Kabbokesi Kamubuzyo

◼ Ino mabbuku nzi ngotweelede kwiiya abapya kabatana bbapatizigwa?

Muntu katanalyaaba kuli Jehova akubbapatizigwa weelede kwiiya luzibo lwini-lwini. (Joh. 17:3) Ulalujana luzibo ndwayandika kwiinda mukwiiya broshuwa lya Ncinzi Leza Ncayanda Kulindiswe? alimwi abbuku lya Luzibo Lutola Kubuumi Butamani. Ikanjikanji ibroshuwa ya Ncayanda njiisaangunwa kuyiigwa. Pele kuti naa ciiyo cakatalisigwa mubbuku lya Luzibo, ibroshuwa ya Ncayanda yeelede kuyiigwa lyamana kuyiigwa ibbuku. Ino nkaambo nzi ncociyandika eco?

Mubroshuwa ya Ncayanda muli njiisyo zya Bbaibbele zyantalisyo. Ikuti naa yayiigwa kusaanguna, ilagwasya sikwiiya kuteelela zintu ziyandika kutegwa akkomanisye Jehova. Ikuti naa yayiigwa kumamanino ilagwasya kuyeezya zyakayiigwa mubbuku lya Luzibo. Kufwumbwa nzila njomunga mwatola amumukulwaizye sikwiiya kwaabala magwalo aasindikizya alimwi akwaayeeyesya. Izifwanikiso amuzilange-lange nkaambo zilagwasya kapati mukuyiisya.—Amubone Ngazi Yamulindizi ya February 1, 1997, amapeeji 9-10.

Sikwiiya mbwatimanine buyo kwiiya mabbuku oonse obile, inga wacikonzya kwiingula mibuzyo yoonse baalu njobatikamubuzye ciindi cakulibambila lubbapatizyo. Aboobo inga takucinooyandiki kucita ciiyo cimbi anguwe mubbuku lili lyoonse nokuba kuti sikuyiisya weelede kuzumanana kubikkila maanu kukuyaambele kwasikwiiya.—Amubone Ngazi Yamulindizi ya January 1, 1996, amapeeji 25, 28-29.