Kabbokesi Kamubuzyo

◼ Ino tweelede kwiiya ciindi cilamfwu buti asikwiiya Bbaibbele uucita kabotu?

Cili kabotu kuzumanana kwiiya asikwiiya Bbaibbele uucita kabotu mane kusikila wamanizya mabbuku oonse obilo—Ino Ncinzi Cini Bbaibbele Ncoliyiisya? a ‘Amuliyobole Muluyando lwa Leza.’ Oobu mboceelede kuba nokuba kuti sikwiiya wabbapatizyigwa katanamanizya mabbuku oonse obilo. Tulakonzya kuzumanana kulemba mawoola, nyendo zyakupilukila, aciiyo nokuba kuti wakabbila. Kuti naa twaunka asikumwaya uumbi kuciiyo eeci alimwi awalo watola lubazu, ulakonzya kulemba mawoola.—Amubone Mulimo Wesu wa Bwami wa March 2009, apeeji 2.

Cilayandika kuti basikumwaya bapya baba antalisyo iili kabotu mukasimpe katutanaleka kwiiya ambabo. Beelede ‘kusimpa miyanda’ muli Kristo alimwi “akukkalikila mulusyomo” kutegwa baliyumye mumasukusyo ngobakonzya kujana. (Kol. 2:6, 7; 2 Ti. 3:12; 1 Pe. 5:8, 9) Kuyungizya waawo, kutegwa bacikonzye kuyiisya bambi munzila mbotu, beelede “kuba aluzyibo lwini-lwini lwakasimpe.” (1 Ti. 2:4) Kwiinda mukwiiya ambabo mabbuku oonse obilo, tubagwasya kweendela “[mu]nzila iitola kubuumi.”—Mt. 7:14.

Baalu kabatanazumizya muntu uuyanda kubbapatizyigwa, beelede kubona kuti ulazimvwisya kabotu njiisyo zyamu Bbaibbele zyantalisyo alimwi upona kweelana anjiisyo eezyo. Baalu beelede kubikkila maano ikapati nobalanga-langa sikwiiya uutanamanizya kwiiya bbuku lyakusaanguna. Ikuti umwi teeleli kubbapatizyigwa, baalu beelede kubona kuti wagwasyigwa kutegwa akeelele kubbapatizyigwa kumbele.—Amubone bbuku lyakuti, Bakamantene Mukucita Kuyanda kwa Jehova, amapeeji 217-218.

[Majwi aakwelelezya sikubala aali apeeji 2]

Cilayandika kuti basikumwaya bapya baba antalisyo iili kabotu mukasimpe