Amulibambe
Nzila Zyakasalwa Zyakubelesya Mumulimo Wamumuunda
Mbomukonzya Kulibelesya Pepa Lyamukati Eeli
Ibunji bwanzila eezyi nkozili kale mumakkopi aa Mulimo Wesu Wabwami aamusyule. Amusoleke mbuli mbomukonzya kuzyibelesya nzila eezyi mumulimo wanu wabukambausi, mubone mpindu zijanika. Amulibambe kabotu pepa lyamukati eeli alimwi akulibelesya ciindi nomulibambila kuya mulimo wamumuunda.
Mulakonzya kupa kuti muntu abe aluyandisisyo lwa Jwi lya Leza ikuti naa mwafwambaana kwaamba kaambo kalimvwisya. Amubuzye mubuzyo weelede uugaminide, mwamana amubale bwiinguzi bwamu Magwalo bufwaafwi. Amuzyisole nzila eezyi:
“Nomuyeeya zyabuumi bwakumbele, sena mulijisi bulangizi bwakuti zintu ziyooba kabotu naa muladooneka? [Amulindile bwiinguzi.] Ibbaibbele lyakazyaambilalyo zintu zityompya zicitika mazubaano alimwi aziyootobela.”—2 Tim. 3:1, 2, 5; Tus. 2:21, 22.
“Kuli kulibilika kapati mazubaano kujatikizya busilisi bwamalwazi. Sena mulizyi kuti Leza wakasyomezya kuti uyooamanizya malwazi oonse?”—Is. 33:24; Ciy. 21:3, 4.
“Sena mulizyi kuti Ibbaibbele lilasinsima kuti ino-ino kuyakuba buyo mfwulumende yomwe iinakulela nyika yoonse mboizulwa?”—Dan. 2:44; Mt. 6:9, 10.
“Ikuti Jesu Kristo naali ngonguwe uulela nyika, ino muyeeya kuti zintu nozyali buti?”—Int. 72:7, 8.
“Ibantu banji balacimwa akaambo kakuti mbaalumi naa mbakaintu naa nkaambo mbacikombelo cimbi nokuba kuba bamubala uumbi. Ino muyeeya kuti Leza ulimvwa buti kusalaulana kuli boobu?”—Inc. 10:34, 35.
“Tulizyi kuti Jesu Kristo wakacita maleele manji ciindi naakali anyika. Ikuti naa mwayandika kumulomba kuti acite cintu comwe camaleele, ino ncinzi ncomunga mwayanda?”—Int. 72:12-14, 16.
“Ibantu banji balicimidwe ikwiile kumvwa mapenzi lyoonse. Bayanda buyo kumvwa nzila zikonzya kumanizya mapenzi aaya. Pele ino nkuli nkotunga twajana lugwasyo lwini-lwini lwakumanizya mapenzi eesu?”—2 Tim. 3:16, 17.
“Sena mulibuzyi Bwami mbomupailila mu Mupailo wa Mwami (naa Taateesu)?”—Ciy. 11:15.
