KUPONA BUUMI BWA BUNAKRISTO
Amusumpule Zyeelelo zya Jehova Zyakulilemeka
Jehova Leza ulabikka zyeelelo zyakulilemeka kubantu. Mucikozyanyo, ulailila kuti cikwati ncintu citeelede kumana akati kwamwaalumi amukaintu. (Mt 19:4-6, 9) Ulakusulaika kutalilemeka kwamusyobo uuli woonse mumakani aakoonana. (1Kor. 6:9, 10) Alimwi ulapa njiisyo kujatikizya nsamino alimwi akulibamba zyalo izizyibya bantu bakwe.—Dt. 22:5; 1Tim. 2:9, 10.
Mazuba aano munyika, bantu banji balazikaka zyeelelo zya Jehova. (Rom. 1:18-32) Balekela mizeezo iidumide kweendelezya nsamino yabo ambobalibamba, alimwi ambobalilemeka. Banji balalisumpula akaambo kazintu zibi nzyobacita alimwi akufwubaazya baabo batobela zyeelelo ziindene azyeelelo zyabo.—1Pet. 4:3, 4.
Mbotuli Bakamboni ba Jehova, cabusicamba tweelede kusumpula zyeelelo zya Leza zyakulilemeka. (Rom. 12:9) Munzila nzi? Cabupampu, tweelede kuzyibya bamwi zintu nzyayanda. Pele alimwi tweelede kuzumanana kutobela zyeelelo zisumpukide mubuumi bwesu. Mucikozyanyo, ciindi notusala zisani alimwi ambotweelede kulibamba, tulakonzya kulibuzya kuti: ‘Sena nzyondisala zitondezya zyeelelo zya Jehova naa zyanyika? Sena nsamino yangu ambondilibamba zitondezya kuti ndili Munakristo uuyoowa Leza?’ Naa ciindi notusala pulogilamu naa filimu yakweebelela, tulakonzya kulibuzya kuti: ‘Sena Jehova ulaikkomanina pulogilamu eeyi? Ino isumpula zyeelelo zyani zyakulilemeka? Sena zintu nzyondisala kulikondelezya zilakonzya kunyonganya zyeelelo zyangu zyakulilemeka? (Int. 101:3) Sena inga zyabafwumpuzya banamukwasyi naa bamwi?’—1Kor. 10:31-33.
Nkaambo nzi ncociyandika kapati kusumpula zyeelelo zya Jehova zyakulilemeka? Ino-ino Kristo Jesu uyoozinyonyoona zisi alimwi abubi boonse. (Ezk. 9:4-7) Balikke aabo ibacita kuyanda kwa Leza mbebayoosyaala. (1Joh. 2:15-17) Aboobo, atuzisumpule zyeelelo zya Jehova zyakulilemeka kutegwa aabo babona bukkale bwesu bubotu bamulemeke Leza.—1Pet. 2:11, 12.
Ino zisani nzyondisama alimwi ambondilibamba zitondezya nzi kujatikizya zyeelelo zyangu zyakulilemeka?
AMWEEBELELE KAVIDIYO KAKUTI AMUBE BALONGWE BA JEHOVA—MWAALUMI OMWE, MUKAINTU OMWE, MWAMANA AMULANGE-LANGE MIBUZYO IITOBELA:
Nkaambo nzi ncocili cabusongo kupona kweelana azyeelelo zya Jehova?
Nkaambo nzi bazyali ncobeelede kutalika kuyiisya bana babo kujatikizya zyeelelo zya Jehova zyakulilemeka kabacili baniini?
Ino mbuti bakubusi alimwi abapati mbobakozya kugwasya bantu kutegwa bagwasyigwe kububotu bwa Leza?