Amugwasigwe a Pulogilamu ya Cikolo ca Mulimo Wateokrasi yamu 1999
1 Jesu wakali Mwiiyi Uucibwene. Ibantu “bakakankamana kukwiisya kwakwe.” (Mk. 1:22) Nokuba kuti taakwe wandiswe uunga wakonzya kwaambaula akuyiisya mbuli Jesu, inga twasola kumwiiya. (Inc. 4:13) Ikutegwa eco cikonzeke, ikutola lubazu mu Cikolo ca Mulimo Wateokrasi inga catugwasya kuzumanana kuyaambele mukuciziba kwaambaula akuyiisya.
2 Mu 1999, makani aanamba 1 anoozwa muzibalo zyamumamagazini aa Ngazi Yamulindizi yamu 1997 alimwi amubbuku lya Bukhu la Sukulu. Ikuteelela kwesu zintu zyakumuuya kulayaambele kapati kuti naa makani aaya twaabalila limwi mpoonya akwaamvwa aapulogilamu yacikolo. Aabo bapedwe mukuli wakukanana makani aaya aamalailile bayelede kutondezya mbwaagwasya, abaakanane cakukondelezya alimwi cabusungu. Makani aanamba 3 anoozwa mubbuku lya Lukkomano Mumukwasyi alimwi aanamba 4 anoozwa mubbuku lya Munthu Wamukulu naa lya Lukkomano Mumukwasyi. Mulangizi wacikolo weelede kwaalangisya makani katanapa zibeela. Boonse basicikolo ibapedwe mukuli wakukanana makani kuzwa mubbuku lya Lukkomano Mumukwasyi beelede kabali cikozyanyo cibotu mubukkale bwamumukwasyi.
3 Amutobele Lulayo Alimwi Amulibambile Kabotu: Muntu woonse ulakonzya kuyaambele mukuciziba kukanana akuyiisya. (1 Tim. 4:13) Aboobo atube aluyandisisyo lwakupegwa lulayo tutalulangi mbuli cintu citayandiki. (Tus. 12:15; 19:20) Ikukanana kabotu kasimpe kumiswaangano amumulimo wamumuunda tacijatikizyi buyo kwiide kuluula makani naa kubala magwalo. Makani ngotukanana ayelede abanjile baswiilizi besu akubakulwaizya. Eci inga twacicita kwiinda mukukanana kasimpe camoyo woonse. (Amweezyanisye Incito 2:37.) Ilulayo ndotutambula mucikolo lulatugwasya kuzuzikizya ceeci.
4 Mbomwatambwida buyo makani aakukanana, amuyeeye mbazu zyakubandika nzyomweelede kubelekela mbuli bupandulwidwe mu Bukhu La Sukulu. Amuyeeye ncomuyandika kucita kutegwa mutobele lulayo ndomwakatambula. Amuuyeeyesye mutwe wanu, iciimo ncomuyakwaakanana makani kuti kaciyandika, alimwi ambomutaapandulule magwalo aajanika mumakani ngomupedwe. Amuyeeyesye mbomunga mwaabelesya makani mukuyiisya akukulwaizya.—1 Tim. 4:15, 16.
5 Ikuti kamuyoowa kulilembya mucikolo, amucipailile eco mpoonya mumwaambile mulangizi wacikolo mbomulimvwa. Boonse balakonzya kugwasigwa kwiinda mukubelesya pulogilamu iiyoocitwa mu Cikolo ca Mulimo Wateokrasi mu 1999.