Amutembaule Jehova Mumbungano Mpati
1, 2. Ino miswaangano yacooko itupa coolwe nzi, alimwi muunzila nzi motukonzya kucita oobo?
1 Mwaka amwaka miswaangano yesu yacooko ilatupa coolwe citaliboteli cakutembaula Jehova. Tulimvwa mbuli bwakalimvwa Davida iwakaimba kuti: “Njookulumba mumbungano impati, njookutembaula akati kabantu banji.” (Int. 35:18) Ku Muswaangano Wacooko ngotulangila wa “Atumumvwide Leza,” mbuti mbotukonzya kusinizya kuti tupa Jehova kuti atembaulwe mbotuli bantu bakamantene?
2 Inzila imwi mbotukonzya kucita boobu nkwiinda mukulilemeka. Balangizi babusena bumwi bucitilwa miswaangano bakaamba kuti: “Kweelana amiswaangano yanu, twali kwaambila nkamu zimwi zyazikombelo izyakali kulomba kuti zibelesye busena oobu kuti kababoola kuzikulangilila mbuli Bakamboni ba Jehova mbobacita muswaangano, mbwaanga balo balijisi bubambe bubotu.” Mbwaanga Leza uleelede kulemekwa, toonse tulakonzya kupa kuti alemekwe kwiinda mukulilemeka, mbotubelekela antoomwe alimwi ambotulibonya.—1 Pet. 2:12.
3, 4. Ino kulibombya kuyootugwasya buti kusama munzila yeelede babelesi Banakristo ciindi notuli kumuswaangano anocamana cibeela acimwi?
3 Mbotulibonya: Kutegwa tusame akulibamba munzila iipa kuti Leza alemekwe kuyandika kulibombya. (1 Tim. 2:9) Ibbuku lya Cikolo Camulimo apeeji 132 lyaamba kuti: “Imuntu uulibombya tayandi kutyompya bamwi alimwi akuba ampuwo munzila iitaluzi.” Mumasi manji kusama zisani zitapi bulemu kulidumide. Nokuba boobo, Jehova ulakkomana eelyo notusoleka kumwiiminina munzila iiluzi. (Inc. 15:14) Kufwumbwa busena nkoukonzya kucitilwa muswaangano, ikubungana kwesu kulaba “mbungano impati” kwa mazuba otatwe aamuswaangano. Aboobo, ciindi notubungana kuli Jehova, tweelede kusama zisani zipa bulemu ku Muntu wiinda kusumpuka mububumbo boonse.—1 Mak. 29:11.
4 Alimwi tweelede kubikkila maano mbotulibonya nocamana cibeela acimwi abuzuba. Nokuba kuti tuyanda kuti tusame zisani nzyotuyanda ciindi notulyookezya naa notulya kuŋanda nkobaulisya zyakulya, cilayandika kuti nsamino yesu alimwi ambotulibamba kazyeelela “bana-Leza.” (1 Tim. 2:10) Zisani zili kabotu tazili zyeezyo zidumide munyika. (1 Joh. 2:16, 17) Imabbuku eesu aa Bunakristo alijisi zifwanikiso zigwasya zya baalumi abakaintu ibali mubukkale busiyene-siyene ibasamide zisani zipa bulemu alimwi zili kabotu. Ikusama bbaaji ciindi notuli mudolopo mucitilwa muswaangano, kuyoopa kuti katuyeeya kuti tuli babelesi Banakristo ciindi coonse.—2 Kor. 6:3, 4.
5, 6. Mbuti mbotukonzya kulemeka tebule lya Jehova lya kumuuya?
5 Amulemeke Tebule lya Jehova: Mwami Mupati mububumbo boonse watubambila pobwe. (Is. 25:6; 1 Kor. 10:21) Ikuti katubulemeka kapati busena bwesu atebule lya Jehova lyakumuuya, tuyooba amakanze aakujanika mazuba oonse otatwe aamuswaangano. Sena mwakalibambila kale nkomuya kukkala, mbomuyakweenda akulomba ciindi kumulimo nkomubeleka? Sena mulijisi ciindi cinji cakulibambila akweenda kutegwa mukasike kubusena bwamuswaangano kakucili ciindi kucita kuti mukajane akukkala, mukayanzane abanyoko alimwi akubasangana mukutembaula Jehova munyimbo amupailo wakujula?—Int. 147:1
6 Ikulemeka tebule lya Jehova kuyootukulwaizya kubikkila maano kumakani alimwi akuleka ciyanza cakwaambaula abamwi, kulya naa kweendeenda. Kwiinda muciinga ca muzike musyomesi uucenjede, Jehova uli mukutupa cakulya cakumuuya ncotuyandika lino. (Mt. 24:45) Kunyina wandiswe uyanda kwiindwa cakulya eeci. Ibazyali beelede kukkala abana baabo kutegwa bagwasyigwe kapati.—Dt. 31:12.
