Makamu-Makamu Ali Mukuyungizigwa
1 Mbuli mbocakabede mumwaanda wamyaka wakusaanguna, ikuvwula kuli mukucitika mumbungano ya Bunakristo mazubaano kulilibedelede. (Inc. 2:41; 4:4) Mwaka wamana, basikwiiya bapya basika ku 366,579 bakabapatizigwa, icaamba kuti mweelwe waakati-kati buzubaa buzuba wakainda ku 1,000! Bainda ku 1,000,000 bakabapatizigwa mumyaka yotatwe yainda. Ncobeni, Jehova uyaabuyungizya makamu-makamu aabasyoma.— Inc. 5:14.
2 Bunji bwabapya balo batabuzibide bukkale bwa Bunakristo beelede kugwasigwa akuyiisigwa kuzwa kuli baabo basimide mulusyomo. (Rom. 15:1) Akati ka Banakristo bakusaanguna kwakali bamwi bakali kunga, nokuba kuti kwakaindide myaka buya kuzwa nobakabapatizigwa, bakaalilwa ‘kuya kumbele kumakani aabupati.’ (Heb. 5:12, 6:1) Nkakaambo kaako, mulugwalo lwakwe kuba Hebrayo, Paulo wakatondezya masena omo mwalo Banakristo mubeelede kukomena munzila yakumuuya. Ino aaya mmasena nzi alimwi ino lugwasyo lweelede inga lwapegwa buti?
3 Ikwiiya Zilengwa Zibotu Zyakubala: Kweelana amalailile aa Paulo, kuba sikwiiya mubotu kujatikizya kwiiya cakuzumanana, kwiinduluka, alimwi akubelesya “zilyo ziyumu-yumu” zyalo zipegwa a mbunga ya Jehova. (Bahi. 5:13, 14, Ci; amubone Ngazi Yamulindizi yamu Cingisi ya August 15, 1993, mapeeji 12-17.) Mukubanjizya aaba basyomi bapya mumibandi yakumuuya alimwi akubaambila twaambo tubotu twabwini ntomwajana kwiinda mukuvwuntauzya kwanu nobeni, inga mwabakulwaizya kwiiya zilengwa zibotu zyakubala. Ndiza muziindi inga mwamutamba mupya kubaa ndinywe muciiyo canu nobeni nemuba muciiyo canu camukwasyi.
4 Ikujanika Kumiswaangano Lyoonse: Icitondezyo canu cikkalikene alimwi amajwi mabotu aakukulwaizya ziya kugwasya bapya mumbungano kutantamuka ciimo cimbi iceelede kucenjela icakaambwaa Paulo— “cilengwa” bamwi ncobajisi cakutajanika aamiswaangano ya Bunakristo. (Bahi. 10:24, 25, Ci) Amubagwasye kuteelela kuti miswaangano njentambo yakumuuya yabuumi ibaangilide kumbungano. Amutole ntaamu kubacitya kuti balimvwe kuti balitambwidwe camaanza obile mubunyina bwesu.
5 Kusikila Jehova Alusyomo: Kutegwa tuzunde kukompama kwamubili alimwi akulubizya nkaambo kambuli mbotubede, tweelede kumuyandaula Jehova mumupailo, kumwaambila mizeezo yesu mipati anzyotulibilika kapati. Bapya baleelede kwiiya kuti kwiinda mukumukombelezya Jehova kutegwa agwasye, mbuli Paulo mbwaakakulwaizya, tabeelede kuyoosika nkobawa buya. (Heb. 4:15, 16, 10:22) Kuluula mbuli mbocakabede kuli ndinywe muciindi eeci kuya kuyumya lusyomo lwamupya lwakuti Jehova ulamvwa mipailo iizwa ansi a moyo uusinizide.
6 Kulibikkila Ciindi ca Mumulimo: Paulo alimwi wakatondezya kuti eelyo ‘notupaila Leza lyoonse cipaizyo cakulumba’ cilatuyumya-yumya munzila yakumuuya. (Heb. 13:15) Sena inga mwatamba sikumwaya mupya umwi kubaa ndinywe mububambe bwanu bwa nsondo-ansondo bwamulimo wamumuunda? Antela nywebo nyobilo inga mwalibambila nzila mbuli mbomuya kukambauka nekuba kulanga-langa cibeela cimwi ca mumulimo ooyo mupya ncatana solede.
7 Makamu-makamu aali mukuyungizigwa aletela kukkomana kupati. Ikuzumanana kwesu mukuyiisya akulaya bapya mumbungano kuyakubagwasya kubaa lusyomo lusimide, lwalo lweelede ‘kuyoobafutusya.’—Heb. 3:12, 13; 10:39.