“Ino Ndilakonzya Buti, Aatakwe Muntu Uunditondezya?”
1 Mukambausi Filipo naakabuzya mwaalumi muzibe waku Etiopiya naa wakali kuziteelela nzyaakali kubala kuzwa mu Jwi lya Leza, imwaalumi ooyo wakaingula kuti: “Ino ndilakonzya buti, aatakwe muntu uunditondezya?” Filipo cakukondwa wakamugwasya kumvwisya makani mabotu aa Jesu calo cakapa kuti mwaalumi ooyo abbapatizigwe ndilyonya eelyo. (Inc. 8:26-38) Filipo wakali kucita mulimo ngwaakapegwaa Kristo ‘wakuyiisya bantu bamisyobo yoonse akubabbapatizya.’—Mt. 28:19, 20.
2 Tweelede kuucita mulimo wakuyiisya bantu mbubwenya buyo mbuli mbwaakacita Filipo. Nokuba boobo, ibantu banji mbotwiiya limwi Bbaibbele tabatondezyi ikuyaambele munzila yakumuuya mbuli bwakacita mwaalumi muzibe waku Etiopiya. Mwaalumi ooyo sikusanduka kubukombi bwaba Juda wakalaazi kapati Magwalo. Akaambo kakuti wakalaa moyo mubombe wakayandika buyo kuzumina kuti Jesu ngowakali Mesiya wakasyomezyegwa. Ncintu ciyumu ikuti naa Bbaibbele kacili cintu ceenzu kuli baabo mbotwiiya limwi alimwi naa bakeenwa anjiisyo zyabukombi bwakubeja naa ikuti kabajisi mapenzi aakatazya kapati mubuumi bwabo. Ncinzi ncotweelede kucita ikutegwa tubagwasye basikwiiya Bbaibbele ikubasisya kukulyaaba alimwi akubbapatizigwa?
3 Amuzibe Mwayandika Lugwasyo Sikwiiya Bbaibbele Munzila Yakumuuya: Mupepa lyamukati lya Mulimo Wesu Wabwami wamu May 1999, kwakaambwa bulamfwu bwaciindi ncotweelede kwiiya abantu notubelesya broshuwa lya Ncayanda alimwi abbuku lya Luzibo. Lyakalailila kuti: “Kulayandika kupima ciindi citolwa aciiyo kweelana aciimo alimwi amaanu asikwiiya. . . . Tatweelede kubinda kumanizya ciiyo kuti naa sikwiiya kakunyina ncamvwa. Sikwiiya umwi aumwi weelede kajisi luzibo lwini-lwini mulusyomo lwakwe lupya ndwaajana mu Jwi lya Leza.” Aboobo, ncibotu ikutabinda nomwiiya bbuku lya Luzibo akaambo kakuyanda kuti mulimanizye bbuku mumyezi iili cisambomwi. Cilakonzya kutola myezi iinda kucisambomwi ikutegwa mubagwasye bantu bamwi kusikaa ciimo cakubbapatizigwa. Nomweendelezya ciiyo mvwiki amvwiki, amujane ciindi cakugwasya sikwiiya kumvwisya alimwi akuzuminizya nzyali mukwiiya kuzwa mu Jwi lya Leza. Zimwi ziindi, cilakonzya kutola mvwiki zyobilo naa zyotatwe ikwiiya cibalo comwe buyo mubbuku lya Luzibo. Eci ciyoomupa ciindi cakubala alimwi akupandulula magwalo manji aambidwe buyo.—Rom. 12:2.
4 Nokuba boobo, ino ncinzi ceelede kucitwa ikuti naa mwalimanizya bbuku lya Luzibo, pele mwabona kuti sikwiiya uyandika kuyungizya luzibo lwakwe naa tanasika aciimo cakwaaba buumi bwakwe kuli Leza kweelanaa kasimpe nkaakaiya? (1 Kor. 14:20) Ncinzi cimbi ncomukonzya kucita kutegwa mumugwasye kweenda munzila iisololela kubuumi?—Mt. 7:14.
5 Amumupe Lugwasyo Ndwayandika Sikwiiya Bbaibbele Munzila Yakumuuya: Ikuti naa muntu kaboneka kuti uli mukuyaambele, nokuba kuti ucita boobo bucebuce, akuti naa ulazikkomanina izintu nzyali mukwiiya, mulakonzya kuzumanana aciiyo ca Bbaibbele mubbuku limbi mwamanizya kwiiya broshuwa lya Ncayanda alimwi abbuku lya Luzibo. Talili lyoonse nomunga mwacita boobo, pele ikuti kakuyandika amuzumanane aciiyo mubbuku lya Mtendere Weni-Weni, antela mubbuku lya Ogwirizana M’kulambiridwa. Basikumwaya banji balaajisi mabbuku aaya ikuti naa mbungano kaitaajisi. Nokuba boobo, broshuwa lya Ncayanda alimwi abbuku lya Luzibo ayelede kusaanguna kuyiigwa. Iciiyo ca Bbaibbele, inyendo zyakupilukila alimwi aciindi citolwa mukuzumanana aciiyo ceelede kulembwa mulipooti, nokuba kuti sikwiiya wabbapatizigwa katanalimanizya bbuku limbi.
6 Sena eci caamba kuti aabo ibakabbapatizigwa caino-ino ibakaiya buyo bbuku lyomwe beelede kutalika alimwi ikwiiya bbuku limbi kutegwa bajane lugwasyo lumbi? Tacaambi boobo pe. Pele kuli bamwi ibatacisungweede naa ibatakayaambele mukasimpe, aboobo inga baciyanda kuti umwi abagwasye ikukabelesya munzila mbotu kasimpe mubuumi bwabo. Mulangizi wamulimo weelede kuzibisigwa kamutanatalika kwiiya asikumwaya wakabbapatizigwa kale. Nokuba boobo, ikuti kakuli bamwi mbomuzyi ibakaiya bbuku lya Luzibo kaindi pesi taakwe nobakayaambele kusikaa kulyaaba alimwi akubbapatizigwa, inga mwaambaula ambabo kubona naa inga bayanda ikutalika alimwi ciiyo ca Bbaibbele.
7 Citondezya luyando lwa Bunakristo ikubabikkila maanu umwi aumwi akati kabaaba bapya mbotwiiya limwi. Mbaakani yesu njakugwasya sikwiiya kuti abe aluzibo luyandika lwakasimpe kamu Jwi lya Leza. Mpoonya ulakonzya kulisalila ikukazumina kasimpe akulyaaba mwini kuli Jehova kwiinda mukubbapatizigwa mumaanzi.—Int. 40:8; Ef. 3:17-19.
8 Sena muliciyeeyede cakacitika naakazwaa kubbapatizigwa mwaalumi muzibe waku Etiopiya? “Wakatola munzila yakwe uya bubotelwa” kali sikwiiya mupya wa Jesu Kristo. (Inc. 8:39, 40) Iswebo alimwi abaabo mbotugwasya munzila yakasimpe atusekelele akubotelwa kapati mumulimo wa Jehova Leza—lino alimwi akumbele mane kukabe kutamani!