Amubatondezye Kuti Mubalanganya Ncobeni Boonse Bayanda Mbomujana
1 Kukambauka kwanyika yoonse kwa Bwami lino-lino kulamana, mpoona boonse aabo “abatamuzi Leza” baya kunyonyooka. (2 Tes. 1:7-9) Aboobo, luyando lwini-lwini lwa maumi aabantu bamwi luli mukucitya bantu ba Jehova kusikila bantu banji-banji amulumbe wa Bwami.—Zef. 2:3.
2 Mweezi amweezi, mamiliyoni aamaoola alabelesegwa mukuyandaula baabo bayanda kuswiilila “makani mabotu loko.” (Is. 52:7) Kweendelana amabbuku aamwaigwa lino, bamwi balembya Ngazi Yamulindizi, alimwi bantu banji baatambula makkopi aa Ngazi Yamulindizi a Galamukani! niiba broshuwa ya Ncinzi Leza Ncayanda Kulindiswe? Luyando lwini-lwini lweelede kutufwambaanya kulingula koonse nkotwakajana bantu bayanda.—Tus. 3:27.
3 Amubambe Malembe Aaluzi: Zinji ziyakuzuzikizigwa kuti naa mwabamba zilembedwe zimaninide alimwi ziluzi zya kuyanda anzyomwakasiya. Itwaambo mbuli twa izina lyasiŋanda akkeyala, buzuba aciindi nomwakamuswaya, mabbuku ngomwakasiya, alimwi amutwe wamakani ngomwakabandika ziya kumugwasya kubona mbomunga mwamugwasya kabotu mwaakupiluka. Alimwi, naa mwatulemba twaambo twasiŋanda ntwaakaamba ciindi camubandi wakusaanguna, inga mwazikutalisya ntuto mwaakutalika mubandi mwaakupilukila kutegwa ukabe mubandi uuya koomoonga.
4 Amufwambaane Kucita Nyendo Zyakupilukila: Bali bongaye aabo bakatambula mabbuku kuzwa kuli ndinywe mweezi wamana mbomwasoleka kuya kuswaya alimwi? Sena kwainda nsondo buya izili mbozibede kamutana bonana? Luyando lwanu lwini-lwini kubukkale bwabo bubotu butamani kweelede kumukulwaizya kupilukila cakufwambaana, ndiza kwainda buyo mazuba masyoonto, kutegwa batalubi nzyomwakabandika. Kwiinda mukufwambaana kupilukila kukomezya kuyanda kwabo, inga mwakonzya kwaaindila makanze aa Saatani natana ‘sika akunyanga makani ngibaminzilidwe.’—Mk. 4:15.
5 Kulibambila Ncintu Cipati Loko: Kuzwidilila kwanu munyendo zyakupilukila kuyeeme aakulibambila kwanu kubotu. Amuyeeye majwi ngomuya kutalisya kamutana yumuka. Ipeeji lyakusule lya Mulimo Wesu Wabwami lya April 1997 lilapa nzila zyakutalisya zinji-zinji zikonzya kubelesegwa cakuzwidilila kabotu ciindi nomupa mamagazini naa broshuwa ya Ncayanda. Citobela nkubaa twaambo mumutwe twakuya kubandika ambabo mwaakupilukila. Ncinzi ncomunga mwaamba ciindi nomulingula bayanda? Iciiyo ca Bbaibbele inga mwacitalisya buti?
6 Nomuyungizya amubandi wazintu zyeelede kucitwa kutegwa nyika isalazigwe akwiicitya kuba busena bubotu bwakukkala, inga mwati:
◼ “Ciindi camana neekamuswaide, twakazuminana kuti intaamu zinji zyeelede kucitwa nyika kaitana citwa kuba paradaiso waluumuno. Sena muyeeya kuti bantu balazulizya izinga zyacita mulimo ooyu? [Amulindile kwiingula.] Ndamulomba mubone kaambo ncocili cintu ceelede kuti Leza atole lubazu mubweende bwamuntu.” Amubale Intembauzyo 37:38. Mpoona amuye kuciiyo 5 mubroshuwa ya Ncayanda, akubelesya zibeela nzyomunga mwasala mumincali 4-5 kuti mutondezye nzila Leza mbwayakuzuzikizya businsimi obu. Amutolelele ambele kwiinda mukumupa ciiyo ca Bbaibbele camu broshuwa.
7 Ikuti naa mwakabandika zya Bwami bwa Leza kumane mwakasiya broshuwa ya “Ncayanda” ciindi cakusaanguna, nomwapilukila inga mwaakwaamba boobu:
◼ “Mukukanana kwesu ciinda cainda, twakabuziba Bwami bwa Leza kuti nimfwulumende ini-ini iiya kulela nyika yoonse mboizulwa. Ibbaibbele litondezya kuti Jesu Kristo nguuya kuba mweendelezi wambubo. Sena inga mwayeeya bubotu bwakubaa mfwulumende ili boobu amweendelezi uli boobu?” [Amulindile kwiingula.] Amujalule broshuwa ya Ncayanda ku ciiyo 6. Kwiinda mukubelesya twaambo tusalidwe mumincali 6-7 acifwanikiso cili aapeeji 13, amutondezye Bwami bwa Leza ncobuya kucitila bantunsi kumbele. Amubale Daniele 2:44, alimwi naa kaceelede, amumutondezye bbuku lya Luzibo akumupa ciiyo ca Bbaibbele.
8 Ikuti mwakajene muntu umwi wakazumina kuti zikombelo zyamunyika zyaletela muntunsi mapenzi, inga mwabuzya boobu nomucita lweendo lwakupilukila:
◼ “Sena kuli nomwakayeeyede mbuli mbotunga twaziba cikombelo ncazumina Leza? [Amulindile kwiingula.] Eeyi broshuwa ya Ncinzi Leza Ncayanda Kulindiswe? ipa zitondeezyo zya bukombi bwakasimpe.” Amuye kuciiyo 13, akutondezya twaambo tosanwe tuli mumabala aasendekele mumincali 3-7. Inga mwazumanana kwiinda mukwaamba kuti: “Kuyungizya aakujana bukombi bwa kasimpe, tweelede kuzyiba Leza ncayanda kuli umwi aumwi wandiswe.” Amubale Johane 4:23, 24. Amumulombe kuzumanana kubandika makani aaya. Amuye kuciiyo 1 mubroshuwa, akutondezya mbuli mbotwiiya.
9 Nomupilukila kukuzumanana amubandi wa lukkomano lwamukwasyi, inga mwaamba cikozyenye amajwi aaccilila:
◼ “Notwakaswaangana lutaanzi, ndakabandika andinywe inzila yakubaa mukwasyi walukkomano, calo cili nkubelesya malailile aajanika mu Jwi lya Leza, Ibbaibbele. Notwaamba zyabweendelezi bubotu buyandika mumukwasyi wamazubaano, sena musyoma kuti Ibbaibbele talibeleki naa lilabeleka asunu?” [Amulindile kwiingula.] Amubatondezye bbuku lya Luzibo. Amuye kucibalo 2, akubala kuzubulula kuli mumuncali 13. Kwiinda mukubelesya twaambo tuli mumuncali 3, amupe ciiyo ca Bbaibbele camukwasyi.
10 Kwiinda mukubamba zilembedwe ziluzi, kulibambila kubotu, akupilukila cakufwambaana kuyakubagwasya kuzumanana akuyanda kwabo inga twatondezya musyobo waluyando lwabusibukobonyina luya kukwelelezya bantu banji munzila yalufwutuko.—Mt. 22:39; Gal. 6:10.