Malailile Aa Balangizi Ba Cikolo
MUMBUNGANO aimwi, kuli mwaalu uubikkidwe kuba mulangizi mu Cikolo Camulimo Weendelezyegwa a Leza. Ikuti naa mupedwe mukuli ooyu, ibusungu bwanu kucikolo alimwi akuyandisya nkomujisi mukuyaambele kwasicikolo aumwi, zilakonzya kugwasya kubona mpindu iijanika mucikolo nkomuzwa.
Icibeela ciyandika mumulimo wanu, nkusololela Cikolo Camulimo Weendelezyegwa a Leza mumbungano momubede. Kamuyeeya kuti kunze lyabasicikolo ibajisi makani aakubandika, kuli abambi ibaswiilila. Amweendelezye cikolo munzila iyookulwaizya mbungano yoonse akuyeekezyegwa kumwi kugwasya kweendelana amakanze aacikolo amwi aali akati kayaayo aali apeeji 5 kusika ku 8 mubbuku eeli.
Amubabikkile maano basicikolo boonse, kunyina makani naa bapedwe makani aakubala buyo, kupa citondezyo naa kubandika makani. Amubagwasye kubona kuti ncobacita tauli buyo mukuli wakubandika makani pele ncoolwe cakuyaambele mumulimo wabo kuli Jehova. Ee, ibusungu mbobatondezya ncintu ciyandika kapati mukuyaambele kwabo. Pele alimwi cilayandika kubabikkila maano, amubagwasye kumvwisya mpindu yalulayo lupegwa alimwi amupandulule mbolukonzya kutobelwa lulayo oolo. Ikutegwa mucikonzye kucita boobo, amuswiililisye kumakani aamwi ikutegwa mubagwasye kabotu.
Amubone kuti cikolo catalisyigwa akumanizyigwa muciindi ceelede. Amupe cikozyanyo cibotu ikukanana twaambo muciindi icipedwe. Ikuti sicikolo waindilizya ciindi, nywebo naa uumugwasyilizya weelede kumuzyibya. Sicikolo weelede kumanizya kaambo nkajisi akuzwa kucibumbili. Ikuti cibeela cimwi camapulogilamu caindilila aciindi, amufwiinsye twaambo twanu, mpoona mubandike amukwesu wamana muswaangano.
Nomuliko, mweelede kweendelezya cikolo. Ikuti cimwi ciindi kamutako, imwaalu umbi wakasalwa akabunga kabaalu weelede kuceendelezya cikolo. Ikuti kamuyandika lugwasyo kukulibambila milongo, kulemba akupa basicikolo tupepa twamakani naa kubona uukonzya kunjila mubusena, mukutausi uusalidwe akabunga kabaalu ulakonzya kugwasyilizya mukaambo aaka.
Ikulemba Basicikolo. Amubakulwaizye boonse basikumwaya ikulilembya mucikolo. Ibamwi ibajanika lyoonse lyamiswaangano yambungano abalo balakonzya kulilembya ikuti kabazizumina njiisyo zyamu Bbaibbele alimwi ikuti bukkale bwabo kabweendelana anjiisyo zya Bunakristo. Ciindi umwi namwaambila kuti uyanda kulilembya, amumulumbaizye kapati. Ikuti muntu tanaba sikumwaya, nywebo nobalangizi bacikolo mweelede kubandika anguwe ziyandika kukulilembya mucikolo, ikapati kucita oobo mumeso aayooyo weendelezya ciiyo ca Bbaibbele kulinguwe (naa mumeso aabazyali bakamboni). Eezyi nzila zili kozyenyi azyeezyo muntu nayanda kuba sikumwaya uutabbapatizyidwe. Zijanika apeeji 97 kusika ku 99 mubbuku lya Tuliyanzene Kukumanizya Mulimo Wesu. Amube amulongo mupya wabaabo boonse balembedwe mucikolo.
Ikubelesya Foomu Yalulayo. Ifoomu yalulayo yasicikolo aumwi ili mubbuku lyakwe, apeeji 79 kusika ku 81. Kweelana ambokutondezyedwe amibala yiindene-indene, cibeela calulayo cili coonse kuzwa a 1 kusika ku 17 cilakonzya kubelesyegwa sicikolo napedwe makani aakubala. Kumakani aajatikizya zitondezyo, lulayo luli loonse kunze buyo lwa 7, 52 a 53 lulakonzya kubelesyegwa. Lulayo lwamakani lulabikkilizya zibeela zyoonse kunze buyo lwa 7, 18 a 30.
