Mbomukonzya Kubelesya Broshuwa Yakuti Makani Mabotu Aazwa Kuli Leza!
Broshuwa Mpya Yakabambilwa Kutugwasya Kupanga Nyendo Zyakupilukila Akutalisya Ziiyo zya Bbaibbele
1. Ino nibroshuwa nzi mpya yakamwaigwa Kumuswaangano Wacooko wakajisi mutwe wakuti “Bamba Moyo Wako!” iyakabambilwa kutugwasya kupanga nyendo zyakupilukila akutalisya ziiyo zya Bbaibbele?
1 Kumuswaangano Wacooko wakajisi mutwe wakuti “Bamba Moyo Wako!,” twakakkomana kutambula broshuwa mpya yakutugwasya kupanga nyendo zyakupilukila akutalisya ziiyo zya Bbaibbele. Broshuwa ya Makani Mabotu Aazwa Kuli Leza! ilikozyenye abroshuwa ya Ncayanda Leza, mukuti ziiyo nzifwaafwi alimwi tazikatazyi kumvwa. Broshuwa eeyi yanjila mubusena bwabroshuwa ya Ncayanda Leza. Eeci ciyootugwasya kusololela ziiyo zya Bbaibbele katwiimvwi aanze. Broshuwa ya Ncayanda Leza yakali kubandika zyeelelo zya Bunakristo, zyalo zikonzya kubayumina basikwiiya bapya kutobela, pele eeyi broshuwa mpya yaamba makani mabotu aajanika mu Bbaibbele.—Mil. 15:35.
2. Nkaambo nzi broshuwa ya Makani Mabotu ncoyakabambilwa?
2 Nkaambo nzi ncoyakabambilwa? Bakwesu nyika yoonse mbwiizulwa balikulomba cintu cimwi cuuba-uba cikonzya kukwela bantu kukasimpe alimwi cikonzya kubelesyegwa kubasololela mukwiiya bbuku lya Bbaibbele Ncoliyiisya, bbuku ndyotubelesya mukusololela ziiyo zya Bbaibbele. Bantu ibayoowa kwiiya bbuku akaambo kakuti lilibonya kuti ndipati kanji-kanji balayanda kwiiya Bbaibbele kwiinda mukubelesya broshuwa. Kuyungizya waawo, ncuuba-uba kusandulula broshuwa mumyaambo minji.
3. Ino broshuwa eeyi iindene buti amabbuku aamwi aakwiiya?
3 Mboibambidwe: Mabbuku eesu manji ngotwiiya alembedwe munzila yakuti muntu ulakonzya kubala akumvwisya kasimpe kakunyina uumugwasya. Pele broshuwa eeyi iliimpene. Yakalembelwa kugwasya muntu kwiiya Bbaibbele pele kagwasyigwa asikumuyiisya. Aboobo, nomuyaabila kumuntu, cilainda kubota kubandika muncali omwe naa yobilo. Ijisi mincali mifwaafwi, aboobo mulakonzya kwiilanga-langa amuntu kamwiimvwi aanze naa kubusena bwamakwebo. Nokuba kuti cilikabotu kutalikila muciiyo 1, tulakonzya kutalikila muciiyo cili coonse cabroshuwa.
4. Ino broshuwa itugwasya buti kuyiisya kwiinda mukubelesya Bbaibbele kuligama?
4 Mumabbuku eesu manji, bwiinguzi kumibuzyo iisimbidwe bulakonzya kujanwa mumincali. Pele mubroshuwa eeyi, kanji-kanji bwiinguzi bujanika mu Bbaibbele. Bantu banji bayanda kwiiya kwiinda mukubelesya Bbaibbele kuligama kutali kubelesya mabbuku eesu. Pele magwalo manji aabikkidwe taazubuludwe pe. Aboobo, ayelede kubalwa mu Bbaibbele kuligama. Eeci cigwasya basikwiiya kuzyiba kuti nzyobaiya zizwa kuli Leza.—Is. 54:13.
