Amuzumanane Kupaila Kutegwa Mukkomaninwe a Leza

Leza wakapa bantu cipego cilibedelede, nkokuti kucikonzya kubandika anguwe alimwi akwaamba mbobalimvwa kwiinda mumupailo. Musinsimi Davida wakapaila kuti: “Yebo Ooswiilila mipailo, bantu bamisyobo yoonse bayooboola kulinduwe.” (Intembauzyo 65:2) Pele ino mbuti mbotweelede kupaila kutegwa Leza atumvwe alimwi akutulongezya?

AMUPAILE KUZWA ANSI AMOYO ALIMWI ACAKULICESYA

Mipailo njomupaila nobeni imupa coolwe cakwaambila Leza zyoonse zili mumoyo wanu, nkokuti kumwaambila bwini mbomulimvwa. (Intembauzyo 62:8) Singuzuzyoonse ulaiyanda mipailo iizwa ansi amoyo.

AMUBELESYE ZINA LYA LEZA LIMUGEME CIINDI NOMUPAILA

Nokuba kuti Leza ulijisi mazina manji aabulemu, ujisi buyo zina lyomwe limugeme. “Ndime Jehova. Eeli ndezina lyangu.” (Isaya 42:8) Izina lyakuti Jehova lilajanika ziindi zibalilwa ku 7,000 mu Jwi lya Leza. Cabulemu, basinsimi banji bakali kulibelesya zina lya Leza ciindi nobakali kupaila kulinguwe. Abrahamu wakaamba kuti: ‘Akaka Jehova ndalomba ndizumanane kwaambaula anduwe.’ (Matalikilo 18:30) Mbubwenya buyo, andiswe tweelede kulibelesya zina lya Leza, lyakuti Jehova, ciindi notupaila.

AMUPAILE MUMWAAMBO NGOMUZYI KABOTU

Leza ulazimvwa nzyotwaamba alimwi ambotulimvwa tacikwe makani amwaambo ngotubelesya. Jwi lyakwe litusyomezya kuti: “Leza tasalululi, pele muzisi zyoonse kufwumbwa muntu uumuyoowa akucita ziluleme ulatambulwa kulinguwe.”—Milimo 10:34, 35.

Nokuba boobo, kutegwa Leza atulongezye, kuli azimbi nzyotweelede kucita kunze buyo lyakupaila. Muzibalo zitobela, tulalanga-langa nzyotweelede kucita.