Cibeela calulayo nocipegwa, mulangizi wacikolo weelede kubona kuti walemba ampensulo anselelo mubusena bulembedwe kuti “Buzuba Naakapegwa” munsi-munsi aacibeela eeco mubbuku lyasicikolo. Sicikolo amana kubandika makani aakwe, kumbali amumubuzye naa wakacita cakucita naa zyakucita zilembedwe kumamanino aakaambo kabandika lulayo oolo. Ikuti wakacita oobo, mulakonzya kucconga mukabbokesi kali afoomu. Ikuti mwayanda kuti azumanane alulayo ndweena oolo, mutalembi cili coonse afoomu yalulayo; mutalembi pe mubusena bwakuti “Buzuba Naakamanizya.” Aawo ayelede kulembwa lilikke nayelede kuya kululayo lumbi. Kunze lyaboobo, apeeji 82 mubbuku lyasicikolo, kulumwensyi anzila yakabelesyegwa, buzuba bweelede kulembwa lyoonse sicikolo amanizya kubandika makani. Kuli busena afoomu yalulayo alimwi aamulongo wanzila zikonzya kubelesyegwa bupa kuti nzila eezyo zikonzye kubelesyegwa ziindi zyobilo. Basicikolo beelede kuti kabajisi mabbuku aabo licitwa cikolo.
Amupe cibeela comwe buyo calulayo aciindi comwe. Kanji-kanji cilagwasya ikupa twaambo twalulayo kweelana ambotubikkidwe mumulongo. Nokuba boobo, ikuti basicikolo bamwi batondezya kuyaambele, mulakonzya kubakulwaizya kwiiya akubelesya ziiyo zimwi lwabo beni. Mpoonya mulakonzya kubagwasya kutwaambo ooto ntomuyeeya kuti tuyoobagwasya kapati kukuyaambele kabali baambi abamaiyi bacibwene.
Nokuba kuti sicikolo wali mucikolo kwamyaka minji, ulakonzya kugwasyigwa kapati kwiinda mukwiiya akubelesya acimwi ciiyo. Ikutegwa mubagwasye basicikolo mumbazu zigaminide, mulakonzya kubasalila zibeela zimwi zyakukanana nzyobeelede kulanganya muciindi cakwiile kutobela twaambo twalulayo kweelana ambotutobelene.
Ikupa Lulayo. Nomupa lulayo, amuzyibelesye kabotu zikozyanyo zyamu Bbaibbele anjiisyo. Basicikolo beelede kuzyiba kuti lulayo lwapegwa ambolwapegwa zyeendelezyegwa anjiisyo zisumpukide zyamu Jwi lya Leza.
Kamuyeeya lyoonse kuti muli “basimilimonyina” abanyoko alimwi abacizyi. (2 Kor. 1:24) Mbubwenya mbuli mbabo, mweelede kuzumanana kuyaambele anywebo kamuli baambi abaiyi. Amuliiye nywebo lwanu ibbuku lya Amugwasyigwe Alwiiyo Lujanwa mu Cikolo Camulimo Weendelezyegwa a Leza, amulubelesye lulayo lwayo alimwi amube cikozyanyo cibotu kuli bamwi kuti abalo bacite oobo.
Nomucita boobo, aabe makanze aanu ikugwasya basicikolo kuba babali bacibwene, ibaambi basimide abamaiyi ncobeni. Ikutegwa mucite oobo, amusoleke kugwasya munzila iili yoonse iiyandika ikutegwa basicikolo bateelele mbozyibede zibeela zyakukanana ziindene-indene, ncoziyandika ambobanga bazyikonzya. Ibbuku eeli libambidwe munzila iikonzya kumugwasya kucita boobo. Nokuba boobo, kuli zinji ziyandika lyoonse kulindinywe muciindi cakwiile kubala zilembedwe mubbuku. Amulange kaambo kaambwa ambokakonzya kubelesyegwa.