5. Nkaambo nzi sikuyiisya ncaelede kulibambila kabotu ciiyo cimwi acimwi?
5 Broshuwa eeyi tayaapandululi magwalo oonse pe. Nkaambo nzi? Yakabambwa munzila iikulwaizya sikwiiya kubuzya mibuzyo akuzumizya mwiiyi kuti abelesye luzyibo lwakwe lwakuyiisya. Aboobo, cilayandika kulibambila kabotu ciiyo cili coonse. Kucenjezya: Mutanooambi zinji. Kupandulula Magwalo tulakuyanda. Pele sikwiiya ulakonzya kugwasyigwa kapati kuti twamulomba kupandulula ncayeeya kujatikizya ncolwaamba lugwalo. Kwiinda mukwiibelesya kabotu mibuzyo, tulakonzya kumugwasya kuyeeya cini ncolwaamba lugwalo lumwi alumwi.—Mil. 17:2.
6. Mbuti mbotukonzya kwiibelesya broshuwa eeyi: (a) kubusena bantu nkobatasyomi kuti Leza nkwali alimwi nkobatalisyomi Bbaibbele? (b) notuli mumulimo wakuŋanda aŋanda? (c) notutalisya ziiyo zya Bbaibbele kwiinda mukubelesya nzila yacigaminina? (d) notucita nyendo zyakupilukila?
6 Mbubwenya mbuli mabbuku amwi aabelesyegwa mukusololela ziiyo, broshuwa eeyi ilakonzya kwaabilwa kufwumbwa ciindi, kunyina makani naa mabbuku nzi aabilwa mumwezi ooyo. Banji bayookkomana kwiibelesya kutalisya ziiyo munzila yacigaminina. Kuyungizya waawo, mbubwenya mbokwakaambwa kumuswaangano wacooko, kwiibelesya nomupilukila kubantu bakatondezya luyandisisyo “kulakonzya kupa kuti muukkomanine mulimo wakucita nyendo zyakupilukila!”—Amubone tubbokesi tuli amapeeji 5-7.
7. Mbuti mbomukonzya kweendelezya ciiyo ca Bbaibbele kwiinda mukubelesya broshuwa eeyi?
7 Mbotukonzya Kweendelezya Ciiyo: Tulakonzya kutalika mubandi kwiinda mukubuzya mubuzyo uulembedwe mumabala aasiisya. Mpoonya amubale muncali alugwalo naa magwalo aasendekedwe. Amubelesye mibuzyo iili kabotu kutegwa mugwasye sikwiiya kumvwisya ncaamba magwalo. Mpoonya kamutanatalika cibeela citobela amumulombe mukamwini ŋanda kuti aingule mubuzyo uuli mumabala aasiisya kutegwa musinizye kuti wamvwisya. Kumatalikilo, cilakonzya kubota kulanga-langa buyo mubuzyo omwe uuli mumabala aasiisya. Mpoonya, mukuyakwaciindi inga twaulampya mubandi kutegwa katubandika ciiyo coonse.
8. Ncinzi ncotweelede kwaamba notuyanda kubala magwalo, alimwi nkaambo nzi?
8 Magwalo aalembedwe kuti “amubale” ngaaingula cacigaminina mubuzyo uuli mumabala aasiisya. Nomuyanda kwaamba lugwalo, mutanooambi kuti, “Mwaapostolo Paulo wakalemba kuti” naa, “Amubone ncaakasinsima Jeremiya.” Mukamwini ŋanda ulakonzya kuyeeya kuti tubala majwi amuntu buyo. Cilakonzya kubota kwaamba kuti, “Ijwi lya Leza lyaamba kuti” naa, “Amubone Bbaibbele ncolyakasinsima.”
9. Sena magwalo oonse aabikkidwe ayelede kubalwa notwiiya?
9 Sena tweelede kwaabala magwalo oonse aabikkidwe naa kubala buyo aalembedwe kuti “amubale”? Eeci cinooyeeme aabukkale bunooliko eeco ciindi. Kuli kaambo ncaakabikkilwa magwalo oonse. Lugwalo lumwi alumwi lujisi makani aayandika kubandikwa. Pele mubukkale bumwi, ambweni akaambo kakuti sikwiiya tajisi ciindi, luyandisisyo, naa takonzyi kubala kabotu, tulakonzya kubala buyo magwalo aalembedwe kuti “amubale.”
