Ikusama Kabotu Kutondezya Bulemu Kuli Leza
1. Ino mbuti mbotukonzya kutondezya kulumba kumuswaangano wesu wacooko uuboola?
1 Lino-lino tuyooba acoolwe cakuba beenzu ba Jehova ku Muswaangano Wacooko wamu 2003 wa “Amumulemeke Leza.” Elo kaka tulalumba kapati kuli Jehova akaambo kakututamba kupobwe lyakumuuya lili boobu litalikomeneni! Tulakonzya kutondezya bulemu mbotujisi kulinguwe akulumba kuzintu zyakwe zyakumuuya nzyatupa kwiinda munzila mbotusama alimwi akulibamba.—Int. 116:12, 17.
2. Ino nkaambo nzi ncociyandika kapati kulindiswe kusalala alimwi akulibonya kabotu?
2 Kusalala Akucita Zintu Munzila Iiluzi: Tweelede kulibonya munzila iitondezya zyeelelo zya Leza uusalala akucita zintu munzila iiluzi. (1 Kor. 14:33; 2 Kor. 7:1) Mubili wesu, masusu, amala zyeelede kuti kazisalala alimwi tweelede kulibonya kabotu. Ikutasama munzila iilibonya kabotu kulidumide mazubaano. Nokuba boobo, akaambo buyo kakuti muntu umwi ulaampuwo kapati mubbasikopo imwi naa muntu uusumpukide muzisobano tasami kabotu, takali kaambo keelede kupa Munakristo kucita boobo. Ikuti naa tutobela nzila zipya zyakusama, bantu ciyoobayumina kubona kwaandaana kuliko akati kabaabo ibabelekela Leza wakasimpe alimwi abatamubelekeli.—Malk. 3:18.
3. Ino mbuti mbotukonzya kusinizya kuti tusamide munzila yeendelana alulayo luli ku 1 Timoti 2:9, 10?
3 Ikusama Kweelela Banakristo Bakambausi: Ciindi mwaapostolo Paulo naakalembela mulangizi Munakristo Timoteo, wakakulwaizya ‘bakaintu kusama bweelede, cabulemu akulibombya. . . . Pele baleelede kulibotezya amilimo mibotu mbubonya mbubeelede bakaintu Banakristo.’ (1 Timo. 2:9, 10, Ci) Ikutegwa tusinizye kuti tusamide bweelede, kuyandika kubikkila maano kapati. Zyakusama zyeelede kuti kazilibonya kabotu alimwi kazisalala, ikutali zitalibonyi kabotu alimwi zibusya mizeezo iitaluzi.—1 Pet. 3:3.
4, 5. Ino nkucenjezya nzi Banakristo baalumi abakaintu nkobeelede kutobela?
4 Paulo alimwi wakacenjezya ikutaciindilizya kwiinda “[mu]kuliluka mukulibotya nikuba kugama kusama zisani zidula nituba tuwenge twangolida naa twangale.” (1 Timo. 2:9, Ci) Inzila yabusongo Banakristo bakaintu njobeelede kutobela nkutaciindilizya mukubelesya ngale, mbobaluka masusu naa muzintu zimwi zyakulibotya.—Tus. 11:2.
5 Alimwi lulayo Paulo ndwaakapa Banakristo bakaintu lulijisi njiisyo iibeleka ku Banakristo baalumi. Bakwesu beelede kutantamuka nsamino mpya iitondezya mizeezo yanyika. (1 Joh. 2:16) Mucikozyanyo, mumasi amwi kusama zyakusama zipati kulidumide, pele nsamino eeyi tailibonyi munzila yeelede ku mubelesi wa Leza.
6. Ino nkaambo nzi ncotweelede kubamba zyeelelo zisumpukide mukusama akulibamba kwesu notuunka akupiluka kuzwa kumuswaangano, notuli amuswaangano alimwi anocamana cibeela capulogilamu cabuzuba?
6 Ciindi Cakulyookezya: Ciindi camapulogilamu, bakwesu banji alimwi abacizi balapa cikozyanyo citaliboteli kumakani akusama akulibamba. Pele, malipooti atondezya kuti bamwi tababikkili maano ciindi nobaunka naa kupiluka kuzwa kumuswaangano antela ciindi nobali mukulyookezya amana mapulogilamu. Mubwini, mbotusama akulibamba, kufwumbwa naa nciindi camapulogilamu antela muziindi zimwi, kulabajatikizya bantu mbobabalanga bantu ba Leza. Mbwaanga tulasama mabbaaji eesu aakumuswaangano, lyoonse tweelede kusama munzila yeelede kubabelesi Banakristo. Eeci kanji-kanji cipa kuti bamwi batulumbaizye akupa kuti tubakambaukile.—1 Kor. 10:31-33.
7. Ino mbuti kusama kwesu kubotu alimwi akulibamba mbozikonzya kubajatikizya bamwi?
7 Mbubwenya mbuli kumwetamweta mbokubotya busyu bwesu, akwalo kusama akulibamba bweelede kuyungizya bulemu bwamulumbe ngotwaambilizya alimwi ambunga yesu. Bamwi ibayootulangilila mwaka uuno lya Muswaangano Wacooko wa “Amumulemeke Leza” balakonzya kukulwaizyigwa kuti babuzye ikaambo ncotwiindene alimwi kumamanino balakonzya kwaamba kuti: “Atweende anywebo, nkaambo twamvwa [akulibonena] kuti Leza mpali akati kanu.” (Zek. 8:23) Umwi aumwi wesu aatondezye bulemu kuli Jehova kwiinda mukusama akulibamba.
Kabbokesi kali apeeji 5]
Amusame Kabotu
▪ Nomuli mulweendo
▪ Amuswaangano
▪ Muciindi cakulyookezya