Mbomukonzya Kubelesya Broshuwa yakuti Ino Mbaani Bacita Kuyanda kwa Jehova Mazuba Aano?
Broshuwa Mpya Yakabambilwa Kusololela Basikwiiya Bbaibbele Kumbunga
1. Ino ntwaambo nzi totatwe ncoyakabambilwa broshuwa ya Kuyanda kwa Jehova?
1 Sena mwakatalika kale kwiibelesya broshuwa mpya yakuti Ino Mbaani Bacita Kuyanda kwa Jehova Mazuba Aano? Yakabambilwa (1) kugwasya basikwiiya Bbaibbele kuti batuzyibe kabotu swebo Tobakamboni ba Jehova, (2) kubagwasya kwiiya kujatikizya milimo yesu, alimwi (3) kubatondezya mboibeleka mbunga yesu. Mubroshuwa ya Kuyanda kwa Jehova, ciiyo cimwi acimwi cili apeeji nsini alimwi cilakonzya kuyiigwa mumaminiti buyo aali 5 kusikila ku 10 ciindi nomwamanizya ciiyo ca Bbaibbele cimwi acimwi.
2. Amupandulule mboipangidwe broshuwa eeyi.
2 Mboibambidwe: Broshuwa eeyi yakabikkwa muzibeela zyotatwe, cimwi acimwi cilabandika cibeela ciindene ca mbunga ya Jehova kweelana ambotwabona atala aawa. Mutwe waciiyo cimwi acimwi muziiyo zili 28 ulembedwe kauli mubuzyo, mpoonya tutwe twamakani tutobela ituli mumabala aasiisya twiingula mubuzyo ooyo. Zifwanikiso izizwa kuzisi zili 50 zililembedwe kutondezya mulimo wesu nkousikide nyika yoonse. Ziiyo zili mbozibede zijisi tubbokesi twakuti “Amuzyibe Zinji,” twalo twaamba zyintu nzyomukonzya kukulwaizya sikwiiya wanu kubuzya.
3. Mbuti mbotukonzya kwiibelesya broshuwa ya Kuyanda kwa Jehova?
3 Mbomukonzya Kwiibelesya: Amutalike kwiinda mukubatondezya mubuzyo uuli ngomutwe waciiyo. Mpoonya, mwanoobala ciiyo antoomwe, amukankaizye kapati tutwe twamakani tuli mumabala aasiisya. Mwamana, amulange-lange mibuzyo yakwiinduluka iili ansi apeeji. Mulakonzya kucibala ciiyo coonse naa kucibala akucibandika muzibeela-beela. Amubelesye bupampu nomusala magwalo aatazubulwidwe ngomukonzya kubala. Mutanoolubi kulanga-langa zifwanikiso alimwi atubbokesi twakuti “Amuzyibe Zinji.” Ziindi zinji, ziiyo zyeelede kubandikwa kweelana ambozitobelene. Nokuba boobo, inga mwaanguluka kubandika ciiyo cili kumbele caamba makani aayandika mpoona-mpoona. Mucikozyanyo, ikuti kuli muswaangano mupati uuli kumbele, mulakonzya kubandika ciiyo 11.
4. Nkaambo nzi ncomukkomene kuba acibelesyo eeci cipya?
4 Ciindi notwiiya Bbaibbele amuntu umwi, tumugwasya kuzyibana kabotu a Taateesu wakujulu. Nokuba boobo, alimwi tuyandika kubayiisya kujatikizya mbunga ya Jehova. (Tus. 6:20) Eelo kaka tulikkomene kuba acibelesyo eeci cipya citugwasya kucita boobo!