Amutobele Kristo Kwiinda Mukutondezya Bulemu
1. Ino mbuti mutwe wamakani wamuswaangano wacooko wamwaka uuno mboweendelana akutondezya bulemu?
1 Ibbaibbele lipandulula Jehova Mwami Wakujulu Aansi, kuti usamide bulemu. (Int. 104:1) Jesu lyoonse wakali kwaamba akucita zintu munzila yakali kulemeka Bausyi alimwi abubambe Bwabo. (Joh. 17:4) Aumwi uyooba acoolwe cakwiiya Jesu alimwi akupa bulemu kuli Jehova ciindi ca Miswaangano Yacooko iiboola iijisi mutwe wakuti “Amutobele Kristo!”
2. Ino mbuti kulibambila kwesu kwakuyoojanika lyacibeela acimwi mbokulemeka Jehova?
2 Bukombi Bupa Bulemu: Tulakonzya kumulemeka Jehova kwiinda mukulibambila kuyoojanika kupobwe lyakumuuya ndyaatubambila. Sena mwabandika kale abasikumulemba mulimo alimwi akulibambila kuyoojanika mazuba oonse otatwe aamuswaangano wacooko? Sena mwalibambila kuyoosika kakucili ciindi kutegwa mukajane aakukkala alimwi akutola lubazu mulwiimbo lwakujalula alimwi amupailo? Sena mwalibambila zyakulya zyamasikati kutegwa mukalide abusena bwamuswaangano antoomwe abakwesu? Kumatalikilo kwacibeela acimwi ciindi sicuuno natulomba kuti tukkale nyimbo kazitanatalika, tweelede kufwambaana kwiileka mibandi yesu eelyo akukkala muzyuuno zyesu kulindila kuti mapulogilamu atalike.
3. Ino mbuti kubikkila maanu kupulogilamu mbokupa bulemu kubukombi bwesu?
3 Kubikkila maanu kupulogilamu akwalo kulamulemeka Taata wesu wakujulu. Umwi mulombwana simubweza twaambo naakamana kulangilila muswaangano umwi wacooko kubusena nkwakkala wakalemba kuti, basikulangilila balakonzya kukulwaizigwa akaambo “kacikozyanyo cibotu cabantu bajanika ciindi nobatobelezya cakaumu-umu zili mukwaambwa alimwi citondezya kuti akabanjila mumoyo makani aakumuuya.” Alimwi wakaamba kuti “bana banji . . . , bakali kulilemeka kapati naa bakajisi bubi kulanga tupango twamu Bbaibbele.” Ciindi camapulogilamu tacili nceciindi cakubandika, kulemba tugwalo mumaselofooni, kulya, naa kweendeenda pe. Bana beelede kuti kabakkede antoomwe abazyali babo kutegwa bazyali bakonzye kubagwasya kubikkila maanu kupulogilamu. (Dt. 31:12; Tus. 29:15) Kusoleka ooku kutondezya kuti tulabalemeka bamwi alimwi tulalumba cakulya cakumuuya ciyandika kapati ncotwaabilwa.
4. Ino nkaambo nzi ncotweelede kusama cabulemu notuli kumuswaangano wacooko?
4 Kusama Cabulemu: Bantu banji bakalumba kapati kujatikizya ziyeezyo zyakali mumakani aamuswaangano wacooko wamwaka wamana aakajisi mutwe wakuti “Amutondezye Bulemu bwa Bunakristo Ciindi Coonse,” alo aakakankaizya kuti babelesi ba Leza beelede kusolekesya kutondezya bulemu bwa Bunakristo mukusama alimwi akulibamba. Mwaka uuno alimwi tweelede kwaabikkila kapati maanu makani aaya. Mbotulibonya kutondezya mbotulimvwa kujatikizya Jehova alimwi acoolwe cakuba Bakamboni bakwe. Lyoonse tweelede kusama mbuli baabo ‘balemeka Leza.’—1 Tim. 2:9, 10.
5. Ino mbuti mbotukonzya kunoolibonya cabulemu ciindi cakulyookezya mucilawo mucitilwa muswaangano wacooko?
5 Sena tweelede buyo kutondezya bulemu lilikke notujanika kumapulogilamu? Kamuyeeya kuti bantu banji bayootubona katusamine mabbaaji aakumuswaangano wacooko ciindi twanooli mucilawo mucitilwa muswaangano wacooko. Mbotulibonya kweelede kutwiindanya kapati abantu batali Bakamboni. Aboobo, nociba ciindi cakulyookezya, mbuli ciindi notwiinka kuyoolya amana mapulogilamu, tweelede kusama munzila iitondezya kuti tuli babelesi bali kumuswaangano wacooko alimwi tatweelede kusama zisani mbuli majini, zibbudula, naa masikipa. Eelyo kaka eeci ciyoopa bumboni bubotu kubantu bamucilawo! Jehova ulakkomana ciindi kusama kwesu nokutondezya mulimo ngotujisi wakuba babelesi bakwe.
6. Ino nzintu nzi zibotu ziboola akaambo kakutondezya bulemu bwa Bunakristo?
6 Zyakacitika Zikkomanisya: Kutondezya bulemu bwa Bunakristo kumiswaangano yesu yacooko kutupa zyoolwe zyakucita bukambausi bwamukwiizya alimwi kulabakulwaizya kapati bantu batulangilila. Nowakamana muswaangano wacooko umwi, mubelesi wamfulumende umwi wakaamba kuti: “Tatuna buzuba twabona bantu balilemeka kapati boobuya. Nywebo mucita zintu Leza nzyayanda kuti katucita.” Kutondezya bulemu citondezya kuti tulalemekana akuyandana alimwi kulamulemeka Jehova. (1 Pet. 2:12) Eeci citondezya bulemu bwesu bwabuna Leza alimwi akulumba kwesu kucoolwe cakuyiisyigwa a Taata wesu. (Heb. 12:28) Atusolekesye kutondezya bulemu notulangila Muswaangano Wacooko wamwaka uuno wakuti “Amutobele Kristo!”
