Amutobele Cikozyanyo Cabasinsimi—Hosea
1. Ino mubuzyo nzi ngomunga mwalibuzya?
1 ‘Nzipaizyo nzi nzyondikonzya kumupa Jehova?’ Ambweni mwakalibuzya mubuzyo ooyu ciindi nimwakali kuzinzibala kuyeeya bubotu alimwi aluse lwa Leza. (Int. 103:2-4; 116:12) Hosea wakacita ncaakamulailila kucita Jehova, nokuba kuti wakali kuyandika kulyaaba. Mbuti mbotukonzya kumwiiya Hosea?
2. Mbuti mbotukonzya kwiiya cikozyanyo cibotu ca Hosea cakuzumanana mumulimo wesu wakukambauka?
2 Amukambauke Muciindi Camapenzi: Mulumbe ngwaakali kwaambilizya Hosea wakagamikidwe kapati kumisyobo iili kkumi mubwami bwa Israyeli, mwalo bukombi bwakasimpe mobwakali kuyanda kugwisyigwa. Mwami Jeroboamu wabili wakacita zyintu zibi mumeso aa Jehova alimwi akuzumizya bukombi bwamoombe bwakatalisyigwa a Jeroboamu wakusaanguna kuti buzumanane. (2 Bam. 14:23, 24) Bami bakatobela bakazumanana kubutola aansi bukombi bwakasimpe bwabwami bwamisyobo iili kkumi kusikila nobwakanyonyoonwa mu 740 B.C.E. Pele nokuba kuti kwakali bukombi bwakubeja, Hosea wakabeleka cakusyomeka mumulimo wakwe wabusinsimi kwamyaka iili 59. Sena andiswe tulikanzide kuzumanana kukambauka mwaka amwaka, nokuba kuti bantu balatukazya?—2 Ti. 4:2.
3. Ino mbuti buumi bwa Hosea mbobwakatondezya luse lwa Jehova?
3 Amubikkile Maano Kuluse lwa Jehova: Jehova wakalailila Hosea kuti akwate “mwanakazi muvwuule.” (Hos. 1:2) Nokuba kuti mukaintu wakwe, Goma, wakamuzyalila mwana musankwa, kuboneka kuti wakazyikuba abana bobilo bamusyokwe. Luyandisisyo lwa Hosea lwakulekelela mukaintu wakwe, lwakatondezya luse lupati lwa Jehova kubana Israyeli bakazangide pele ibakeempwa. (Hos. 3:1; Lom. 9:22-26) Sena tulilibambilide kuzyibya bantu bamisyobo yoonse luse lwa Jehova muciindi cakubikkila maano kuzyintu nzyotuyanda kapati?—1 Ko. 9:19-23.
4. Ino nkulyaaba kuli buti nkotukonzya kucita kutegwa tubelekele Jehova?
4 Babelesi ba Jehova bamwi baleka milimo iisumpukide naa lwiiyo lwaatala akulyaaba kubeleka ciindi cinji mumulimo wamumuunda. Bamwi tabakwete naa kukwatwa alimwi bamwi tabajisi bana kutegwa babikke zyintu zya Bwami mubusena bwakusaanguna. Ciindi notuyeeya kujatikizya buumi bwa Hosea, tulakonzya kuyeeya kuti, ‘Nindatakacicita ncaakacita.’ Nokuba boobo, ciindi notuzumanana kumulumba Jehova akaambo kaluzyalo lwakwe alimwi akusyoma muuya uusalala kuti utupe nguzu, ulakonzya kutubelesya munzila nzyotwatali kuyeeyela, mbubwenya mbuli Hosea.—Mt. 19:26; Flp. 2:13.