Twaambo Tugwasya Kutalisya Mibandi
Mulongo wamibuzyo uulaansaawa, wakabambwa kuzwa mutwaambo tuli mubbuku lya Kukambitsirana ulatondezya peeji aawo aajanwa bwiinguzi:
Nkaambo nzi ncotucembaala akufwa? (151)
Ino bafwide bali muciimo cili buti? (153)
Sena kuli twaambo tuliko tutupa kusyoma muli Leza? (307)
Sena Leza mmuntu mwini-mwini? (309)
Sena mmasimpe kuti Leza ulazilanganya zitucitikila tobantu? (308)
Sena bantu boonse babotu balaunka kujulu? (203)
Sena muntu weelede kuunka kujulu kutegwa akabe aabuumi bubotu kumbele? (204)
Nkaambo nzi ncociyandika kulizyiba alimwi akulibelesya izina lya Leza limugemi? (420)
Sena ncobeni Jesu Kristo ngu Leza? (426)
Ino ncinzi Bwami bwa Leza ncobuya kucita? (376)
Ino buumi bwabantu bujisi mpindu nzi? (290)
Ino ncinzi cinga cagwasya mulukwatano? (388)
Sena zikombelo zyoonse zilatambulika kuli Leza? (83)
Ino mbuti muntu mbwakonzya kuzyiba cikombelo ciluzi? (89)
Ino Sataani uula anguzu zinji buti munyika iino? (355)
Nkaambo nzi Leza ncalekelede mapenzi? (222)
Ino nkaambo nzi ncobuvwulide kapati boobu ibubi? (183)
Ngwani ulela nyika eeyi—Leza naa Sataani? (128)
Nzila Nzyomukonzya Kubelesya Ciindi Nomwaabila Broshuwa ya Ncayanda
“Icakutadooneka, mulakonzya kuzumina kuti bantu banji balasyoma muli Leza. Boonse basyoma mulinguwe balazumina kuti Leza kuli ncayanda kulindiswe. Icintu bantu ncobatakonzyi kuzumina ncakuti, Ncinzi Leza ncayanda kulindiswe?” Mpoona amubatondezye broshuwa ya Ncayanda, amuvwunune kuciiyo 1 akucibandika.
“Mbuli mbokuli mapenzi manji sunu mumukwasyi, sena kuli nomwakalibuzyide ikuti, ino ninzila nzi iikonzya kuleta lukkomano mumukwasyi? Bamana kwiingula, amupandulule kuti mu Bbaibbele, Leza uliiyubununa nzila yini-yini iipa kuti mukwasyi kaukkomene. Amubale bbuku lya Isaya 48:17. Mpoona amuvwunune kuciiyo 8 mubroshuwa ya Ncayanda alimwi amubale tupango tumwi twamu Bbaibbele tupedwe itupa busolozi bubotu kuli umwi aumwi mumukwasyi. Amubale mibuzyo iilembedwe kumatalikilo aaciiyo. Amumubuzye muntu ooyo naa inga wayanda kubala bwiinguzi.
“Eeyi broshuwa ilijisi ciiyo coonse ciyandika icijatikizya njiisyo zya Bbaibbele zyantalisyo. Kupeeji imwi aimwi, mulajana bwiinguzi kumibuzyo yakatazya bantu kwamyaanda yamyaka. Mucikozyanyo, Mmakanze nzi ngajisi Leza kujatikizya nyika?” Amuvwunune kucibalo 5, mubale mibuzyo iili kumatalikilo aaciiyo. Amumubuzye ulaamunzi amwaambile mubuzyo wamukkomanisya, kuzwa waawo amubale muncali naa mincali iijatikizya mubuzyo ooyo akubala magwalo aayelede. Amupandulule kuti kwiingula mibuzyo aimbi akwalo takukatazyi mbubwenya mbuli bwacitwa kuli yooyu. Amwaambe kuti muyakujoka kutegwa mukabandike aumbi mubuzyo.
“Ino muyeeya kuti nkaambo nzi ncokuli kulwana muzikolo zyoonse zyabuleya? Sena kulacitika akaambo kakuti ibazyali tababayiisyi kabotu bana babo? Ambweni nkaambo buyo kambi mbuli kakuyungwa a Diabolosi?” Amulindile bwiinguzi. Ikuti muntu waamba kuti nkaambo kakuyungwa a Diabolosi, amubale Ciyubunuzyo 12:9, 12. Amupandulule lubazu ndwajisi Diabolosi mukwiindilizya mapenzi munyika. Mpoonya amuvwunune broshuwa ya Ncayanda kuciiyo 4, akumubuzya muntu ooyo naa kuli naakalibuzyidwe kujatikizya nkwaakazwa Diabolosi. Amuzumanane kubala akwiibandika mincali yobilo yakusaanguna. Ikuti naa muntu wasala kuti nkaambo “ibazyali tababayiisyi kabotu bana babo” ncokuli kulwana muzikolo zyabuleya, amubale 2 Timoteo 3:1-3 akumupanduluda tumpenda tupa kuti kube penzi eeli. Mpoonya amuvwunune broshuwa ya Ncayanda kuciiyo 8, amubale muncali 5, akuzumanana amubandi wanu.
