Icibelesyo Cipya Cakugwasya Bantu Kwiiya Zyeelelo zya Leza
“IKULEMBWA kwayo munzila nguba-uba, iigaminina alimwi yaluzyalo kuyoozyala micelo kwiinda njotulangila. Imakani alabandikwa munzila iitakopenyi alimwi iikondelezya cakuti kufumbwa muntu uuyanda kuziba ncobeni uyookulwaizigwa kwaamba kuti, ‘ncobeni Leza mpali akati kanu.’” (1 Ba-Korinto 14:25) Mbwakaamba umwi wa Bakamboni ba Jehova waku Thailand ciindi naakali kupandulula broshuwa mpya ya Ncinzi Leza Ncayanda Kulindiswe? Yakamwaigwa aba Watch Tower Society ku Miswaangano ya Cooko ya “Batumwa Baluumuno lwa Bunaleza” yamu 1996/97.
Eyi broshuwa yamapeeji aali 32 yakabambilwa kuti kaibelesyegwa kwiiya Bbaibbele. Ijisi njiisyo zya Bbaibbele zyantalisyo. Ilembedwe munzila nguba-uba alimwi mfwaafwi iipandulula kabotu-kabotu Leza ncayanda kulindiswe. Ibabala tabeelede kuyuminwa kuteelela. Mbuti mbomukonzya kweendelezya ciiyo ca Bbaibbele mubroshuwa eyi mpya?
Amwiibelesye Mibuzyo. Kuli mibuzyo kumatalikilo aaciiyo comwe-comwe. Kumamanino aamubuzyo omwe-omwe muyoojana manamba aaiminina mincali mwalo mujanika kwiingula. Eyi mibuzyo ilakonzya kubelesyegwa kukusaanguna kamutana bala mincali naa kwiindulula ciiyo. Mucikonzyanyo, kumatalikilo aaciiyo ca Bbaibbele caaŋanda mulakonzya kubuzya sikwiiya mibuzyo kutegwa mumvwe kwiingula kwakwe. Muciindi cakubambulula kwiingula koonse kulubide mpoonya-mpoonya mulakonzya kuzumanana buyo aciiyo. Kumamanino aciiyo mulakonzya kujokela kumibuzyo kubona naa sikwiiya ulakonzya kwiingula lino kweendelana a Bbaibbele.
Amwaalange-lange Magwalo. Muciiyo aciiyo twaambo tufwaafwi twakasimpe kamu Bbaibbele tulisindikizidwe amagwalo aagwasilizya. Mbwaanga magwalo manji aambidwe buyo taazubuludwe cilayandika ikumukulwaizya sikwiiya ikulanga-langa zibalo mu Bbaibbele lyakwe mwini. Weelede kubala akuzinzibala kuyeeya Jwi lya Leza katana libelesya mubuumi.—Joshua 1:8.
Amwaambe ncozyaamba zifwanikiso. Ibroshuwa ilijisi zifoto alimwi azizekule—zyoonse antoomwe zilainda ku 50. Ezi teezyakabikkilwa buyo kubotezya mbwiilangika pe, pele zyakugwasilizya kuyiisya. Mucikonzyanyo ziiyo zyamamanino zyobilo (zyapeeji lyomwe-lyomwe, amapeeji aalangene) zilaa mitwe yakuti “Kugwasya Bambi Kucita Kuyanda Kwa Leza” alimwi awakuti “Kusala Kwenu Kwakuti Mubelekele Leza.” Izifoto ziyalene amapeeji aya obilo zitondezya kuyaambele kwamuntu omwe munzila yakumuuya, ikutondezya kakambauka kwiinda mukwiizya, katola lubazu mumulimo wakuŋanda aŋanda, walyaaba limwi kumamanino wabbapatizigwa. Kwiinda mukutondezya sikwiiya zifoto ezi, muyoomugwasya kubona ntaamu ziyandika kutegwa abelekele Leza.
Ino mbuti kuti muntu uuyanda kwiiya katacizi kubala kabotu naa katakonzyeli limwi buya? Iba Sosaiti babikka broshuwa eeyi ateepu yakuswiilila mumilaka iilimbwiibede. Iteepu ijisi zibalo zyabroshuwa antoomwe amagwalo woonse aambidwe. Mboobu mbwiilekkodedwe: Imubuzyo wakusaanguna ulabalwa mpoonya kwabalwa muncali (naa mincali) uuyingula, antoomwe amagwalo aambidwe buyo. Mpoonya mubuzyo uutobela ulabalwa, mpoona kwabalwa cibalo amagwalo aayingula, mbubona obo cilaya. Sikwiiya ulakonzya kuswiilila kuteepu nalibambila ciiyo. Iteepu ilakonzya kubelesyegwa aciindi nokweendelezyegwa ciiyo.
Abo bakajanika kumuswaangano bakaliyandide kubelesya broshuwa eyi mpya mumulimo wamumuunda. Mucikonzyanyo, mazuba masyoonto buyo kuzwa nobakatambula broshuwa, ibapainiya bobile (bakambausi baciindi coonse) baku United States bakaisiila banabubili bacili bana-bana balo mbobakali kuswaya-swaya. Aba banabubili nobakalanga azili mukati, ciiyo cakuti “Micito Njasulide Leza” cakabakonda. “Lyoonse ndakali kuyiisigwa kuti Leza taakwe ncangawasula—ngusiluyando,” mbwakaamba mukaintu. “Eci ncenditisaangune kubala.” Nobakajokela bapainiya aba bobile nsondo yakatobela, mukaintu oyu wakati: “Ndali kubala broshuwa mpya. Nciyumu kapati kucita zintu zyoonse zyotweelede. Jehova tatukkomanini pe—tatukwetene. Pele twasala cakucita. Twalibambila kuyookwatana nsondo iiboola mu Cisanu.” Banabubili aba bakajatana abapainiya bobile abo, bamane bakayungizya kwaamba kuti: “Mutujatile kutaba aciiyo lyoonse-lyoonse, pele twalemununwa kapati awa.”
Mwalombwa amusolekesye kubelesya broshuwa mpya ya Ncayanda. Ncibelesyo cibotu cakugwasya bamwi kwiiya zyeelelo zya Leza.
[Zifwanikiso izili apeeji 10]
Muyooibelesya buti broshuwa mpya?