Cibeela 1—Ikweendelezya Ziiyo zya Bbaibbele Ziyaambele
Ino Ciiyo ca Bbaibbele Ninzi?
1 Munyika mboizulwa, kuli ziiyo zya Bbaibbele zitandila kutuulunzuma tuli cisambomwe zicitwa abantu ba Leza mwezi amwezi. Kwiinda mukubelesya nzila zigwasya, tulakonzya kubagwasya aaba basikwiiya Bbaibbele kuyaambele kusika antaamu yakulyaaba akubbapatizyigwa alimwi ‘akukonzya kuyiisya bamwi.’ (2 Timo. 2:2, Ci) Sena inga mwayanda kumugwasya ngomuyiisya kuti aye ambele? Ikutalikila mu Mulimo Wesu Wabwami uuno, kunooli mulongo wazibalo zipandulula makani mauba-uba aakweendelezya ziiyo zya Bbaibbele ziyaambele.
2 Nokweelede Kulipoota Ciiyo ca Bbaibbele: Ikuti lyoonse kamubandika zyamu Bbaibbele cakusitikila nokuba kuti nciindi cifwaafwi, kamubelesya Bbaibbele amabbuku aakabambilwa kuyiisya, nkokuti mweendelezya ciiyo ca Bbaibbele. Eeci cili boobo nokuba kuti ciiyo cabwiimvwi naa nkwiinda mukubelesya luwaile. Iciiyo cilakonzya kulipootwa ikuti cacitwa ziindi zyobilo kuzwa leelyo nokwakatondezyegwa mbokuyiigwa alimwi akuti kakulibonya kuti ciiyo ciyoozumanana.
3 Ibroshuwa ya Ncayanda alimwi abbuku lya Luzibo ngamabbuku aabelesyegwa kweendelezya ziiyo zinji zya Bbaibbele. Amana kuyiigwa mabbuku aaya, ikuti kakulibonya kuti muntu uyaambele naaba asyoonto, alimwi kuti watalika kuzyibelesya zyaiya, iciiyo cilakonzya kuzumanana mubbuku lya Amukombe Leza. Ibroshuwa ya Mulakonzya Kuba Mulongwe wa Leza! ilakonzya kubelesyegwa kwiiya abantu batacikonzyi kubala kabotu.
4 Imulimo wakuyiisya bantu Bbaibbele wagwasya mukugwasya tuulunzuma kuba basikwiiya beni-beni ba Jesu Kristo. (Mt. 28:19, 20) Kwiinda mukubelesya nzila zipedwe muzibalo zyamu Mulimo Wesu Wabwami aumwi uuboola, mulakonzya kweendelezya ciiyo ciyaambele ca Bbaibbele.