Sena Muliibelesya Broshuwa ya Ncayanda Ikutalisya Ziiyo?
1 Sena mulizyi kuti iciindi nomubandika zyamu Bbaibbele lyoonse amuntu uujisi luyandisisyo alimwi akucita cakusitikila mumabbuku ngotubelesya kuti nciiyo ca Bbaibbele eeco ncomucita? Inzya, aaya masimpe kufwumbwa naa ciiyo cicitilwa kuŋanda yamuntu naa nkwiinda mukubelesya luwaile. Ino nkaambo nzi ma nkomutacibikki mumizeezo ikuti mukasole mu May alimwi amu June kutalisya ciiyo kwiinda mukubelesya broshuwa ya Ncayanda?
2 Amulibambile Kabotu Kutegwa Muzwidilile: Iciindi nomwaabila broshuwa ya Ncayanda, lyoonse mweelede kuti kamucizyi ncomuyanda kuti mubandike. Ikuti naa mucita kupilukila, amuyeeye mubandi ngomwakajisi mukuswaya kutaanzi. Amulibuzye kuti: ‘Ino muncali nzi mubroshuwa eeyi ngondeelede kubikkila maano mumubandi wesu uukonzya kusololela kuciiyo ca Bbaibbele?’ Ikuti kamukambauka kuŋanda aŋanda, amulange-lange ciiyo cikonzya kumukonda mukubusi, muntu mupati, mulombwana naa mukaintu. Amuzyiinduluke zibalo alimwi amusale cibalo cikonzya kubakonda. Mwamana kusala, amuciinduluke-induluke ziindi zili mbozibede. Eeyi ninzila iimwi iikonzya kumupa kuti muzwidilile.
3 Mulimo Wesu Wabwami wamu January 2002 mupepa lyamukati uulijisi “Nzila Nzyomukonzya Kubelesya Ciindi Nomwaabila Broshuwa ya Ncayanda” zili lusele. Kabbokesi kamutwe wakuti, “Inzila Yacigaminina” kalatondezya mbuli mboinga yabelesyegwa broshuwa mukutalisya ziiyo. Mulakonzya kubelesya nzila yakusaanguna kwiinda munzila eeyi iitobela:
◼ “Sena mulizyi kuti mumaminiti masyoonto buyo mulakonzya kubujana bwiinguzi bwamubuzyo wamu Bbaibbele uuboneka kuti muyumu kapati? Mucikozyanyo, nkaambo nzi ncokuli zikombelo zinji boobu izilitaminina kuba zya Bunakristo? Sena kuli nimwakakatazyidwe akaambo aaka?” Amana kwiingula muntu, amuvwunune kuciiyo 13 akubandika mincali yobilo yakusaanguna. Ikuti ciindi kacizumizya, mulakonzya kubala alimwi akubandika lugwalo lomwe naa obilo. Mpoonya mubale mubuzyo wamamanino uuli atala lyapeeji, eelyo mwaambe kuti: “Zibalo zyoonse zilaamba mbazu zyosanwe zikonzya kumupa kuti muzyibe cikombelo cini-cini. Ndiyakuboola alimwi kutegwa tukazyibandike eezyi andinywe.”
4 Amuzumanane: Kufwumbwa mwajana ciindi amutondezye mbuli ciiyo ca Bbaibbele mbocicitwa mubroshuwa ya Ncayanda. Amulombe zilongezyo zya Jehova. (Mt. 21:22) Kwiinda mukuzumanana, mulakonzya kububona bubotu bwakugwasya muntu kuzumina makani mabotu!