Kulilembya mu Cikolo Camulimo Wateokrasi
1 Icikolo Camulimo Wateokrasi cagwasya kapati kuyiisya mamiliyoni aa Bakamboni ba Jehova kuba babelesi ba makani mabotu. Bunji bwesu tulayeeya mbuli mbutwatakazi alimwi ambotwakali kulimvwa kutakonzya notwakalilembya lwakusaanguna mucikolo, pele lino tulalumba mulimo ngocabeleka mukuyaambele kwesu kwakumuuya mbuli baambi abamayi ba Jwi lya Leza. (Amweezyanisye Incito 4:13.) Sena mwakalilembya mucikolo eci cibotu?
2 Mbaani bakonzya kulilembya? Ibbuku lya Olinganizidwa Kutsiriza Uministala Wathu apeeji 73 lilaingula ategwa: “Boonse basungweede mukuyanzana aambungano balakonzya kulilembya, kubikkilizya abantu bazwaa kutalika kujanika kumiswaangano, kufwumbwa buyo kuti tabaponi buumi buteendelani anjiisyo zya Bunakristo.” Twabatamba boonse beelela—baalumi, banakazi abana—kuti kuunka kumweendelezi wacikolo akulomba kuti balilembye.
3 Progilamu ya Cikolo ya 1997: Iprogilamu ya Cikolo Camulimo Wateokrasi ya 1997 ijatikizya kuyiisya zintu zyaandeene-andene izijatikizya mbungano antoomwe acisyimo ca mbunga. Kunze lyakuciziba kwaambaula akuyiisya kabotu, tulayiya akuzwa kumbono zinji zyakumuuya zyalo zijanwa muziiyo zyanjiyo nsondo ansondo. (Tus. 9:9) Ikuti naa twalibambila izili mucikolo zyalo zibikkilizya akubala Bbaibbele nsondo ansondo alimwi katujanika lyoonse kumiswaangano tulakonzya kugwasigwa kapati kulubazu lwakumuuya kuzwa ku progilamu eeyi.
4 Mu 1997 izibeela zinji zyakubala Bbaibbele mu Makani aa No. 2 zifwaafwi kwiinda myaka yainda. Mukulibambila makani aaya, sicikolo weelede kubona kuti wabala kabotu-kabotu kutegwa wabona ciindi ncaatola akuziba kuti ulatola ciindi cilamfu buti kumakani aamatalikilo alimwi aamamanino mukati kamaminiti aali osanwe ngapedwe kucibeela cakwe. Eci ciyoopa kuti sicikolo abelesye ciindi cakwe coonse akuciziba kubala kabotu akwaambaula moyo kaukkede.—1 Tim. 4:13.
5 Ibukambausi bwamukwiizya abwalo bwabikkilizigwa munzila zikonzya kubelesyegwa mu Makani aa No. 3 alo aajanwa mubbuku lya Luzibo. Aboobo mucizi ulakonzya kusala kubelesya nzila yalweendo lwakupilukila, ciiyo ca Bbaibbele caaŋanda naa bukambausi bwamukwiizya mucibeela eci. Aino kusinizya kweelede kucaala akuyiisya kuli kabotu kutali anzila yabelesyegwa.
6 Kufumbwa naa mwapegwa coolwe cakupa makani aakulailila, twaambo tupati-pati twamu Bbaibbele naa makani aa sicikolo mulakonzya kutondezya kubikkila maanu ku Cikolo Camulimo Wateokrasi kwiinda mukulibambila akwiindulula-indulula cibeela canu, kucipa calusinizyo aluyandisisyo, kutaindilizya ciindi, kuswiilila alimwi akubelesya malailile aapegwa amweendelezi wa cikolo alimwi akusolekesya ciindi coonse kujanika kucibeela canu cakusyomeka. Aboobo kulilembya kwanu mucikolo kuyooba cilongezyo kuli ndinywe alimwi aboobo boonse bajanika.