Amusyome Jehova Uupa Kuti Zintu Zimene
1 “Ilwakusaanguna ndakabona mbocikkomanisya kugwasya kutalisya mbungano mpya. Kutegwa mbungano eyi ibambwe cakatola myaka yobile katubeleka cabusungu, katupaila lyoonse alimwi katusyoma muli Jehova uucita kuti ‘zintu zimene.’” Oobo mbwaakalemba umwi mupainiya musungu wakaiya kusyoma Jehova uumenya zintu. (1 Kor. 3:5-9) Notuyandaula bantu bayanda zintu zyakumuuya, aswebo tuyandika kusyoma mulugwasyo lwa Leza kutegwa cikonzeke kuzyala micelo mumulimo wesu.—Tus. 3:5, 6.
2 Izintu Zimena Ziyanda Kulimina: Imbuto zyakasimpe ziyanda kulimina nozinga zyakomena. Ikupilukila mbweena buzuba naa kwainda mazuba obile kuzwa leelyo nomwakabandika amuntu cilagwasya. Amube bantu basamausya alimwi baseka-seka. Amumukkazike moyo muntu. Mutabi ndinywe mwaambaula mulikke. Amumulekele kuti amuzibe alimwi amutondezye kuti mulamuyanda muntu oyu lwakwe.
3 Mu July kuyakusika mu August, tunoomwaya kapati mabroshuwa aasiyene-siyene kubantu mbotuswaanganya. Pele tweelede kuyeeya bantu mbotwajana ibatondezya kuti balayanda kwiiya alimwi abaabo baatambula mabroshuwa. Tulacita obo kwiinda munyendo zyakupilukila alimwi akubalomba kubayiisya Bbaibbele. (Mt. 28:19, 20) Inga twatalisya ziiyo mukubelesya broshuwa ya Ncayanda. Malailile aya one aatobela ambweni inga amugwasya.
4 Ikuti naa mwakabandika amuntu uukopedwe azintu mbozibede munyika, mulakonzya mwazumanana amubandi amajwi aakuti:
◼ “Ndasyoma andinywe cilimukatazizye kubona bukkale bwabantu mbobuya bubija. Tumvwa makani aausisya aakulwana mumaanda aapenzya bana, bazyali alimwi abanabukwetene. Alimwi kuboneka kuti bantu takucibagwisyi moyo kubba naa kubeja kufwumbwa kuti bajana ncobayanda. Sena muyeeya kuti Leza ulaamakani anzila bantu njobapona buumi bwabo? [Amulindile kwiingulwa.] Leza wakabikka milawo yabantu mbobeelede kukkala, alimwi eyo milawo tiili miyumu kulindiswe.” Amubale 1 Johane 5:3. Mpoonya amubatambike broshuwa ya Ncayanda, mwiivwunune kuciiyo 10. Amubale muncali wakusaanguna. Amutondezye mabala amajwi aasendekedwe kulembwa kumatalikilo aamincali 2-6 akubuzya ulaamunzi amwaambile mucito ngwayeeya kuti mubi kapati mubukkale. Amubale muncali uujatikizya kaambo ako akubala lugwalo lomwe naa obile aamumuncali oyo kuti naa kakuli ciindi. Amumanizye mubandi wanu kwiinda mukubala muncali wa 7, mpoonya amupangane ciindi ncomuyoopilukila kutegwa mukazumanane amubandi wanu.
5 Kuli baabo mbomwaswaangana limwi ibaboneka kuti mbaasimukwasyi, inga mwaamba kuti:
◼ “Sena muyeeya kuti ncamaanu kulangila kuti Mulengi ulatupa zibelesyo zyakuyasya mukwasyi uukonzya kuzwidilila?” Amulindile kwiingulwa. Amubatondezye broshuwa ya Ncayanda, muvwunune kuciiyo 8 akupandulula kuti eyi broshuwa ijisi njiisyo zyamu Bbaibbele zyamuntu woonse wamumukwasyi. Amubalombe bamuzumizye kubatondezya mboibelesegwa broshuwa antoomwe a Bbaibbele ikutegwa bagwasigwe kapati anjiyo. Amutobele malailile aajanika kupeeji 2 yabroshuwa. Amupangane ciindi ncomunga mwapilukila kutegwa muzumanane aciiyo, naa kuti kamuli mwacimanizya coonse kuciiya, mukatalike cimbi ciiyo ncanga walisalila mubroshuwa walo ulaamunzi.
6 Njeeyi nzila yakaanzambwene njomunga mwabelesya kulomba kutalisya ciiyo ca Bbaibbele. Amutondezye broshuwa ya “Ncayanda,” mwaambe kuti:
◼ “Eeyi broshuwa ijisi ciiyo ca Bbaibbele coonse ciyandika, ibandika njiisyo zyantalisyo zya Bbaibbele zyoonse. Kupeeji imwi aimwi, mulajana kwiingula kwamibuzyo yakatazya bantu kwamyaanda yamyaka. Mucikozyanyo, Ino Leza ujisi makanze nzi anyika?” Amuvwunune kuciiyo 5, mubale mibuzyo yakumatalikilo aaciiyo. Amumubuzye ulaamunzi amwaambile mubuzyo umukonda kapati, kuzwa waawo mubale mincali iijatikizya mubuzyo oyo akubala magwalo aayelede. Amupandulule kuti kwiingula kuzulide kwamibuzyo imbi akwalo takukatazyi kujana mbweena buyo mbuli kwayooyu mubuzyo. Amubalombe kumuzumizya kupilukila kutegwa mukabandike umbi mubuzyo akwiingula kwawo.
7 Ayanda inga mwasola nzila nguba-uba yakutalisya ciiyo ca Bbaibbele kwiinda mukwaamba kuti:
◼ “Sena mwalizi kuti mulakonzya kwiingulwa kumubuzyo mupati wa Bbaibbele muciindi cisyoonto buyo? Mucikozyanyo, . . .” Amwaambe mubuzyo wakumatalikilo aaciiyo cimwi camu broshuwa, oyo ngomuyeeya kuti inga wamukonda muntu oyo. Izikozyanyo zyamibuzyo njomunga mwabelesya inga mwazijana kumincali ya 15 alimwi a 16 mupepa lyamukati lya Mulimo Wesu Wabwami wa May 1997 ilyamutwe wakuti: “Amuliyumye-yumye Ikucita Nyendo Zyakupilukila.”
8 Ikutambula mukuli wakucita nyendo zyakupilukila akucita ziiyo zya Bbaibbele cakukkomana cipa kuti tube “basimilimonyina Leza.” (1 Kor. 3:9) Twanoobeleka canguzu kusosela luyandisisyo ndotwajana alimwi akusyoma Jehova uucitya kuti zintu zimene, tulajana lukkomano ndotutakonzyi kujana kumulimo umbi uli woonse.