7. Ncinzi ncotwalombwa kuti tukacite kujatikizya cakulya camasikati, alimwi nkaambo nzi?
7 Mwalombwa kuti mukatoleele cakulya camasikati muciindi cakuti mukazwe abusena bwamuswaangano kuya kukuula cakulya muciindi cakulyookezya masikati. Cakali kukkomanisya kuti ibunji bwa basimuswaangano bakaatobela malailile aaya lya muswaangano imwakali. Inga cabota ikuti mwaka uno boonse bakacite oobo. (Heb. 13:17) Ibubambe oobu bulatupa coolwe cibotu cakuyanzana abakwesu munzila iiyaka alimwi bupa kuti kube lukamantano aluumuno ilupa kuti Jehova alemekwe.—Int. 133:1.
8, 9. Ino muswaangano wacooko utupa coolwe nzi acimbi cakutembaula Jehova?
8 Bukambausi bwa Mukwiizya: Ciindi notuunka anotuzwa kumuswaangano tulijisi ciindi cinji cakutembaula Jehova amilomo yesu. (Heb. 13:15) Kufwumbwa naa tulalya kuŋanda nkobaulisya zyakulya, tuli mulweendo naa tulaula zintu, atujane nzila zyakupa bumboni. Notuzwa kumuswaangano tunoojisi twaambo tunji tuyandika twakumuuya. Atukaambile bamwi twaambo ootu tubotu ciindi notwiizya.—1 Pet. 3:15.
9 Tulacilangila coolwe eeci cibotu cakutembaula Jehova “akati kambungano.” (Int. 26:12) Caantoomwe atukatembaule Jehova ku Muswaangano Wacooko wa “Atumumvwide Leza.”
[Kabbokesi kali apeeji 6]
Ziyeekezyo zya Muswaangano Wacooko
◼ Ciindi Noitalika Miswaangano: Imazuba oonse otatwe imapulogilamu anootalika aciindi ca 8:45. Kakuceede buyo maminiti masyoonto kuti cibeela acimwi citalike, sicuuno unookkede kucibumbili kumwi nyimbo zya Bwami kazilila. Toonse tweelede kuti katukkede ciindi eeci kutegwa ipulogilamu ikatalike kabotu. Mubuzuba bwakusaanguna abwabili imiswaangano inoomana aciindi ca 16:05 eelyo mubuzuba bwatatu iyoomana aciindi ca 15:30.
◼ Kuyobola Zyuuno: Zyuuno inga zyabikkilwa buyo baabo mbomwaboola limwi mumootokala naa mbomukkala limwi kuŋanda.
◼ Zyakusanga: Kulabelesyegwa mali aali mbwaabede mukubamba muswaangano wacooko. Tulakonzya kutondezya kuti tulalumba kwiinda mukusanga cakulisungula kumulimo wanyika yoonse ku Ŋanda ya Bwami yesu naa kumuswaangano. Macceki oonse aasangwa kumuswaangano ayelede kubbadelwa ku “Watch Tower.”
◼ Cakulya Camasikati: Mwalombwa kuti mukaletelezya cakulya camasikati muciindi cakuti mukazwe abusena bwamuswaangano kuya kuula cakulya muciindi cakulyookezya masikati. Inga mwabelesya mutaanga ngomukonzya kubikka munsi acuuno canu. Mitaanga mipati, mabbodela alimwi abukoko tazizumizyidwe kubusena bwamuswaangano.
◼ Kulekooda: Mincini yakulekooda iili yoonse tayeelede kubikkwa kumagesi aabelesyegwa naa kumincini yamajwi alimwi tayeelede kunyonganya bamwi ciindi niibelesyegwa.
◼ Kufwotola: Ikuti kamuyanda kufwotola, mutabelesyi mumuni lyamiswaangano.
◼ Mapeja ama Celofoni: Eezyi zyeelede kubambwa kabotu kutegwa zitanyonganyi bamwi.
◼ Ntenda: Ikuti kwacitika ntenda iyandika busilisi kumuswaangano wacooko, amubone sikugwasyilizya uli afwaafwi mpoonya walo uyoozyibya Bacibeela ca Lugwasyo Lutaanzi kutegwa ibakwesu ibeelela kupa lugwasyo lutaanzi amuswaangano bakabone ntenda eeyo akupa lugwasyo.
◼ Malailile: Kwaakwiinda mwezi omwe naa yobile mwaakuzwa ku Muswaangano Wacooko wa “Atumumvwide Leza,” amukabelesye maminiti ali 15 kusika ku 20 aamuswaangano wamulimo (ambweni kubelesya cibeela ca ziyandika zyambungano) kwiinduluka twaambo twaku muswaangano ooto basikumwaya ntobajana kuti tulagwasya mumulimo wamumuunda. Cibeela eeco caalubazu ca Muswaangano wa Mulimo ciyootupa coolwe cakupandulula mbotuzibelesya nzyotwakaiya kumuswaangano alimwi ambotwagwasyigwa kuzwidilila kapati mumulimo wesu.