Kweendelezya Ziiyo zya Bbaibbele Zizwidilila
1. Ino mukuli nzi ngobajisi basikumwaya ibeendelezya ziiyo zya Bbaibbele?
1 Kunyina muntu uukonzya kumubelekela Leza ccita kuti “wakwelwa” a Jehova. (Joh. 6:44) Nokuba boobo, basikumwaya ibeendelezya ziiyo zya Bbaibbele beelede kucita lubazu lwabo ikugwasya bantu kuba acilongwe a Usyi wabo wakujulu. (Jak. 4:8) Eeci ciyandika kulibambila. Kubala buyo muncali akubuzya mubuzyo uusimbidwe tacikonzyi kubagwasya kapati aabo mbotuyiisya kuumvwisya mulumbe alimwi akuyaambele.
2. Ino kusololela kabotu ciiyo ca Bbaibbele ciyoogwasya buti?
2 Ikweendelezya ziiyo zizwidilila, basikumwaya beelede kugwasya aabo mbobayiisya (1) kumvwisya ncoliyiisya Bbaibbele, (2) kuzumina ncoliyiisya Bbaibbele, alimwi (3) kubelesya ncoliyiisya Bbaibbele. (Joh. 3:16; 17:3; Jak. 2:26) Cilakonzya kutola myezi minji kuyiisya muntu kubweza ntaamu eezyi. Pele ntaamu imwi aimwi itondezya kuyaambele kwakwe mukuba acilongwe a Jehova alimwi akulyaaba kulinguwe.
3. Nkaambo nzi bamayi bacibwene ncobabuzya mibuzyo iigwasya kuzyiba mbwayeeya muntu?
3 Ino Ncinzi Ncayeeya Sikwiiya Bbaibbele?: Kutegwa tuzyibe naa ooyo ngotuyiisya Bbaibbele ulazimvwisya akuzizumina nzyaiya, tutabi ndiswe notwaambaula kapati pele atumukulwaizye sikwiiya kwaamba mbwalimvwa. (Jak. 1:19) Sena ulamvwisya ncolyaamba Bbaibbele kujatikizya kaambo kabandikwa? Sena inga wakapandulula kaambo mumajwi aakwe? Ino ulimvwa buti kujatikizya makani ngaayiya? Sena ulasyoma kuti ncoliyiisya Bbaibbele cilagwasya? (1Tes. 2:13) Sena ulizyi kuti zintu nzyaiya weelede kuzibelesya mubuumi bwakwe? (Kol. 3:10) Kutegwa tujane bwiinguzi kumibuzyo iili boobu, tweelede kubuzya cabupampu mibuzyo iigwasya kuzyiba mbwayeeya muntu, mpoonya akuswiilila.—Mt. 16:13-16.
4. Ino ncinzi ceelede kucitwa ikuti naa ooyo ngotuyiisya wajana buyumuyumu kumvwisya naa kubelesya nzyaiya mu Bbaibbele?
4 Zilengwa alimwi abantu mbobayeeya kanji-kanji inga zyakamena miyanda alimwi citola ciindi kuziluba. (2Kor. 10:5) Ino kuti ooyo ngotuyiisya tazizumini naa kuzibelesya nzyaiya? Kuyandika kukkazika moyo kutegwa Jwi lya Leza alimwi amuuya uusalala zibeleke mumoyo wasikwiiya kwaciindi cili mbocibede. (1Kor. 3:6, 7; Heb. 4:12) Muciindi cakumusinikizya, kanji-kanji cilainda kubota ikuzumanana amakani aambi ikuti naa sikwiiya wajana buyumuyumu kumvwisya naa kubelesya njiisyo yamu Bbaibbele. Mbotuyaabuzumanana kumuyiisya Bbaibbele cakukkazika moyo alimwi caluyando, mukuya kwaciindi ulakonzya kukulwaizyigwa kuti acince.