10. Ndilili notukonzya kutalika kwiiya bbuku lya Bbaibbele Ncoliyiisya?
10 Nomukonzya kutalika bbuku lya Bbaibbele Ncoliyiisya: Naa twali kubandika kwaziindi zili mbozibede alimwi akuti katujisi bubambe bwakwiiya busitikide, tulakonzya kutalika kwiiya mubbuku lya Bbaibbele Ncoliyiisya naa kuzumanana mubroshuwa ya Makani Mabotu kusikila twaimana. Basikumwaya balakonzya kubelesya bupampu kusala ciindi nobakonzya kucinca bbuku. Kuti naa twatalika kwiiya bbuku lya Bbaibbele Ncoliyiisya, sena tweelede kutalikila kumatalikilo? Kunyina milawo iibikkidwe mumakani aaya. Bantu baliindene. Nokuba boobo, basikwiiya banji balakonzya kugwasyigwa ikuti makani ngaonya baayiya alimwi mubbuku lya Bbaibbele Ncoliyiisya.
11. Nkaambo nzi ncotweelede kwiibelesya kabotu broshuwa eeyi mpya?
11 Munyika mutajaniki-janiki makani mabotu, tulijisi coolwe cipati cakwaambilizya makani aayinda kubota—makani aakuti Bwami bwa Leza bulalela akuti lino-lino buyooleta nyika mpya mwalo munooli bululami! (Mt. 24:14; 2 Pe. 3:13) Tulijisi lusyomo lwakuti bantu banji baumvwa mulumbe ooyu bayoozuminizya kumajwi aakasololelwa aakuti: “Ma! Abota atala lyamalundu maulu aayooyo uuleta makani mabotu, uulwiida bantu makani aaluumuno, uuleta makani mabotu loko, uulwiida bantu makani aalufutuko, uuambila Zioni kuti, Leza wako nguuendelezya.” (Is. 52:7) Atwiibelesye broshuwa eeyi mpya kwaambilizya makani mabotu aazwa kuli Leza kubantu balaanyota mucilawo cesu!
[Kabbokesi kali apeeji 5]
Kubusena Bantu Nkobatasyomi Kuti Leza Nkwali Alimwi Nkobatalisyomi Bbaibbele:
● Kumasena aamwi, basikumwaya bajana kuti majwi aakuti “Leza” alimwi a “Bbaibbele” asinkilizya mubandi. Kuti kacili boobo, mulweendo lwakusaanguna, inga cabota kubandika makani ngobayandisisya kumvwa bantu bali mucilawo mbuli makani aajatikizya ncoiyandika mfwulumende mbotu, nkotunga twajana lugwasyo lwamikwasyi, alimwi azyintu zilangilwa kumbele. Ambweni tulakonzya kubatondezya broshuwa ya Makani Mabotu notwamana kubandika kwaziindi zili mbozibede kutondezya mbotuzyiba kuti Leza nkwali alimwi akaambo ncotukonzya kulisyoma Bbaibbele.
[Kabbokesi kali apeeji 6]
Notuli Mumulimo Wakuŋanda Aŋanda:
● “Ndamuswaya kutegwa ndimutondezye mbocili cuuba-uba kuzyiba makanze aa Leza aakumbele aajatikizya ciyoocitikila bantu. Sena kuli nomwakalibuzyide naa Leza kuli nayooagwisya mapenzi? [Amulindile bwiinguzi.] Broshuwa eeyi ilatondezya mpomukonzya kujana bwiinguzi mu Bbaibbele. [Amumupe broshuwa, mpoonya mubale muncali wakusaanguna muciiyo 1, alimwi a Jeremiya 29:11.] Kweelana aceeci, sena ncamaanu kulindinywe kuti Leza uyanda kuti tukabe abuumi bubotu kumbele? [Amulindile bwiinguzi.] Kuti naa mwaikkomanina broshuwa eeyi, ndilakonzya kumusiila. Ciindi ciboola, inga twaakulanga-langa muncali wabili kutegwa tukajane bwiinguzi bwamu Bbaibbele kumubuzyo wakuti, ‘Ino Leza uyoozigwisya buti zyintu ziletela bantu mapenzi?’” Kuti mukamwini ŋanda kajisi ciindi mulweendo lwakusaanguna, mulakonzya kubala akubandika muncali wabili amagwalo otatwe aamu Bbaibbele aali mumuncali ooyu. Amupangane kuyoopilukila kutegwa mukabandike mubuzyo wabili muciiyo eeco.