[Kabbokesi kali apeeji 5]
Ziyeezyo zya Muswaangano Wacooko
◼ Ciindi Camapulogilamu: Mazuba oonse otatwe imapulogilamu anootalika aciindi ca 8:20. (Ku Ŋanda Yakucitila Miswaangano Mipati iyakayakilwa mu Lusaka naa ku Kitwe, milyango iyoojulwa ciindi ca 7:00). Ciindi nyimbo zya Bwami zyaakutalika kulila, toonse tweelede kuti tukakkale abusena bwesu kutegwa mapulogilamu akatalike cabulemu. Mu Buzuba Bwakusaanguna a Bwabili, mapulogilamu ayoomana aciindi ca 16:25, eelyo mu Buzuba Bwatatu ayoomana aciindi ca 15:45.
◼ Kuyobola Busena: Busena bwakukkala inga bwayobwedwa buyo baabo mbomwaboola limwi mumootokala naa mbomukkala limwi kuŋanda.
◼ Cakulya Camasyikati: Mwalombwa kuti mukaletelezye cakulya camasyikati muciindi cakuti mukazwe abusena bwamuswaangano kuya kukuula cakulya iciindi cakulyookezya masyikati. Inga mwabelesya mutaanga naa cinzuma ncomukonzya kubikka munsi acuuno canu. Mitaanga naa zinzuma zipati, mabbodela alimwi abukoko tazizumizyidwe abusena bwamuswaangano.
◼ Zyakusanga: Kulabelesyegwa mali aali mbwaabede mukubamba muswaangano wacooko. Tulakonzya kutondezya kuti tulalumba kwiinda mukusanga cakuliyandila kumulimo wanyika yoonse ku Ŋanda ya Bwami yesu naa kumuswaangano. Macceki oonse aasangwa kumuswaangano ayelede kubbadelwa ku “Watch Tower Society.”
◼ Ntenda: Ikuti kwacitika ntenda abusena bwamuswaangano iiyandika busilisi, amubone sikugwasyilizya uuli afwaafwi walo uyoozibya bacibeela ca Lugwasyo Lutaanzi kutegwa ibakwesu beelela kupa lugwasyo lutaanzi amuswaangano bakabone ntenda eeyo akupa lugwasyo.
◼ Kulekkooda: Mincini yakulekkoodya iili yoonse tayeelede kubikkwa kumincini yamajwi naa kumagesi aabelesyegwa alimwi tayeelede kunyonganya bamwi ciindi niibelesyegwa.
◼ Mafwuta Aanunkilila Kapati: Luyooba lweetelelo ikuti tiitwabelesya mafwuta aanunkilila kapati naa mapefyuumu aakonzya kunyonganya baabo baciswa bulwazi bwakufwundilila naa malwazi amwi aakozyanya ayaaya.—1 Kor. 10:24.
◼ Mafoomu aakuti Amuzumanane a Muntu Ooyu: Foomu ya Amuzumanane a Muntu Ooyu (S-43) yeelede kubelesyegwa kupa twaambo tujatikizya muntu uuli oonse uutondezya luyandisisyo akaambo kabukambausi bwamukwiizya mbotwacita ciindi camuswaangano wacooko. Basikumwaya beelede kuletelezya foomu ya Amuzumanane a Muntu Ooyu yomwe naa obile kumuswaangano wacooko. Mafoomu amanizigwa kwiingulwa mibuzyo, ayelede kupegwa ku Cibeela Cilanganya Mabbuku naa kuyoopa mulembi wambungano yanu mwaakujokela.—Amubone Mulimo Wesu wa Bwami wa February 2005, p. 7.
◼ Tombe: Tuyanda kuti busena bwesu bwamuswaangano wacooko kabusalala akusumbula lyoonse. Ikuti katubikkila maanu alimwi akubwezelela cakulya cesu casyaala, mapepa alimwi azintu zimwi akuzisowela kubusena busowelwa tombe amuswaangano wacooko, eeci citondezya mbotulyaabide kuli Leza. Ciindi camuswaangano wacooko uuboola, toonse atukasoleke kusalazya busena bwesu bwakukombela alimwi akulilemeka kutegwa ‘tulemeke muziyanza zyoonse lwiisyo lwa-Leza Mufutuli wesu.’—Tit. 2:10.
◼ Zimbuzi: Bana basyoonto beelede kusindikilwa abazyali lyoonse naa muntu umwi mupati ciindi nobaunka kucimbuzi naa kukusamba kumaanza bazwa mucimbuzi. Ciindi camiswaangano, ziindi zimwi bana balimvwa kukatala kwainda woola lyomwe naa kwiinda waawo. Kutegwa bajane kaambo kabapa kweendeenda, bana bunji bwaziindi balaba acilengwa cakwiinka-inka kucimbuzi ziindi zinji ciindi camapulogilamu, calo cipa kuti bamwi banyonganizigwe. Ikuti bazyali baamba kuti aumwi mwana wabo abelesye cimbuzi miswaangano kaitanatalika, inga tiikwayandika kapati kuti batalike kunyonganya lyamiswaangano ciindi cisyoonto buyo bazwa kucimbuzi. Alimwi kusindikila bana nobaunka kucimbuzi alimwi akukusamba kumaanza bamana kubelesya cimbuzi kupa kuti bana besu basyoonto bakwabililwe.