Ino Mbaani Bacita Kuyanda kwa Jehova Mazuba Aano?—Mboibelesyegwa Broshuwa Eeyi

Broshuwa yakuti Ino Mbaani Bacita Kuyanda kwa Jehova Mazuba Aano? yakabambilwa kubandika abasikwiiya Bbaibbele kumatalikilo naa kumamanino aaciiyo.a Ziiyo 1 kusikila ku 4 zigwasya basikwiiya kutuzyiba kabotu, ziiyo 5 kusikila ku 14 zibagwasya kuzyiba milimo yesu, alimwi ziiyo 15 kusikila ku 28 zibatondezya mbunga yesu alimwi anzyotucita. Kanji-kanji cilainda kubota kuzilanga-langa ziiyo eezyi mbozitobelene ccita kuti ciiyo cimwi cibandika makani aayandika cakufwambaana. Ciiyo cimwi acimwi cilampa buyo kusikila apeeji lyomwe alimwi cilakonzya kubandikwa abasikwiiya banji mumaminiti aali 5 kusikila ku 10.

• 

  Amubikkile maano kumubuzyo walo uuli ngomutwe waciiyo

• Amubale ciiyo antoomwe, coonse mbocibede naa muzibeela-beela

• Amubandike nzyomwabala. Amubelesye mibuzyo iili aansi aapeeji alimwi azifwanikiso. Amubale alimwi akubandika magwalo aatondezyedwe ikuti kakuyandika. Amukankaizye kuti tutwe tujisi mabala aasiisya ntotwiingula mubuzyo ulaatala

• Ikuti naa kuli kabbokesi kakuti “Amwiiye Zinji”, amukabale antoomwe alimwi amumukulwaizye sikwiiya kuzicita eezyo zyaambwa