● “Bantu banji balayanda kupaila, kwaambisya banoojisi mapenzi. Sena mulapaila zimwi ziindi? [Amulindile bwiinguzi.] Sena muyeeya kuti Leza ulaimvwa mipailo yoonse, naa mipailo imwi taimukkomanisyi? [Amulindile bwiinguzi.] Ndijisi broshuwa iitondezya mbomukonzya kujana bwiinguzi bwamu Bbaibbele kumibuzyo eeyi. [Amumupe broshuwa, mpoonya mubandike muncali wakusaanguna muciiyo 12 amagwalo aalembedwe kuti “amubale.”] Sena tacikkomanisyi kuti Leza ulilibambilide kutuswiilila? Pele kutegwa tugwasyigwe kapati amupailo, tweelede kumuzyiba kabotu Leza. [Amuunke kuciiyo 2 akumutondezya tutwe twamakani.] Kuti mwaikkomanina, ndilakonzya kumusiila broshuwa eeyi, mpoonya ciindi ciboola tulakonzya kuyoobala bwiinguzi bwamu Bbaibbele kumibuzyo eeyi iikkomanisya.”
● “Ndamuswaya akaambo kakuti bantu balalibilika kujatikizya ciyoocitikila nyika eeyi. Sena muyeeya kuti bukkale kuli nobuyooba kabotu? [Amulindile bwiinguzi.] Bantu banji balagambwa kuzyiba kuti Bbaibbele lijisi makani mabotu aakonzya kutupa bulangizi. Amubone mibuzyo eeyi imwi iingulwa mu Bbaibbele.” Amumupe broshuwa, akumulomba kuti asale mubuzyo omwe uumukkomanisya akati kamibuzyo iili apeeji yamamanino. Mpoonya muunke kuciiyo eeco, akumutondezya mbociyiigwa. Amupangane kupilukila kutegwa mukalange-lange mubuzyo uutobela muciiyo eeco.
[Kabbokesi kali apeeji 7]
Amusole Nzila Yacigaminina:
● “Ndamuswaya kutegwa ndimwaambile pulogilamu mpya yakwiiya Bbaibbele. Broshuwa eeyi ijisi ziiyo zili 15 zitondezya mpomukonzya kujana bwiinguzi mu Bbaibbele lyanu kumibuzyo iiyandika kapati. [Amumutondezye civwumbyo cakumatalikilo acakumamanino.] Sena kuli nomwakasolede kwiiya Bbaibbele? [Amulindile bwiinguzi.] Andimutondezye mbozili zyuuba-uba ziiyo. [Amulange-lange muncali wakusaanguna ansi aamubuzyo watatu muciiyo catatu, alimwi akubala Ciyubunuzyo 21:4, 5. Kuti kaceelela, amulange-lange muncali uutobela amagwalo aalembedwe kuti “amubale.”] Kuti mwaikkomanina, ndilakonzya kumusiila broshuwa eeyi. Tumukulwaizya kuti musole kwiiya Bbaibbele nociba ciindi comwe buyo. Mpoonya kuti mwacikkomanina ciiyo, mulakonzya kuzumanana. Ciindi ciboola, tulakonzya kulanga-langa ciiyo cakusaanguna. Amubone kuti ciiyo eeci cili buyo apeeji yomwe.”
[Kabbokesi kali apeeji 7]
Amubatondezye Nomucita Lweendo Lwakupilukila:
● Ciindi notupilukila kuyooswaya muntu wakatondezya luyandisisyo, tulakonzya kwaamba kuti: “Cabota kumubona alimwi. Ndamuletela broshuwa eeyi iipa bwiinguzi bwamu Bbaibbele kumibuzyo minji iikkomanisya. [Amumupe broshuwa, mpoonya amumulombe kuti alange acivwumbyo cakumamanino.] Ino nceecili ciiyo cimukkomanisya kapati? [Amulindile bwiinguzi. Mpoonya amuunke kuciiyo ncaasala.] Andimutondezye broshuwa eeyi mboikonzya kubelesyegwa kujana bwiinguzi bwamu Bbaibbele.” Amutondezye mbocicitwa ciiyo kwiinda mukubandika muncali omwe naa yobilo amagwalo aalembedwe kuti “amubale.” Oobu mbocili cuuba-uba kutalisya ciiyo ca Bbaibbele! Amumusiile broshuwa mukamwini ŋanda, akupangana kuyoopilukila. Mwaakumanizya ciiyo, mulakonzya kubandika ciiyo cimbi ncaasala mukamwini ŋanda naa kutalikila kumatalikilo aabroshuwa.