Ikulibonya Munzila Iisalala Alimwi Iitembaulika
1. Mbotulibambila muswaangano wacooko, nkaambo nzi ncotweelede kubikkila maano mbotulibonya?
1 “Bakamboni ba Jehova mbantu babotu kapati! Bantu banu balijisi luzyalo, basama kabotu alimwi balijisi bulemu kapati.” Oobo mbwaakaamba umwi wiiminina hotela kujatikizya bakwesu abacizyi bamwi amuswaangano wacooko umwi mwakali. Kumuswaangano uumbi, mubelesi wamu hotela wakati: “Cilalibonya kuti bantu banu basamina kuti bamukkomanisye Leza.” Inzya, basimuswaangano balabonwa abantu bambi. Aboobo tweelede kusama munzila ‘yeelela makani mabotu,’ alimwi eeci kanjikanji cikulwaizya ibatali Bakamboni kuti batulumbaizye calo citondezya antangalala kuti tuli basimilimo ba Leza. (Flp. 1:27) Mbotulibambila muswaangano wacooko, cilayandika kapati kubikkila maano mbotulibonya kakucili ciindi.
2. Ino nkaambo nzi ncocili ciyumu kusama akulibamba munzila iili kabotu?
2 Sikwiiya Jakobo wakalemba kuti: “Busongo buzwa kujulu, lutaanzi bulasalala.” (Jak. 3:17) Ikusalala munzila mbotulibonya cilakonzya kuyuma. Nyika ya Saatani iizwide kutalilemeka iyunga bantu kuti kabasama zisani ziteelede, izibusya muzeezo wakoonana alimwi izitali kabotu. (1 Joh. 2:15-17) Aboobo, notusala kujatikizya kusama akulibamba, tweelede kubikkila maano kulaya kwa Bbaibbele ooku kwa “kukazya kasampusampu azisusi zibi zyaansi ano, tuleelede kukala cakulibatamika . . . ciindi ecino casunu.” (Tit. 2:12) Tatuyandi kubanyemya bamwi akaambo kambotulibonya kufwumbwa naa mbakwesu antela mbantu batulangilila.—1 Kor. 10:32, 33.
3. Ino mibuzyo nzi iyootugwasya kulanga-langa mbotulibonya?
3 Kusama Kabotu Alimwi Cabulemu: Nomulibambila kuunka kumuswaangano, amulibuzye kuti: ‘Sena zyakusama zyangu zilatondezya bulemu antela zipa kuti bantu batalike kubikkila maanu kulindime? Sena zilatondezya kuti tulababikkila maano mbobalimvwa bamwi? Sena cilaya cangu ncipati nsingo cakuti nkolo zilalibonya, alimwi sena ncifwaafwi cakuti da lilalibonya? Sena zyakusama zyangu zilatondezya zibeela zyamubili zyeelede kusiswa naa zilajata? Sena zyakusama zyangu zilasalala alimwi tazinunki nkasaalo? Eelyo nondilyookezya lyamana mapulogilamu, sena ndinoolibonya mbwaelede mukambausi? Antela sena zyakusama zyangu zinoojisi tombe naa kuciindilizya kusama zisani zyamisyobo mipya, kusama zisani zisamwa ciindi cakulyookezya naa cakusobana alimwi ziteelede kuli simuswaangano uusamide bbaaji? Sena zyakusama zyondisama ciindi cakulyookezya zilandipa kumvwa nsoni kupa bumboni bwamukwiizya?’—Rom. 15:2, 3; 1 Tim. 2:9.
4. Ino mbuti bantu bamwi mbobakonzya kutugwasya kulibonya munzila iisalala?
4 Tulakonzya kugwasyigwa munzila mbobazilanga zintu Banakristo basimide. Bamakaintu beelede kubuzya balumi babo zyakusama mbozikonzya kulibonya kuli bamwi. Bazyali Banakristo balakonzya kubagwasya bana babo bakubusi kujatikizya makani aaya. Kuyungizya waawo, bacizyi bapati ibajisi cikozyanyo cibotu balakonzya ‘kufundisya bakaintu bacili bana kuti balibatamike alimwi akusalala’ munzila mbobalibonya “kuti makani aa-Leza atasampaulwi.” (Tit. 2:3-5) Mabbuku eesu alapa zikozyanyo zibotu zitondezya nsamino mbotu alimwi yabulemu.
5. Ino mbuti toonse mbotukonzya kumulemeka Jehova lyamuswaangano?
5 Atumulemeke Jehova: Miswaangano yacooko ilatupa toonse coolwe citaliboteli cakutembaula Jehova, ikutali buyo balikke ibatola lubazu muzibeela. Masimpe, ikulilemeka kwesu mbotuli Banakristo alimwi amajwi ngotwaamba kuyoomulemeka. Pele cintu cakusaanguna batulangilila ncobabona kujatikizya ndiswe, ninsamino yesu alimwi ambotulibamba. Toonse atumulemeke Jehova kwiinda mukulibonya munzila iisalala alimwi iitembaulika.—Int. 148:12, 13.
Kabbokesi kali apeeji 6]
Zikonzya Kutugwasya Kulibonya Munzila Iitembaulika
◼ Jwi lya Leza
◼ Kulilingula tobeni
◼ Kutobela lulayo lwabamwi
◼ Mabbuku aa Bunakristo