Amubagwasye ‘Kukkalikila Mulusyomo’

Cilakkomanisya kapati kubona Jehova mbwaulongezya mulimo wakuyobolola, nkaambo mwaka amwaka kulabbapatizyigwa bantu bainda ku 250,000. (Dt. 28:2) Kufwumbwa kuti sikumwaya wamugwasya sikwiiya kusikila wabbapatizyigwa, kanji-kanji sikumwaya inga ulaleka kumuyiisya akubikkila maano kugwasya bambi. Awalo sikwiiya inga wayanda kuleka kwiiya kutegwa abeleke ciindi cinji mumulimo wakukambauka. Nokuba boobo, cilayandika kapati kuti basikwiiya Bbaibbele baba antalisyo mbotu mukasimpe. Bayandika kuti ‘kabasimpide miyanda’ muli Kristo alimwi “akukkalikila mulusyomo.” (Kol. 2:6, 7; 2 Ti. 3:12) Sikwiiya abbapatizyigwa, weelede kuzumanana aciiyo ca Bbaibbele kusikila waamanizya mabbuku oonse obilo aa Bbaibbele Ncoliyiisya alimwi a ‘Luyando lwa Leza.’—Amubone Mulimo Wesu wa Bwami wa April 2011, apeeji 2.