“Sena muyeeya kuti ncamaano kuyeeya kuti Mulengi ulakonzya kutupa luzibo ndotuyanda ikutegwa tucikonzye kuyaka mukwasyi uuzwidilila?” Bamana kwiingula, amubatondezye broshuwa ya Ncayanda. Amuvwunune kuciiyo 8, eelyo amupandulule kuti cilijisi njiisyo zyamu Bbaibbele zikonzya kugwasya umwi aumwi mumukwasyi. Amubatondezye mboibelesyegwa broshuwa antoomwe a Bbaibbele kutegwa kujanwe mpindu mpati.
“Kweelena amapenzi woonse ngotujisi mubuumi bwamazubaano, sena muyeeya kuti mupailo inga watugwasya? [Amulindile bwiinguzi] Ibanji baamba kuti mupailo ulabayumya-uyumya. [Amubale Ba-Filipi 4:6, 7.] Nokuba boobo, muntu ulakonzya kalimvwa kuti mipailo yakwe tayiingulwi. [Amuvwunune broshuwa ya Ncayanda kuciiyo 7.] Eeyi broshuwa ilapandulula mbuli mupailo mbuukonzya kutugwasya kapati.”
“Twali kubandika abasimukoboma kujatikizya ncokuli zikombelo zinji ziindenyi-indenyi munyika, kakuli Bbaibbele ndimwi buyo. Mukuyeeya kwanu, ino nkaambo nzi ncokuli kunyongana kuli boobu muzikombelo? [Amulindile bwiinguzi.] Amuvwunune broshuwa ya Ncayanda kuciiyo 13, akubala mibuzyo yakumatalikilo.] Mulajana bwiinguzi bukkazyika moyo kumibuzyo eeyo kwiinda mukubala ciiyo eeci.”
Nomwamana kwaabila muntu mamagazini aa Ngazi Yamulindizi alimwi a Galamukani!, amumubuzye naa inga wamuzumizya kuti mumubalile muncali omwe buyo mufwiifwi. Ikuti naa wamuzumizya, amuvwunune broshuwa ya Ncayanda kuciiyo 5. Amumutondezye mibuzyo iilembedwe kumatalikilo aaciiyo, akumwaambila kuti aswiililisye bwiinguzi bwamubuzyo wakusanguna ciindi nomubala muncali wakusaanguna. Mwamana kubala muncali, amubuzye mubuzyo alimwi muswiililisye bwiinguzi bwakwe. Amumwaabile broshuwa, ikuti naa waitambula, amumwaambile kuti muyakujoka kutegwa mukamvwe bwiinguzi bwakwe kumibuzyo yobilo mumulongo.
Nzila Nzyomukonzya Kubelesya Nomwaabila Bbuku lya Luzibo
Kumwi kamujisi a Bbaibbele mumaanza, amutalike mubandi wanu kwiinda mukwaamba kuti: “Tuli mukubandika lugwalo lumwi kumuntu uuli woonse mucilawo cino. Lwaamba kuti . . . ” Amubale Johane 17:3, mpoonya amubuzye kuti: “Sena mwacibona cili mukusyomezyegwa ikuti naa katulujisi luzibo lweelede? [Amulindile bwiinguzi.] Ino nkuukuli muntu nkwakonzya kulujana luzibo luli boobu?” Bamana kwiingula, amubatondezye bbuku lya Luzibo alimwi akwaamba kuti: “Eeli bbuku litondezya luzibo lusololela kubuumi butamani. Lilacita oobo kwiinda mukwiingula mibuzyo iikatazya bantu banji kujatikizya Bbaibbele.” Amubatondezye peeji ijisi izili mukati, mpoonya amubabuzye ikuti naa kuli nobakakatazyigwa kale kujatikizya makani aamucibalo cimwi akati kazibalo eezyo.
