Kabbokesi Kamubuzyo

◼ Ino mbuti mbotweelede kusama akulibamba ciindi notuunka mu Maanda aa Bwami, Maanda aa Miswaangano Mipati amu Maanda aa Mitabi?

Inyika yoonse mboizulwa, Maanda aa Bwami, Maanda aa Miswaangano Mipati alimwi a Maanda aa Mitabi, masena aalibedelede aabelesyegwa mumulimo wa Jehova. Akaambo kakuti masena aaya mabotu, alasalazyigwa alimwi alabambwa kabotu, aboobo ayelede kulemekwa. Kuli kwiindana kapati azyintu nzyotubona munyika ya Saatani. Aabo baswaya masena aabelesyegwa mumulimo wa Jehova beelede kulibonya kuti mbabelesi ba Jehova ibacita luyando lwakwe.

Mbotuli babelesi Banakristo, “tulatondezya kuti tuli basimilimo benibeni ba-Leza” munzila zyoonse, eeci cilabikkilizya ambotusama ambotulibamba. (2 Kor. 6:3, 4) Alimwi tweelede kulilemeka. Ciindi coonse, mbotusama ambotulibamba kweelede kutondezya kuti tujisi bulemu bweelede, buyandika babelesi ba Jehova Leza. Eeci cilayandika kapati notuswaya maofesi mapati ku New York alimwi amitabi iili munyika yoonse.

Ibbuku lya Bakamantene Mukucita Kuyanda kwa Jehova lilapandulula mbotukonzya kusama akulibamba kabotu notutola lubazu mumulimo wamumuunda anotuswaangana kumiswaangano ya Bunakristo. Mpoonya, apeeji 138, muncali 3, lyaamba kuti: “Kamuyeeya kuti zina lyakuti Bbeteli lipandulula “ŋanda ya Leza.” Aboobo, mbotusama, mbotulibamba ambotupona kweelede kuba mbubwenya mbuli notuunka kumiswaangano kukukomba ku Ŋanda ya Bwami.” Aaka kaambo kayandika kapati keelede kutobelwa abasikumwaya makani aa Bwami baswaya Beteli bakkala munsi-munsi abaabo bazwa kule. Kwiinda mukucita boobu, basikuswaya batondezya kuti balijisi bulemu.—Int. 29:2.

Zisani nzyotusama zyeelede kututondezya kuti tuli “bana-Leza.” (1 Tim. 2:10) Kusama akulibamba kabotu kulakonzya kupa kuti bamwi balemeke bukombi bwini-bwini bwa Jehova. Nokuba boobo, kulibonya kuti bamwi bakwesu alimwi abacizyi balaciindilizya kusama munzila iitali yabulemu, balasama cabuyamba naa zisani zibangalala nobaswaya maanda aabelesyegwa mumulimo wa Jehova. Kusama kuli boobo, takuyandiki ku Banakristo lyoonse. Mumakani aaya, amubukkale bumwi bwa Bunakristo, tweelede kutobela bukkale busumpukide ibwaandaanya bantu ba Leza kunyika. (Rom. 12:2; 1 Kor. 10:31)

Aboobo nomuswaya maofesi mapati ku New York naa ku mitabi imwi, kunyina makani naa mwakalibambila buya kwaakuswaya naa kwaakulyookezya, mweelede kulibuzya kuti: ‘Sena mbondisama akulibamba zyitondezya kuti ndipa bulemu kubusena nkondiya kwaakuswaya? Sena cipa bulemu kuli Leza ngondikomba? Sena bamwi balakonzya kutyompwa akaambo kambondiboneka?’ Kwiinda mukusama alimwi akulibamba kabotu, “kutegwa muzintu zyoonse balemeke njiisyo zya Leza Mufutuli wesu.”—Taitasi. 2:10, BT.