Boonse Balakonzya Kutola Lubazu Mukugwasya Bantu Kuba Basikwiiya Bapya
1 Sikwiiya mupya tagwasigwi buyo akusoleka kwamuntu omwe. Jehova ulakonzya kubelesya “basimilimonyina” boonse kuti bagwasye basikwiiya Bbaibbele kuyaambele kumuuya. (1 Kor. 3:6-9) Aumwi wesu kumugama ulakonzya kugwasya bapya ikutali buyo kwiinda mukwiingula camoyo oonse lyamiswaangano ya Bunakristo pele alimwi kwiinda mukulilemeka kwesu, kwalo ikupa bumboni bwini-bwini bwakuti muuya wa Leza ulabeleka mulindiswe. (Joh. 13:35; Gal. 5:22, 23; Ef. 4:22, 23) Ncinzi acimwi cikonzya kucitwa kutegwa tubagwasye bapya?
2 Mbungano Yoonse: Toonse inga twababikkila maano aabo batalika kujanika kumiswaangano kwiinda mukutaanguna kubaanzya akubandika ambabo kaitanatalika anoyamana miswaangano. Mwaalumi umwi kayeeya ciindi cakusaanguna naakajanika kumbungano, wakaamba kuti: “Ndakajana bantu banji bajisi luyando lwini-lwini, bantu mbondatakalizi balo mbondakaziba mubuzuba bomwe buyo ikwiinda baabo mbondakajanide kucikombelo nkundakali kuunka kuzwa kubwana. Cakalibonya kuti ndakakajana kasimpe.” Wakabbapatizigwa nikwakainda myezi iili ciloba kuzwa lweendo lwakusaanguna kujanika kumuswaangano wambungano.
3 Amumulumbaizye kapati sikwiiya Bbaibbele ciindi nayaambele kumuuya. Sena ulaliyumya kukukazigwa? Sena ulajanika kumiswaangano lyoonse? Sena wakatalika kwiingula lyamiswaangano? Sena wakalilembya mu Cikolo Camulimo Weendelezyegwa a Leza naa wakatalika kutola lubazu mumulimo? Amumulumbaizye akaambo kakuyaambele nkwaakacita. Eeci ciyoomukulwaizya alimwi akumuyumya-yumya.—Tus. 25:11.
4 Sikweendelezya Ciiyo ca Bbaibbele: Basikumwaya bamwi bacikonzya kugwasya mbobaiya limwi Bbaibbele kuzibilana amuntu aumwi uuli mumbungano kwiinda mukulomba basikumwaya bamwi kuti babasindikile kuciiyo. Amumutambe sikwiiya kumiswaangano yambungano cakufwambaana kweelana ambomukonzya. Atalika kujanika kumiswaangano, amumuzibye kubantu bamwi. Sena ujisi penzi mukuzunda cilengwa cibi mbuli kufweba? Sena kuli umwi wamumukwasyi uumukasya kwiiya? Ulakonzya kugwasyigwa kwiinda mukubandika asikumwaya wakajisi cilengwa eeci alimwi wakalizunda penzi eeli.—1 Pet. 5:9.
5 Bapya bayandika lugwasyo lwakumuuya kuzwa kumbungano. Toonse tulakonzya kubagwasya kuyaambele kwiinda mukubabikkila maano kapati.