Kabbokesi Kamubuzyo

◼ Mabbuku nzi obilo aayelede kuyiigwa ambotwiiya limwi Bbaibbele?

Ibbuku lya Bbaibbele Ncoliyiisya ndebbuku ndetubelesya kapati kutalisya akweendelezya ziiyo zya Bbaibbele zyaaŋanda. Nokuba kuti takukasyidwe kubelesya bbuku limbi naa katulakiti kutalisya ciiyo, cakutasowa ciindi mweelede kutalika bbuku lya Bbaibbele Ncoliyiisya. Kuli zintu zibotu zyacitika akaambo kakubelesya bbuku lya Bbaibbele Ncoliyiisya kutalisya ziiyo zya Bbaibbele.

Mbomwamanina buyo kwiiya bbuku lya Bbaibbele Ncoliyiisya alimwi mwabona kuti sikwiiya uyaambele, mweelede kutalika kwiiya bbuku lya Amukombe Leza. (Kol. 2:7) Apeeji 2 kupanduludwe ncolyakalembelwa bbuku eeli: “Ibbaibbele likulwaizya boonse aabo bamuyanda Leza ‘kumvwisya . . . bulamfu bwakuya mujulu, abulamfu bwakuya ansi’ bwamakani aakwe mabotu aakasimpe. (Baefeso 3:18, Ci) Ooyu ngomulimo ngolyakabambilwa bbuku eeli. Tusyoma kuti liyoomugwasya kuyaambele munzila yakumuuya alimwi akulibambila kabotu ikweenda munzila iimanikide iisololela kubuumi munyika mpya ya Leza iiluleme.”

Ikuti sikwiiya weelela kubbapatizigwa katanamanizya mabbuku oonse obilo, mweelede kuzumanana kwiiya kusikila wamanizya bbuku lyabili. Nokuba kuti sikwiiya ulibbapatizidwe, weendelezya ciiyo ulakonzya kulemba ciindi, nyendo zyakupilukila aciiyo ca Bbaibbele. Sikumwaya uunka ayooyo weendelezya ciiyo awalo ulakonzya kulemba ciindi ikuti naa watola lubazu.