Cibeela 12—Ikweendelezya Ziiyo zya Bbaibbele Ziyaambele
Kugwasya Basikwiiya Kutalisya a Kweendelezya Ziiyo zya Bbaibbele
1 Ciindi mbotuyiisya Bbaibbele nobatalika kutola lubazu mumulimo wamumuunda, ikuyeeya kutalisya alimwi akweendelezya ziiyo zya Bbaibbele kulakonzya kubayoosya. Mbuti mbotukonzya kubagwasya kuba basicamba kujatikizya cibeela eeci ciyandika camulimo wesu?—Mt. 24:14; 28:19, 20.
2 Ciindi sikwiiya Bbaibbele nazumizyigwa kuba sikumwaya uutabbapatizyidwe, ulangilwa kuti wakalilembya kale mu Cikolo Camulimo Weendelezyegwa a Leza. Ilwiiyo ndwajana mukulibambila alimwi akukanana makani apegwa basicikolo luyoomugwasya kuyaambele muluzyibo lwakuyiisya oolo luyandika kuli “simulimo uutakwe cintu cimuusya insoni, uupandulula makani aalusinizyo mbukweelede.”—2 Tim. 2:15.
3 Amuyiisye Kwiinda Mukupa Cikozyanyo: Jesu wakaisya basiciiya bakwe kwiinda mukubapa malailile aalimvwisya alimwi akubapa cikozyanyo cibotu. Wakaamba kuti: “Azyulila umwi umwi ulaba mbuli mwiiyi wakwe.” (Lk. 6:40) Cilayandika kapati kuti mumwiiye Jesu kwiinda mukupa cikozyanyo cibotu mumulimo wanu. Ciindi sikwiiya nabona cikozyanyo canu mumulimo, uyoozyiba kuti ncotupilukilida nkutalisya ziiyo zya Bbaibbele.
4 Amumupandulude sikwiiya kuti ciindi notwaambila mwiniŋanda zyaciiyo, kanji-kanji takuyandiki kupandulula zyoonse zijatikizyidwe mububambe bwaciiyo. Bunji bwaziindi cilainda kugwasya kwiile kutondezya mbocicitwa ciiyo kwiinda mukubelesya muncali omwe naa yobile iili mubbuku liyiigwa. Nzila zigwasya mukucita boobu zilakonzya kujanwa mu Mulimo Wesu wa Bwami uno apeeji 8 alimwi awa January 2002 apeeji 6.
5 Ikuti kacikonzyeka, amumutambe sikwiiya kuti mubeleke limwi naa kusangana sikumwaya umwi uucibwene kuziiyo zimbi zya Bbaibbele. Ulakonzya kutola lubazu mukupandulula muncali umwi naa lugwalo lumwi luyandika kapati. Aboobo, kwiinda mukulangilila, sikwiiya ulakonzya kwiiya zinji kujatikizya mbokweendelezyegwa ziiyo zya Bbaibbele ziyaambele. (Tus. 27:17; 2 Tim. 2:2) Amumulumbaizye alimwi amubandike mbwakonzya kuyaambele.
6 Kuyiisya basikumwaya bapya kuti babe bayi ba Jwi lya Leza kuyoopa kuti bacikonzye kucita ‘mulimo mubotu’ wakutalisya akweendelezya ziiyo zyabo. (2 Tim. 3:17) Elo kaka cilakkomanisya kubeleka ambabo mukutamba ooku kwaluyando kwakuti, “muntu woonse uuyanda anywe cabuyo maanzi aabuumi”!—Ciy. 22:17.