Kuyungizya Luzyibo Lwesu Mumulimo Wakukambauka—Kuyiisya Basikwiiya Bbaibbele Kuba Acilengwa Cibotu Cakwiiya

Ikaambo Ncociyandika: Kutegwa basikwiiya Bbaibbele bazumanane kuyaambele akusima kumuuya, beelede kuzumanana kuyiisya mizeezo amyoyo yabo, ikutali kugolela buyo anjiisyo zyantalisyo zyamu Jwi lya Leza. (Heb. 5:12–6:1) Kwiiya kuyandika kubeleka canguzu. Kulabikkilizya akubona makani mapya mbwaayendelana amakani ngotuzyi kale alimwi akubona mbwaagwasya. (Tus. 2:1-6) Kwiiya mbobakonzya kuvwuntauzya kuyoogwasya basikwiiya kuzyiba mboyiingulwa mibuzyo yamu Bbaibbele kubelesya mabbuku eesu aa Bunakristo. Ikusoleka nkobacita kubelesya nzyobaiya kuyoobagwasya kulibambila kuzunda masunko ngobakonzya kujana mubuumi bwa Bunakristo.—Lk. 6:47, 48.

Mbotukonzya Kucita Oobo:

Amukankaizye kuti cilayandika kapati kulomba busolozi bwa Jehova mumupailo kabatanatalika kwiiya.—Joh. 14:26; 1Kor. 2:10.
Mbomwatalikila buyo kwiiya, amumukulwaizye muntu ngomuyiisya kulibambila ciiyo ca Bbaibbele. Amumutondezye bbuku lyanu ndyomubelesya, akumuyiisya mbwakonzya kweenga bwiinguzi naa kubikkila maano kubona mabala naa twaambo tuyandika kapati.
Amumugwasye muntu ngomuyiisya kwiingula mibuzyo mumajwi aakwe. Amucitantamuke cilengwa cakwiile kubuzya buyo mibuzyo mpoonya sikwiiya ubala buyo bwiinguzi bulembedwe mubbuku.
Amumukulwaizye muntu ngomuyiisya kubala cibeela cimwi mu Jwi lya Leza abuzuba. Amumutondezye mulongo wakubala Bbaibbele uuli a jw.org, naa Ngazi Yamulindizi yamu August 1, 2009, peeji 15 (Chicewa) uutondezya nzila iigwasya mbwakonzya kucita boobo. Kuba acilengwa cakubala Bbaibbele abuzuba kuyandika kubeleka canguzu, alimwi bulumbu nkobuli.—Int. 1:2, 3.
Amumutondezye muntu ngomuyiisya mbwakonzya kujana bwiinguzi kumibuzyo yamu Bbaibbele kubelesya Laibbulali ya Watchtower naa LAIBBULALI YAA INTANETI ya Watchtower naa Bbuku Ligwasya Kuvwuntauzya. Amumugwasye kuzyiba mbwaalembwa mazina aamabbuku mubufwaafwi kwaambisya mabbuku aavwula kubelesyegwa kumiswaangano yambungano.

Amusole Kucita Eeci Mwezi Uuno:

Kumamanino aakatwe kamwi akamwi naa kumamanino aacibalo, amumulombe muntu ngomuyiisya Bbaibbele kuti aambe mubufwaafwi nzyaaiya. Ikuti kamutajisi sikwiiya, amwiiye kwaamba mubufwaafwi ncomwabala mu Bbaibbele naa mumuncali uuzwa mu Ngazi Yamulindizi mumajwi masyoonto buyo kutegwa muyaambele mukumvwisya kwanu.