Amubagwasye Ibatezi Kutegwa Basongwaale
1 Kwiinda mumulimo wakugwasya bantu kuba basikwiiya, tuyiisya beenzuma ncayanda Leza kuli mbabo. (Mt. 28:19, 20) Munyika yoonse mboizulwa Bakamboni bainda kutuulunzuma tosanwe balimukubeleka canguzu kucita boobo. Kuzwidilila takweelekwi mumaoola ngobabeleka, mabbuku ngobasiya, neziba ziiyo zya Bbaibbele nzyobatalisya. Tulazuzikizya ncito yesu eelyo bantu nobamvwa alimwi akutobela nzyobaiya.
2 Ikugwasya bamwi munzila yakumuuya kujatikizya ‘kusongwaazya batezi.’ (Int. 119:130) Bantu balamvwa alimwi balakulwaizigwa kubweza ntaamu eelyo ‘nobaswiilila akumvwisya.’ (Mt. 15:10) Eelyo mulimo wesu mbouyabukomenena, andiswe tulateelelesya bubotu bwakukanana akuyiisya munzila nguba-uba. Nkakaambo kaako Sosaiti ncoyamwaya broshuwa iitegwa Ncinzi Leza Ncayanda Kulindiswe? Ilijisi ciiyo cikkwene cijatikizya injiisyo zyoonse ziyandika kapati zyamu Bbaibbele. Ziiyo nzifwaafwi, mabala taakatazyi, anjiisyo ninguba-uba kwiimvwa, icipa kuti ibroshuwa eeyi iyandwe abantu banji.
3 Eeyi broshuwa iyakumwaisigwa antoomwe amamagazini mumyeezi ya April a May. Inga cainda kubota kuti eelyo nomuyeeya naa kulibambila zya mulimo wansondo ansondo, mwalibambila akumwaya mamagazini mu Sabata pele broshuwa inga mwaimwaya mumulimo mazubaaya amwi mukati kansondo. Amwiitole ibroshuwa kubantu mbomuzyi bakatondezya luyando ku mabbuku ciindi cainda. Mutalubi kuti inga ilabeleka kapati mukuyiisya bana, bantu babelesya mulaka mweenzu alimwi abaabo batakonzyi kubala mabalaa katazya.
4 Amubelesye Ntalisyo yamakani Nguba-uba: Eelyo nomubakulwaizya kubweza ibroshuwa ya Ncayanda amubatondeezye aapeeji 2, mpoipandulula kuti “broshuwa eyi ibambilidwe kuba ciiyo ca Bbaibbele.” Amubandike zili a muncali wa 3 apeeji 3 kuti mutondezye kaambo muntu ncayelede kwiiya Bbaibbele. Amubakulwaizye amitwe imwi yaziiyo iibandika njiisyo zyakasimpe zyamu Bbaibbele zitakatazyi. Amutondezye broshuwa eyi mboikondelezya kwiiya akubatondezya mboinga ilabagwasya.
5 Amube a Ciiyo Ciyaambele: Imbaakani yesu taili yakuba buyo a ziiyo— tuyanda aabo bantu mbotugwasya kuti bakakatile mubukombi bwakasimpe. Ibroshuwa inga yamanizigwa munsondo zisyoonto buyo alimwi yeelede kusololela muciiyo camubbuku lya Luzibo. (Amubone kukagwalo kakunsi aapeeji 31.) Kuzwa mbomwatalikila buyo, amumugwasye sikwiiya kuziba mbunga ya Jehova. (Amubone bbuku lya Kukambitsirana, apeeji 143.) Amukankaizye aabubotu bwa miswaangano yambungano, alimwi amupandulule kuti ikujanika aalinjiyo kuya kumupa kuti azibe kapati mbwanga watobela bukombi bwakasimpe.—Heb. 10:24, 25.
6 Kubeleka kukkwene kabotu muncito eeyi yaalubazu mu April amu May masimpe kuya kutuletela lukkomano luboola kuzwa mukugwasya baabo basinizizye ‘kulijanina maanu’ aatola kubuumi.—Tus. 4:5.