Balangizi Basololela—Imulangizi wa Cikolo Camulimo Wateokrasi
1 Imulangizi wa Cikolo Camulimo Wateokrasi mmwaalu uusimide munzila yakumuuya uubeleka canguzu mukukanana amukuyiisya alimwi tweelede kumupa bulemu akubelekelaamwi anguwe. (1 Tim. 5:17) Ino ujisi mikuli nzi?
2 Ilaibbulali ya Cikolo Camulimo Wateokrasi iili ku Ŋanda ya Bwami nguuilanganya. Ulayandisisya kuti boonse ibeelela bakulwaizigwa kulilembya mucikolo. Ulabona kwaamba kuti zyoonse zyalembwa akubambwa kabotu-kabotu ikutegwa bantu kabatambwida limwi tupepa twamakani aabo kakucili mvwiki zyotatwe kuti akananwe mucikolo cimwi acimwi. Boonse mumbungano weelede kubazyiba kabotu-kabotu, kamuzi sicikolo omwe-omwe alimwi amikuli njanga wakonzya. Nokuba kuti ulakonzya kabelesya mukwesu uumbi kumugwasya kubamba mulongo wacikolo, ikwaabanya zibeela kabotu nguwe lwakwe uukulanganya.
3 Ikutegwa ayiisye kabotu mucikolo, imulangizi weelede kulibambila kapati mvwiki amvwiki, ikubala kabotu-kabotu makani oonse aayoobandikwa. Eci cimugwasya kukulwaizya mbungano kujatikizya makani aayiigwa, ikuzyiba naa imakani aapedwe abandikwa mbwaayelede alimwi akutondezya twaambo tuyandika ituyoojatikizigwa mukulemba kwakwiinduluka.
4 Aamana kubandikwa makani aasicikolo omwe-omwe, mulangizi ulamulumbaizya sicikolo alimwi ulapandulula ncaacita kabotu kukaambo kamubandi kamwi naa ncokuyandika kuti akacite kabotu kumbele. Umwi nayandika kuyiisigwa kuyungizidwe mukulibambila mikuli yamucikolo, mulangizi naa uumbi uutumidwe aanguwe ulakonzya kupa lugwasyo lugaminide.
5 Ikutegwa tugwasigwe kabotu kumulimo ngwacita cabusungu mulangizi wa Cikolo Camulimo Wateokrasi akulibasikupa lulayo bamwi ibatumidwe aanguwe, tweelede kunoojanika kucikolo lyoonse. Alimwi tweelede kwiizuzikizya mikuli yesu yoonse akutobela lulayo ndotupegwa aloolo lupegwa kuli basicikolo bambi. Munzila eyi, tuyoozumanana kuyaambele mukupa mulumbe wa Bwami kubuleya awaŋanda aŋanda cakuzwidilila.—Inc. 20:20; 1 Tim. 4:13, 15.