Amuyobole
Sena Mulaabelesya Mabroshuwa Aaya?
Sena Mwakaijana Kale Inzila Iisololela Kubuumi Butamani?
Yakabambilwa kugwasya bantu bali aabukombi
Mbwiikonzya kwaabilwa: “Akaambo kakuvwula kwazikombelo mazubaano, sena kuli nomwakalibuzide kale mbotukozya kuzyiba cikombelo ncakkomanina Leza?” Amana kwiingula amujalule apeeji 19. Amubandike muncali 4, alimwi amumubuzye mukamwini ŋanda naa ulazumina kuti cikombelo cakasimpe ceelede kubagwasya bakombi kuti kabayandana alimwi akuyanda bantu bambi. Amubale Johane 13:35 mpoonya amwaabile broshuwa.
Mulakonzya kusola nzila eeyi: Ikuti mukamwini ŋanda waitambula broshuwa, amwaambe kuti, “cibeela 7 cabroshuwa eeyi cilapa zitondezyo zili cisambomwi zikonzya kutugwasya kuzyiba cikombelo cakasimpe. Inga ndakkomana kumuswaya alimwi kutegwa tukalange-lange zitondezyo eezyi antoomwe.”
Myuuya Yabafwide Sena Yamugwasya Naba Kumucisa? Sena Ncobeni Kwiili?
Yakabambilwa kugwasya baabo bakakomenena mubukkale bantu mobayoowa bafwide
Alimwi inga yamugwasya ciindi nomubandika abantu basyoma mupurigatoriyo alimwi amulilo wahelo.
Mbwiikonzya kwaabilwa: “Twaano tunji tulaambwa kujatikizya mibandi bantu njobayeeyela kuti bakali kubandika amyuuya yabantu bafwide. Sena tweelede kubandika abantu bakafwa?” [Amubale lugwalo lwa Mukambausi 9:5. Mpoonya amulindile bwiinguzi] Amujalule apeeji 4 mpoonya amubandike mincali yone yakusaanguna. “Ibroshuwa eeyi ilaamba twaambo tunji kujatikizya makani aaya.”
Mulakonzya kusola nzila eeyi: Ikuti mukamwini ŋanda waitambula broshuwa, amwaambe kuti, “Ino milumbe bantu njobaamba kuti balaimvwa, izwa kuli ni?” Amupange bubambe bwakubandika mincali iili 8 yakusaanguna mucibalo icili apeeji 13 mulweendo lutobela.”
Iciindi Muntu Ngomuyanda Nafwa
Yakabambilwa kugwasya bantu bauside, naa aabo bajisi bacibbululu naa balongwe bayandika kuumbulizyigwa
Mbwiikonzya kwaabilwa: “Kufwidwa mumukwasyi ncintu cicisya moyo kapati. Bantu banji cilabakatazya kuzyiba mbobakonzya kuumbulizya mukwasyi wafwidwa. Ino nywebo muyeeya buti? Amulindile bwiinguzi. Mwamana, amujalule apeeji 31, mpoonya amubatondezye cifwanikiso cabubuke. Amuzumanane kwiinda mukwaamba kuti: Ibbaibbele lilatusyomezya kuti Leza lino-lino uyoobweza ntaamu yakumanizya mapenzi aabantu. [Amubale Milimo 24:15] Mwamana amujalule apeeji 30, akubala muncali 2 alimwi a 3 mpoonya amwaabile broshuwa.”
Mulakonzya kusola nzila eeyi: Ikuti baitambula broshuwa, amwaambe kuti, “Broshuwa eeyi ilaamba atumwi twaambo tunji tukkomanisya tujatikizya makanze aa Leza aakumbele. Inga ndakkomana kumuswaya alimwi kutegwa tukabandike twaambo ootu.”
Mulakonzya Kuba Mulongwe wa Leza!
Yakabambilwa kugwasya bantu batayiide naa batakonzyi kubala kabotu
Mbwiikonzya kwaabilwa: “Sena muyeeya kuti tulakonzya kuba balongwe ba Leza? [Amulindile bwiinguzi. Mwamana amubale Jakobo 2:23.] Broshuwa eeyi yakabambilwa kutugwasya kuba balongwe ba Leza, mbuli Abrahamu.”
Mulakonzya kusola nzila eeyi: Mulweendo lwakusaanguna naa nomupilukila, amutondezye mbocicitwa ciiyo ca Bbaibbele kwiinda mukubandika antoomwe Ciiyo 1 coonse naa cibeela caciiyo eeci.