“Sena kuli nimwaakatazyidwe kale ikuti naa Leza kuli mbwalimvwa ikujatikizya mapenzi aacitika munyika naa aaka mucitikila nywebo? [Amulindile bwiinguzi] Ibbaibbele litusyomezya kuti Leza ulatuyanda alimwi akuti unakutugwasya mumazuba woonse aamapenzi. Amubale tubeela-beela twabbuku lya Intembauzyo 72:12-17. Amuvwunune bbuku lya Luzibo cibalo 8, mpoonya mwaambe kuti cilijisi bwiinguzi buumbulizya kumubuzyo uubuzyigwa atuulunzuma twabantu wakuti, Nkaambo nzi Leza ncalekelede mapenzi? Ikuti kacikonzyeka, amubandike makani aamu Magwalo aajanika mumincali ya 3 kusikila ku 5 naa mukacite boobo mulweendo lwanu lwakupilukila.
“Ibunji bwesu twakafwidwa kale bayandwa besu. Sena kuli nimuyeeya ikuti muya kubabona alimwi? [Amulindile bwiinguzi.] Jesu wakatondezya kuti bayandwa besu balakonzya kubusyigwa kuzwa kubafwu. [Amubale Johane 11:11, 25, 44.] Nokuba kuti eeci cakacitika myaanda-myaanda yamyaka yainda, Leza ncaasyomezya ncakuti uyootucitila.” Amuvwunune bbuku lya Luzibo kucifwanikiso cili apeeji 85, mpoonya amubale mabala aasindikizya cifwanikiso. Mwamana kucita boobo, amubatondezye cifwanikiso cili apeeji 86 akwaamba ncocitondezya. Amutalisye kaambo kayoobandikwa mwakujokela kwiinda mukubuzya kuti: “Sena inga mwayanda kuzyiba kaambo ikapa kuti bantu kabacembala akufwa?” Amukajokele kuyoobandika cibalo 6.
“Sena kuli nimwaalibuzyide kale ikuti, ino nkaambo nzi bantu ncobayandila koongola?” Bamana kwiingula, amuvwunune bbuku lya Luzibo kucibalo 6 akubala muncali wa 3.
“Sena kuli nomwakalibuzyide kuti, ino nkaambo nzi bantu ncobayandisya koongola?” Bamanizya kwiingula, amuvwunune bbuku lya Luzibo kucibalo 6 akubala muncali 3. Amwaapandulule magwalo aapedwe mucibalo. Kamubelesya mibuzyo yobilo iili kumamanino amuncali, amumubuzye muntu ooyo ngomubandika limwi ikuti naa ulayanda kubuzyiba bwiinguzi. Ikuti kayanda, amuzumanane kubandika mincali misyoonto iiccilila.
“Tuli mukubuzya bantu ikuti naa balacisyoma eeci. . . ” Amubale Matalikilo 1:1 alimwi amubuzye kuti: “Sena mulakazumina kaambo aaka?” Ikuti muntu wakazumina, amwaambe kuti: “Andime mbweena ndilakazumina kaambo aaka. Nokuba boobo, sena muyeeya kuti, ikuti kali Leza wakalenga zintu zyoonse eezyi nkokuti nguweelede kupegwa mulandu kumakani aabubi buliko?” Mwamana kuzyiba bwiinguzu bwamuntu ooyo, amubale Mukambausi 7:29. Mpoonya amuvwunune mubbuku lya Luzibo kucibalo 8, amubale muncali wa 2. Ikuti katazuminizyi kukaambo kali ku Matalikilo 1:1, amumwaambile kuti akajane bumboni bwakuti Mulengi nkwali.—Amubone bbuku lya Kukambisirana mapeeji 74-6.
