Mbolikonzya Kubelesyegwa Bbuku lya “Luyando lwa Leza” Kweendelezya Ziiyo zya Bbaibbele

1. Ino bbuku lya “Luyando lwa Leza” lyakabambilwa nzi?

¹ Elyo kaka twakakkomana notwakamvwa kwaambilizyigwa kwabbuku lipya lyakuti “Amuliyobole Muluyando lwa Leza” amuswaangano wacooko wakajisi mutwe wakuti “Amusololelwe Amuuya wa Leza”! Kweelana ambokwakaambilizyigwa, bbuku eeli tiilyakalembelwa kuti kalibelesyegwa kuyiisya njiisyo zyantalisyo zyamu Bbaibbele pele lyakalembelwa kuti litugwasye kuzyiba akutobela zyeelelo zya Jehova zyambotukonzya kulilemeka. Ibbuku eeli talyeelede kwaabilwa mumulimo wakuŋanda aŋanda.

2. Ino mbuti mbolinoobelesyegwa bbuku eeli alimwi nkuubantu bali buti?

² Eeli bbuku ndelinoobelesyegwa ikwiiya abantu mbotwiiya limwi Bbaibbele twamana kwiiya bbuku lya Ncoliyiisya Bbaibbele.a Mutalubi kuti bantu baliindene mbobaiya ambobazibelesya zyintu nzyobaiya. Muntu aumwi weelede kuyiisyigwa kweelana ambwabede. Mweelede kubona kuti icibalo ncomwiiya wacimvwa ngomuyiisya. Ibbuku eeli talyeelede kubelesyegwa kwiiya abantu bakaiya kale mabbuku manji pele ibataswaangani alimwi ibatayandi kucinca bukkale bwabo kweelana akasimpe nkobakaiya mu Bbaibbele.

3. Ino ncinzi ncotukonzya kucita ikuti katwiiya amuntu mubbuku lya Amukombe Leza?

³ Ikuti kamwiiya amuntu bbuku lyakuti Amukombe Leza alimwi muyanda kulimanizya buya, mulakonzya kulimanizya akumukulwaizya sikwiiya kuti alibalile bbuku lya “Luyando lwa Leza.” Ikuti naa tacili boobo, inga cabota kulitalika buya ibbuku lipya. Mbweena mbuli bbuku lya Bbaibbele ncoliyiisya, mulakonzya kwaalanga-langa makani aayungizyidwe ikuti kakuyandika kucita oobo.

4. Ino ncinzi ncotweelede kucita ikuti sikwiiya wabbapatizyigwa katana kumanizya kwiiya mabbuku oonse obile, lya Bbaibbele Ncoliyiisya alya “Luyando lwa Leza”?

⁴ Ikuti sikwiiya wabbapatizyigwa katana kumanizya kwiiya mabbuku oonse obile, iciiyo ceelede kuzumanana kusikila walimanizya bbuku lya “Luyando lwa Leza.” Nokuba kuti sikwiiya wabbapatizyigwa, mulakonzya kulipoota ciindi, nyendo zyakupilukila alimwi aciiyo. Sikumwaya ngomwabeleka limwi nomweendelezya ciiyo eeci awalo ulakonzya kulemba ciindi ikuti naa wali kutola lubazu.

5. Ino mbuti bbuku lya “Luyando lwa Leza” mbolikonzya kubelesyegwa kugwasya basikumwaya batacisungweede mumulimo wakukambauka?

⁵ Ikuti naa umwi wamu Kkomiti Yamulimo Yambungano wamulomba kuti mweendelezye ciiyo ca Bbaibbele kumuntu uutacisungweede mumulimo wakukambauka, mulakonzya kulombwa kuti mwiiye anguwe zibalo zimwi zili mubbuku lya “Luyando lwa Leza.” Ziiyo zili boobo tazyeelede kuzumanana kwaciindi cilamfwu. Taliliboteli kaka bbuku eeli lipya, ilyakabambilwa kutugwasya kuti tukkalilile “muluyando lwa-Leza”!—Juda. 21.

Bupanduluzi buyungizidwe