Ikuti sicikolo wacita kabotu mucibeela cimwi, amumulumbaizye. Mubufwaafwi amwaambe capa kuti acite kabotu naa ikaambo katondezya kuti ncaacita cilayandika. Ikuti kakonzya kugwasyigwa kwiinda mukwaalanga-langa alimwi makani, amubone kuti wakateelela kaambo ncayelede kucitila boobo. Amubandike anguwe mbwanga wazwidilila. Mutamwiindi mumbali pele mwaambe caluyando.
Kamuyeeya kuti ibanji, kulikke kukanana makani kunkamu ncintu cikatazya kapati. Ikuti muntu walimvwa kuti tanaacita kabotu, inga watalika kulibuzya naa uleelede kuzumanana kusoleka. Amwiiye Jesu iwatakatyola “katete kacuzukide” naa kuzima “kamuni kayaka.” (Mate. 12:20) Amubikkile maano mbwalimvwa sicikolo. Nomupa lulayo, amubone naa ngusicikolo mupya antela ngusikumwaya uucibwene. Ikulumbaizya kwini-kwini kulakonzya kuyumya bantu kuzumanana kuyaambele.
Sicikolo aumwi amumulemeke. Bbuku lya Ba-Roma 12:10 litwaambila kuti: “Amusungwaale kukulemekana.” Elo luleelela kaka lulayo oolu kuli sikupa lulayo mu Cikolo Camulimo Weendelezyegwa a Leza! Ikuti sicikolo kamwiinda kukomena, amubikkile maano kubusolozi buli kubbuku lya 1 Timoteo 5:1, 2. Pele kunyina makani amyaka njajisi muntu, ikuti lulayo lujatikizya kucinca nkwayelede kucita mukucita zintu lwapegwa caluzyalo, kanji-kanji lulatambulwa.—Tus. 25:11.
Nomupa lulayo, amukankaizye kuli sicikolo imakanze aalwiiyo oolo. Imakanze aayo taali aakuyanda buyo kucita kabotu kutegwa balumbaizyigwe akwaambilwa kuti inga babelekela acibeela calulayo citobela. Taali makanze aakuyanda kuba mwaambi amwiiyi uulombozyegwa abantu. (Tus. 25:27) Ncotuyanda nkubelesya cipego cesu cakukanana ikutembaula Jehova akugwasya bantu kumuzyiba akumuyanda. Lwiiyo ndotwiiya ndwakutugwasya kweendelezya kabotu mulimo uulembedwe ku Matayo 24:14 a 28:19, 20. Ibakwesu babbapatizyidwe ibasika azyeelelo mukuya kwaciindi balakonzya kwaambilwa kulanganya “butanga bwa-Leza” kabali baambi bakubuleya abamaiyi.—1 Pet. 5:2, 3.
Amubaambile basicikolo kuti bakabale mubbuku cibeela ciccilila ncobaya kupegwa lulayo mazuba nobapegwa makani. Amubakulwaizye kuzyibelesya nzyobaiya nobalibambila zibeela zyamucikolo, mukwiizya, nobaingula lyamiswaangano anobali mumulimo wamumuunda.
Ikupa Baya Kukanana Makani. Eeci lyoonse ceelede kucitwa kakucili mvwiki zyotatwe kumbele. Oonse makani ayelede kuti kaalembedwe ikuti kacikonzyeka.
Izibeela zijatikizya kulaya mbungano zyeelede kupegwa kubaalu, ikwaambisya aabo ibakonzya kuzyaamba kabotu, abakutausi ibacizyi kuyiisya.
Nomusala makani aabasicikolo akubona makani aayelede kupegwa kubakwesu akubacizyi, amutobele malailile aapedwe mumulongo wacikolo. Ikuti bakwesu kabali basyoonto pele kakuli bacizyi banji ibakanana makani aabasicikolo, amubone kuti abalo bakwesu mulabapa ziindi zili mbozyibede zyakubandika kunze lyamakani aakubala.
Amuzyibe aumwi mbwebede nomuyanda kupa uuya kwaamba makani. Sena cilayandika ikupa mwaalu umwi naa mukutausi makani ngayelede kubandika mucikolo ibuzuba mbubonya mbwajisi cibeela mu Muswaangano Wamulimo naa mumvwiki njoona nayelede kubandika makani aabuleya mumbungano? Sena cilayandika ikupa mucizyi umwi icitondezyo mubuzuba mbubonya mwanaakwe ooyo ngwayandika kugwasya nali mucikolo awalo? Ikapati ikuti kali mwana naa kali sikwiiya Bbaibbele uutana kubbapatizyigwa, sena imakani aayo inga amweelela? Amubone kuti makani aayo aleelela kweelana akaambo kalulayo sicikolo nkabelekela.