“Sena mulazumina kuti akaambo kakucinca-cinca kwazyeelelo zyabukkale kucitika lyoonse, sena nkokuti tuyandika busololi busyomeka mubuumi bwesu? [Amulindile bwiinguzi.] Nokuba kuti ndeliinda kuba lyakaindi kumabbuku oonse aaliko, Ibbaibbele lilapa lulayo lugwasya mubukkale bwamazubaano alimwi akuba amukwasyi uukkomenyi.” Amuvwunune kucibalo 2 cabbuku lya Luzubo, amubale muncali wa 10 alimwi amuzila wakusaanguna wamuncali wa 11, mubikkilizye lugwalo lwa 2 Timoteo 3:16, 17.
“Sena inga mwayanda kuzyiba buumi bwakumpela mbobubede alimwi anyika kwiigama? [Amulindile bwiinguzi] Ibbaibbele lilabwaamba buumi bwakumpela mubbala lyomwe—Paradaiso! Ooko Leza nkwaakababikka banabukwetene bakusaanguna ciindi naakabalenga. Amumvwe bupanduluzi oobu bujatikizya mbuli mboyakabede.” Amuvwunune bbuku lya Luzibo kupeeji 8, akubala muncali wa 9 ansi aakatwe kakuti “Buumi mu Paradaiso.” Mpoonya amubandike twaambo tuli mumuncali wa 10, mwamana mubale lugwalo lupedwe lwa Isaya 55:10, 11. Amubalombe kuti muzumanane amubandi uujatikizya mbobunoobede buumi mu Paradaiso iipilusidwe kwiinda mukubandika mincali ya 11-16.
Iciindi nomucita nyendo zyakupilukila kulibaabo mbomwakaabila mamagazini aa Ngazi Yamulindizi alimwi a Galamukani!, mulakonzya kwaamba kuti:
“Nindakamuswayide ndakamusiila magazini ya Ngazi Yamulindizi. Ndasyoma mwakabona kuti mutwe wamagazini eeyi woonse waamba kuti Ngazi Yamulindizi Yaambilizya Bwami bwa Jehova. Sunu ndiyanda kuti ndimupandulude Bwami oobu mbobubede alimwi ancobuyoomucitila nywebo alimwi amukwasyi wanu.” Mpoonya amuvwunune broshuwa ya Ncayanda aciiyo 6, amubale akubandika kweelanaa ciindi ncajisi mukamwini ŋanda.
“Nindakamuswayide caino-ino aawa, ndakamusiila mamagazini aa Ngazi Yamulindizi alimwi a Galamukani! Aaya mamagazini apa kuti bantu kabalisyoma Bbaibbele abusolozi bwandilyo bwanjiisyo zyakulilemeka. Akaambo kakuti ndilimvwa kuti ncintu ciyandika kapati kuti muntu woonse weelede kuliteelela Jwi lya Leza, ndaboola alimwi kuti ndimutondezye cimwi cikonzya kumugwasya kucita boobo.” Amubatondezye broshuwa ya Ncayanda naa ibbuku lya Luzibo akubaambila zyaciiyo ca Bbaibbele.
Iciindi nomumwaya bbuku lili lyoonse lyakaindi lijisi mapeeji aali 192, mulakonzya kusola ntalisyo yamakani eeyi:
“Icaambwa kapati mazubaano cakuti kuyandika lwiiyo lulondokede. Mwayeeya nywebo, ino ndwiiyo luli buti muntu ndweelede kuba andulo ikutegwa kasinizizye kuti uyooba alukkomano lunji akuzwidilila mubuumi bwakwe? [Amulindile bwiinguzi. Mpoona amubale Tusimpi 9:10, 11.] Eeli bbuku [amuwaambe mutwe wabbuku ndyomumwaya] lijisi njiisyo zizwa mu Bbaibbele. Lilatondezya kulikke kuzwa luzibo ilusololela kubuumi butamani.” Amutondezye cikozyanyo cimwi mubbuku alimwi amumuyumye-yumye kuti alibale.
