Amuzumanane Kubikkila Maano Kuyiisya Bantu Kuti Babe Basikwiiya
1. Ino ncinzi ciyandika kutegwa bantu bakafwutuke?
1 Lipooti yamwaka wamulimo wa 2014 ilatondezya busungu bwabantu ba Leza alimwi amakanze ngobajisi aakukambauka makani mabotu aa Bwami. (Mt. 24:14) Kwiinda mumulimo wakuŋanda aŋanda, mulimo waalubazu wakwaabila matulakiti atupepa twakutamba bantu, alimwi amulimo wabukambausi bwakubuleya, bantu banji baumvwa mulumbe wamu Bbaibbele kwiinda kaindi. Nokuba boobo, kutegwa bantu bakafwutuke, tweelede kubagwasya kuba basikwiiya ba Jesu kwiinda mukwiiya Bbaibbele ambabo.—1Tim. 2:4.
2. Ino mibuzyo nzi njotweelede kulibuzya iikonzya kutugwasya kubikkila maano kutalisya ziiyo zya Bbaibbele?
2 Kamulibambilide Lyoonse Kutalisya Ziiyo zya Bbaibbele: Ikuti muntu watondezya luyandisisyo, sena mulasolekesya kubweza kkeyala yakwe mpoonya akupilukila cakufwambaana kamujisi makanze aakutalisya ciiyo ca Bbaibbele? Ndilili nomwakasolede kutalisya ciiyo ca Bbaibbele mulweendo lwakusaanguna? Ino ndilili nomwakasolede kutalisya ciiyo ca Bbaibbele kuli baabo mbomutolela mamagazini? Sena mwakabatondezya kale kavidiyo kakuti Nkaambo Nzi Ncomweelede Kwiiya Bbaibbele? alimwi akakuti Ino Ciiyo ca Bbaibbele Cicitwa Buti? aabo mbomubeleka limwi, basicikolonyoko, basimukobonyoko, bacibbululu, alimwi abeenzinyoko bamwi? Ciindi nomubelesya tutebulu twakubikkila mabbuku, sena mulabaambila aabo ibabweza bbuku lyakwiiya kuti mulacita aciiyo ca Bbaibbele citabbadelelwi?
3. Ikutegwa tuzwidilile mukuyiisya kasimpe, ino ncinzi ciyandika?
3 Lugwasyo Kuzwa Kuli Jehova a Jesu: Kwiinda mukubelesya bbala lyakuti “kamuya” mumulawo wakwe wakuyiisya bantu kuti babe basikwiiya,’ Jesu wakatondezya kuti tweelede kubeleka canguzu alimwi akubweza ntaamu. Nokuba boobo, tanaakatuleka buyo tolikke, pele wakatusyomezya kuti unoolaandiswe. (Mt. 28:19, 20) Kuyungizya waawo, Jehova watupa muuya wakwe uusalala, azibelesyo alimwi alwiiyo ndotuyandika kutegwa tucikonzye kuyiisya bantu kasimpe. (Zek. 4:6; 2 Kor. 4:7) Tulakonzya kupailila kuti tube ‘amakanze alimwi anguzu’ zyakutola lubazu mumulimo ooyu uuyandika kapati.—Flp. 2:13.
4. Nkaambo nzi ncotweelede kuzumanana kubikkila maano kuyiisya bantu kuti babe basikwiiya?
4 Kukambauka makani mabotu kutuletela lukkomano lunji kapati. Nokuba boobo, lukkomano lwesu lulayungizyika ciindi notuyiisya muntu kasimpe alimwi akumugwasya kutusangana ‘munzila iitola kubuumi.’ (Mt. 7:14; 1Tes. 2:19, 20) Ciinda kubota ncakuti, kwiinda mukuzumanana kubikkila maano kuyiisya bantu kuti babe basikwiiya, tukkomanisya Jehova walo ‘uutayandi kuti muntu uuli woonse anyonyoonwe, pele uyanda kuti boonse bakonzye kweempwa.’—2Pet. 3:9.