Ibbuku lya Bbaibbele Ncoliyiisya—Cibelesyo Cesu Cipati Cigwasya Mukuyiisya Bbaibbele
1 Eelo kaka twakakkomana kutambula bbuku lya Ino Ncinzi Cini Bbaibbele Ncoliyiisya? ku Muswaangano wa Cooko wa “Atumumvwide Leza”! Basimuswaangano bakakondwa kutambula bbuku libageme kumamanino aapulogilamu yabuzuba bwabili. Ino mbuti bbuku lipya eeli ligwasya mukuyiisya mboliyoobelesyegwa? Libambilidwe kuba cibelesyo cesu cipati cigwasya mukuyiisya Bbaibbele. Nokuba kuti bbuku lipya liyakuba lyakumwaya mu March, basikumwaya bakulwaizyigwa ikutalika lino kulibelesya mukutalisya akweendelezya ziiyo zya Bbaibbele.
2 Ziiyo zya Bbaibbele Zili Mukweendelezyegwa: Basikumwaya beendelezya ziiyo zya Bbaibbele mubbuku lya Luzibo naa broshuwa ya Ncayanda beelede kubelesya bupampu mukuzyiba mbobakonzya alimwi aciindi nobeelede kutalika kwiiya bbuku lipya. Ikuti ciiyo cakatalisyigwa ino-ino, mulakonzya kutalikila buyo kumatalikilo aabbuku lipya. Ikuti kamusakene mubbuku lya Luzibo, mulakonzya kuzumanana aciiyo mucibalo ceendelana abbuku lya Bbaibbele Ncoliyiisya. Ikuti kamuli afwaafwi kulimanizya bbuku lya Luzibo, inga mwasala kuti mulimanizye bbuku eelyo.
3 Cakutazumbauzya, toonse tulizyi bantu ibayakugwasyigwa kwiinda mukwiiya bbuku lya Bbaibbele Ncoliyiisya. Ino mulekela nzi kwaambila muntu aumwi zyaciiyo ca Bbaibbele mubbuku eeli ligwasya kwiiya ilipandulula kasimpe kamu Bbaibbele munzila iitobeleka? Mucikozyanyo, aabo bakayiiya kale broshuwa ya Ncayanda naa bbuku lya Luzibo pele tiibakayaambele kutegwa balyaabe akubbapatizyigwa, inga basala kutalika ciiyo cabo kubelesya bbuku lipya. Bazyali inga basala kubelesya bbuku eeli nobayiisya luzibo lwini-lwini lwakuziba makanze aa Leza kubana babo.—Kol. 1:9, 10.
4 Ikwiiya Bbuku Lyabili: Sena kuli bubambe kuli sikwiiya Bbaibbele bwakwiiya bbuku lyabili mwalimanizya kuliyiiya bbuku lya Ino Ncinzi Cini Bbaibbele Ncoliyiisya? Inzya. Ikuti calibonya kuti sikwiiya uyaambele nokuba kuti tabindaani alimwi ulatondezya kulumba kuli zyeezyo nzyaiya, mulakonzya kuzumanana aciiyo ca Bbaibbele kubelesya bbuku lya Amukombe Leza Mwini-Mwini Uuli Alikke. Tulisinizyide kuti bbuku lya Bbaibbele Ncoliyiisya liyakuba cibelesyo cigwasya kapati notubeleka mulimo wesu iwakugwasya bantu kuba basikwiiya.—Mt. 28:19, 20.