Mabbuku Aambi
Nzila zisalidwe zyamakani aantalisyo kujatikizya mabbuku aambi alimwi amabroshuwa zilakonzya kujanwa mu Watch Tower Publications Index mumitwe yakuti:
Presentations (Izitondezyo)
List by Publication (Mulongo wamabbuku)
Inzila Yacigaminina
Ikutegwa mutalisye ciiyo ca Bbaibbele, amusoleke nzila yomwe akati kazyeezyi zyacigaminina:
“Sena mulizyi kuti mumaminiti masyoonto buyo mulakonzya kubujana bwiinguzi bwamubuzyo wamu Bbaibbele uuyandika kapati? Mucikozyanyo, . . . “ Mpoona amubuzye mubuzyo uuli kumatalikilo aaciiyo cimwi mubroshuwa ya Ncayanda ooyo ngomuyeeya kuti ulakonzya kumukkomanisya muntu ooyo.
“Ndati ndileye ikutegwa ndimutondezye bubambe bwaciiyo ca Bbaibbele citabbadalwi. Citola buyo maminiti aali osanwe kutondezya mbocicitwa. Sena inga mwandizumizya kuti ndimutondezye mumaminiti aali osanwe?” Ikuti bwiinguzi kabuli bwakuti inzya, amucite ciiyo 1 mubroshuwa ya Ncayanda ikubatondezya mbocicitwa ciiyo, mubale buyo lugwalo lomwe naa obilo aasalidwe. Mwamana amubuzye kuti: “Ino ndilili nomunga mwaba amaminiti aali 15 ikutegwa tukaiye ciiyo ciccilila?”
“Ibantu banji balilijisi Bbaibbele, pele tabazyi kuti lilayiingula mibuzyo iiyandika kapati njotujisi toonse kujatikizya buumi bwesu bwakumpela. Kwiinda mukubelesya bbuku eeli ligwasya kwiiya [broshuwa ya Ncayanda naa bbuku lya Luzibo] kwawoola lyomwe naa kwiinda waawo amvwiki, mulakonzya kuteelela kabotu makani mapati aa Bbaibbele mumyeezi misyoonto buyo. Ndilakonzya kumutondezya bubambe oobu mbobubeleka.”
“Ndaboola kuti ndizyikumwaabile ciiyo ca Bbaibbele caaŋanda citabbadalwi. Kuti naa cili buyo kabotu, inga ndamutondezya mukaindi kasyoonto mbuli bantu mumasi aatandila ku 200 mbobabandika Bbaibbele mumaanda aabo mumikwasyi. Tulakonzya kubelesya kufwumbwa mutwe wamakani akati kayeeyi kutalika mubandi wesu. [Amutondezye peeji lyazili mukati mubbuku lya Luzibo.] Ino nguuli mutwe aawa wamukonda kapati?” Amulindile kutegwa basale. Amuvwunune kucibalo casalwa, mpoona amutalike ciiyo kuzwa mumuncali wakusaanguna.
“Ndilacita ziiyo zyamu Bbaibbele kanditabbadalisyi alimwi ndijisi ciindi cakwiiya abasikwiiya abamwi. Eeli ndebbuku ndyotubelesya kwiiya Bbaibbele [Amutondezye bbuku lya Luzibo.] Eeci ciiyo citola buyo myezi misyoonto alimwi cilaingula mibuzyo iili mbuli yakuti: Nkaambo nzi Leza ncalekelede kupenga? Nkaambo nzi ncotucembaala akufwa? Ninzi cicitika kubayandwa besu bafwide? Alimwi mbuti mbotunga twaswena kuli Leza? Sena inga ndamutondezya mbocicitwa ciiyo?”
Ikuti naa kuli makani aantalisyo ngomwabelesya mukupa kuti muntu abe aluyandisisyo, amubone kuti mwazumanana kwaabelesya! Kamwiile kucinca-cinca kweelana abbuku lili mukumwaigwa mwezi ooyo.