Cibeela 11: Kugwasya Basikumwaya Bapya Kupilukila
Ikweendelezya Ziiyo zya Bbaibbele Ziyaambele
1 Ciindi sikwiiya Bbaibbele natalika kutola lubazu mumulimo wakukambauka, uyoojana bantu ibajisi luyandisyo mumakani mabotu. Mbuti mbotukonzya kugwasya sikumwaya mupya kuzwiidilila napilukila alimwi akuyungizya luyandisyo?
2 Ikulibambila kupilukila kutalikila kukuswaya kwakusaanguna. Amumukulwaizye sikwiiya kuba aluyandisyo lwini-lwini kubantu mbabandika limwi. (Flp. 2:4) Amuyaambele kumuyiisya kuti kapa ciindi bali aŋanda cakwaamba mbobayeeya, kuswiilila nobaambaula alimwi akubikkila maano nzyobalibilika. Ciindi bamwi nobaboneka kuba aluyandisyo, amumwaambile sikumwaya mupya ikulemba twaambo toonse tuyandika itwabandikwa. Amubelesye twaambo ooto kutegwa mumugwasye kulibambila mibandi aimwi.
3 Kulibambila Kupilukila: Amwiinduluke mubandi wainda, eelyo amumutondezye sikwiiya mbokusalwa kaambo kamwi kamulumbe wa Bwami ikakonzya kumukkomanisya uuli aŋanda. (1 Kor. 9:19-23) Amulibambile antoomwe nzila mfwaafwi yakubelesya lugwalo lomwe lwamu Bbaibbele alimwi amuncali uuli mubbuku liyiigwa. Kunze lyaboobo, amulibambile mubuzyo ukonzya kubuzyigwa kumamanino amubandi kutegwa akabe ngamatalikilo aamubandi utobela. Amumutondezye sikumwaya mupya mbwakonzya kuyungizya luzyibo lwa Jwi lya Leza mumuntu ooyo mukuswaya kumwi akumwi.
4 Alimwi cilagwasya kuyiisya sikwiiya ntalisyo nguba-uba njakonzya kubelesya napilukila. Bamanizya kwaanzyanya auli aŋanda, inga waamba kuti: “Ndakakkomana kubandika andinywe nitwaamuswaide. Sunu ndaboola kuti tubandike kaambo akamwi kamu Bbaibbele kajatikizya [amukaambe kaambo aako].” Alimwi inga mwamwaambila sikwiiya mbwakonzya kucita ikuti wajana muntu umbi aŋanda.
5 Amusungwaale Kupilukila: Amumukulwaizye sikwiiya ikupa cikozyanyo cibotu mukufwambaana kupilukila kuli boonse ibatondezya luyandisyo. Kutegwa bantu bajanwe aŋanda inga kwayandika kuzumanana kupilukila. Amumuyiisye sikwiiya mbwakonzya kusyomezya bantu kuti uyoopilukila alimwi amumugwasye ikumvwisya mbociyandika ikuzuzikizya cipangano. (Mt. 5:37) Amumuyiisye sikwiiya kuba aluzyalo, kabikkila maano alimwi akutondezya bulemu ciindi nayandaula bantu bali mbuli mbelele alimwi akuyungizya luyandisyo lwabo.—Tit. 3:2.