Kumakani aapegwa kubacizyi, sicikolo bunji bwaziindi unoolisalila mbwaya kwaabandika kweelana amalailile aali apeeji 78 a 82. Sikugwasyilizya omwe weelede kupegwa, pele sikugwasyilizya wabili ulakonzya kubelesyegwa. Ikuti sicikolo walomba ikupegwa sikugwasyilizya ngwazyi kuti inga wacita kabotu kweelana ambwaaya kubandikwa makani, mweelede kukubikkila maano kulomba ooko.
Zikolo Zimwi. Ikuti kakuli basicikolo ibainda ku 50 bakalembwa, inga mwayanda kubelesya masena amwi kuzibeela zibandikwa abasicikolo. Kweelana aziyandika nkomuzwa, oobu bubambe bulakonzya kubelesyegwa kumakani oonse aabandikwa abasicikolo naa alikke obilo aamamanino.
Acimwi cikolo cisyoonto ceelede kweendelezyegwa asikupa lulayo uucizyi, kwaambisya imwaalu. Ikuti kwayandika, mukutausi uusimide kumuuya ulakonzya kweendelezya. Kuzumizyigwa ooku kwabasikupa lulayo kweelede kucitwa abaalu. Amubelekele antoomwe abasikupa lulayo muzikolo zisyoonto ikutegwa kacuuba-uba kutobelezya lulayo lwabasicikolo kunyina makani acikolo nkobaya kubandikila makani aabo aatobela.
Cikolo Cakubala. Ikuti kabunga kabaalu kabona kuti bantu bali mbobabede mumbungano bayandika kuyiisyigwa kubala mumwaambo uubelesyegwa mumbungano, mulakonzya kubikka cikolo eeci antoomwe a Cikolo Camulimo Weendelezyegwa a Leza. Ilwiiyo oolu lulakonzya kaluli lwakuyiisya kubala akulemba, naa alakonzya kaali makanze aakubagwasya kubala kabotu.
Izikolo zili boobu tazyeelede kucitwa aciindi ncicona makani mu Cikolo Camulimo Weendelezyegwa a Leza naabandikwa abasicikolo. Ikutegwa bagwasyigwe kabotu, inga bayandika ciindi cinji kwiinda ceeco citolwa lyacikolo. Ibaalu balakonzya kulanga-langa ciyandika, aciindi nokweelede kupegwa lwiiyo oolu. Ikweelana aziyandika, kulakonzya kucitwa bubambe bwakuyiisya nkamu naa kuyiisya muntu aumwi alikke.
Imwiiyi uucibwene ulayandika. Inga cainda kubota ikuti mukuli ooyu wapegwa kumukwesu uubala kabotu alimwi uuzyi kabotu mwaambo. Ikuti kakutakwe mukwesu, ibaalu balakonzya kulomba mucizyi uucizyi alimwi uupa cikozyanyo cibotu kuti agwasye. Weelede kusama citambala nayendelezya cikolo.—1 Kor. 11:3-10; 1 Tim. 2:11, 12.
Ikabbuku kakuti Sungwaala Kukubala Akukulemba nkokali mumyaambo minji. Kabambilidwe kuyiisya bantu kucizyiba kubala akulemba. Imabbuku ambi aagwasya alakonzya kubelesyegwa, ciya buyo mbuli mbobacizyi kubala aabo ibali mucikolo. Basicikolo nobayaambele kapati, beelede kukulwaizyigwa kutola lubazu mupulogilamu yalyoonse ya mu Cikolo Camulimo Weendelezyegwa a Leza.
Mbomuli mulangizi wa Cikolo Camulimo Weendelezyegwa a Leza, nzinji nzyomukonzya kucita kutegwa mugwasye mbungano. Amulibambile kabotu, alimwi kweelana alulayo luli ku Ba-Roma 12:6-8, amulanganye mukuli wanu kuba cintu ciyandisi cizwa kuli Leza.