi mumulimo wamumuunda, twalibelesya kabotu bbuku lya Luzibo aambi mabbuku aagwasya kwiiya Bbaibbele aazwa ku Sosaiti, ikapati kuti naa twapailila kusololelwaa Jehova, tulabaa coolwe cini-cini cakugwasya bantu kuba basikwiiya.” Zyakuluula nzyotwabala atala awa tazicitiki-citiki. Ibunji bwabasikwiiya besu tababooli mukasimpe cakufwambaana boobu.
9 Basikwiiya Balaindana Munzila Njobaiya: Tweelede kuzumina kuti bamayi abasikwiiya ba Jwi lya Leza balaindana kapati kumaanu. Bamwi balakonzya kufwambaana kuyaambele munzila yakumuuya kakuli bamwi balamuka. Bamwi basikwiiya nzyobayiya mumyezi misyoonto inga zyabatolela kaindi bambi kwiiya. Iciindi ncatola muntu kuyaambele munzila yakumuuya ciya mbuli lwiiyo ndwajisi, luyandisisyo ndwajisi kuzintu zyakumuuya alimwi abusungu mbwajisi kubelekela Jehova. Tabali boonse bantu mbotuyiisya bayandisya kwiiya Magwalo lyoonse mbuli mbobakabede baku Bereya bansiku ibakasyoma.—Mili. 17:11, 12, Ci.
10 Nkakaambo kaako ipepa lyamukati lya Mulimo Wesu Wabwami lyamu August 1998 ilyakajisi mutwe wakuti, “Ziiyo zya Bbaibbele Zinji Zilayandika,” lilalailila munzila eyi: “Aino, basikwiiya Bbaibbele baliindene mbobayaambele. Bamwi tababikkili maanu kapati kuzintu zyakumuuya mbuli bamwi alimwi bamwi balamuka ikumvwisya zintu zili mukuyiigwa. Bamwi lyoonse bajata bubi eelyo inga kabatakonzyi kucimanizya cibalo coonse mbocibede ansondo muciindi ciyandika. Aboobo, zimwi ziindi inga kwayandika kutola ciindi kumana ciiyo comwe alimwi myeezi iimbi inga yayandika kutegwa limanizigwe bbuku lyoonse.”
11 Basikugwasya Bantu Kuba Basikwiiya Bazilanga Kabotu Zintu: Kulayandika kupima ciindi citolwa aciiyo kweelana aciimo alimwi amaanu asikwiiya. Mbwaanga tukulwaizigwa kutalisya ziiyo mubroshuwa ya Ncayanda, inga catola myezi yobile naa yotatwe kuti tulimanizye katutananjila mubbuku lya Luzibo. Ikuti naa twatobela mizeezo yoonse yakapegwa mupepa lyamukati lya Mulimo Wesu Wabwami lyamu June 1996, inga catola myezi iili cisambomwi kusikila kumyezi iili fwuka kumanizya bbuku lya Luzibo. Bamwi ibakatalika ciiyo mubbuku lya Luzibo bakacinca bakaya mubroshuwa ya Ncayanda kutegwa bagwasye sikwiiya ikwiiya njiisyo zyakasimpe zyantalisyo cakufwambaana. Mpoonya ciiyo mubbuku lya Luzibo cakatalisigwa alimwi. Ikuti naa ciiyo catalisigwa mubbuku lya Luzibo elyo cayaambele kabotu-kabotu, inga cagwasya kwiiya broshuwa ya Ncayanda nolyamanizigwa bbuku, eci inga capa kuti muliyeezye njiisyo zyakasimpe zya Jwi lya Leza. Nokuba boobo tatweelede kubinda kumana ciiyo kuti naa sikwiiya kakunyina ncamvwa. Sikwiiya umwi aumwi weelede kajisi luzibo lwini-lwini mulusyomo lwakwe lupya ndwaajana mu Jwi lya Leza.
12 Akaambo kaciindi ncotupona, tweelede kubeleka canguzu kwiinda mbotwali kucita lyoonse kuti tugwasye bamwi kwiiya kasimpe. Kunze lyakupailila kuti tutalisye ziiyo zimbi zya Bbaibbele, atupailile baabo bali mukwiiya kale andiswe. Aboobo tuyookkomana kuzumanana kugwasya basikwiiya banji kubbapatizigwa “mazuba oonse nikuba kusikila kumamanino aaciindi.”—Mt. 28:20.