Kabbokesi Kamubuzyo
◼ Ino ceelede kumutolela ciindi cilamfwu buti kweendelezya ciiyo ca Bbaibbele amuntu mubbuku lya Luzibo?
Jehova ulimukwiileleka mbungano yakwe sunu. Eeci tulacibona mwaka amwaka izyuulu zyabantu ibapya nobasala kasimpe. Ibbuku lya Luzibo lilimukugwasya kapati mukucita mulimo oyu. Ngazi Yamulindizi ya January 1, 1996, yakaamba kuti ibbuku eli lyakalembelwa kugwasya sikwiiya Bbaibbele kuti afwambaane kuya ambele munzila yakumuuya, kuti kakukonzeka abbapatizigwe mweena mumyezi misyoonto.
Akaambo aako, njoona Ngazi Yamulindizi eyi, apeeji 28 yakalailila kuti: “Imuntu amanizya ciiyo ca Bbaibbele mubbuku lya Luzibo akubbapatizigwa, inga takooyandika kweendelezya muli cimbi ciiyo cini-cini mubbuku limbi.”
Ino kuti muntu katabbapatizigwi nokuba kuti wakalimana kuliiya bbuku lya Luzibo? Mulimo Wesu Wabwami wamu Chichewa iwa June 1996, apeeji 6, paragrafu 23, wakatuyeezya kaambo kakaambwa mu Ngazi Yamulindizi kajatikizya kutatalika ciiyo mumabbuku aambi asikwiiya omwe nomwamana bbuku lya Luzibo. Sena eci caamba kuti tweelede kulekela limwi kugwasya sikwiiya Bbaibbele aciindi eco? Peepe. Tuyanda kuti bantu batambule luzibo lwakasimpe lwantalisyo. Pele mwiiyi uucizi kuyiisya weelede akonzye kugwasya sikwiiya wini-wini uli woonse kubaa luzibo luyandika kuti asale camaanu kubelekela Jehova. Bamwi basikwiiya Bbaibbele balakonzya bayanda kuti kabayiya ziindi zinji ansondo kweelana azintu mbozibede kulimbabo.
Cakutadooneka, bamwi basikwiiya balatola ciindi cilamfwu kuya ambele kwiinda bamwi. Pele kuti nomwamana kwiiya amuntu mubbuku lya Luzibo, oyo muntu katanayanda kubweza ntaamu yakuti ayanzane ambungano nokuba kuti mwakatola ciindi cilamfwu anguwe muciiyo eco, inga cagwasya kuti sikumwaya umuyiisya walibandika penzi elyo amwaalu umwi wa Kabunga Keendelezya Mulimo Mumbungano. Ikuti naa kwajanika kuti ujisi penzi limwi ilini-lini, inga wayandika kucinootambula lugwasyo. Eeci cileendelana acaambwa mumaparagrafu 11 a 12 apeeji 29 ya Ngazi Yamulindizi ya January 1, 1996.
Ikuti sikwiiya kalulemeka lwiiyo lwakwe, naaba makani aantalisyo aakasimpe ayelede kumupa kuti kajanika kumiswaangano ya Banakristo. Eeci inga capa kuti oyo sikwiiya atondezye cini-cini kuti ulayanda kubelekela Jehova. Ikuti bulemu buli boobo kuzintu zyakumuuya tabuboneki nokuba kuti wakatola ciindi cilamfwu kulimana kuliiya bbuku lya Luzibo, inga cagwasya kutazumanana kwiiya anguwe.