Sena Mulilibambilide Kuyoojanika Kupobwe Lyakumuuya?

1. Ino nzyintu nzi nzyotuyandika kucita ciindi notulibambila pobwe?

¹ Ikutegwa pobwe lyeende kabotu, kuyandika kulibambila kapati. Kuyandika kujana zyakulya, kuzijika kabotu alimwi akuzyaabila. Kwaabila cakulya kweelede kweendelezyegwa kabotu. Kuyungizya waawo, busena bwakuyoolida zyakulya eezyi bweelede kubambwa. Abalo bantu batambwa beelede kulibambila, kapati ikuti naa bayooenda musinzo mulamfwu kutegwa bakasike kubusena oobu. Nokuba kuti kuli mulimo mupati uujatikizyidwe, kulya cakulya cinona alimwi ciyaka mubili antoomwe abalongwe besu alimwi abamumukwasyi kulakkomanisya kapati. Mumazuba masyoonto buyo, Bakamboni ba Jehova nyika yoonse bayoobungana mumasena aaindene-indene kutegwa bakalye cakulya cakumuuya icakali kulangilwa kwamazuba manji—Muswaangano Wacooko uujisi mutwe wakuti “Amulangile!” Mulimo mupati wakubamba mapulogilamu azyintu zimwi ziyoocitika wakacitwa kale. Toonse twatambwa kumuswaangano ooyu. Ikutegwa tukajanike alimwi akugwasyigwa kapati, andiswe tweelede kulibambila aumwi kumugama.—Tus. 21:5.

2. Ino ncinzi ncotuyandika kucita kutegwa tukajanike kucibeela acimwi capobwe lyakumuuya eeli?

² Ncomukonzya Kucita Kutegwa Mukagwasyigwe Kapati: Sena mwalibambila kale kutegwa mukajanike kwamazuba oonse aapobwe lyakumuuya eeli? Ikuti kakuyandika, amubandike abasikumulemba mulimo kubalomba kuti mukajanike kuzibeela zyoonse zyamuswaangano wacooko, kubikkilzya abuzuba bwakusaanguna. Sena mwalibambila kale kujatikizya zyakweendela alimwi ankomuyoona? Baalu beelede kubona masimpe kuti babalanganya bacembeede alimwi abaabo baciswa-ciswa ikubikkilizya abambi banga bayandika lugwasyo.—Jer. 23:4; Gal. 6:10.

3. Ino nkaambo nzi ncotuteelede kujanika kumuswaangano wamasi nkotutatambidwe?

³ Bamwi bayoojanika kumiswaangano yamasi. Mutalubi kuti kuli mweelwe buya wabantu ibatambwa kuyoojanika kumiswaangano eeyi. Noibamba miswaangano eeyi, mbunga ilalanga-langa twaambo tunji kutegwa ibone mweelwe wabantu ibayandika kutambwa. Bantu balakonzya kutalika kwaatikizyanya ikuti basikumwaya baakujanika kumuswaangano wamasi nkobatakatambwa.

4. Ino nziyeezyo nzi ziyootugwasya kuti katulibambilide abuzuba ciindi mapulogilamu kaatanatalika?

⁴ Amulibambile kunoofwambaana kusika kumuswaangano wacooko buzuba abuzuba kutegwa mukajane aakukkala mapulogilamu kaatanatalika. Amuzandule maminiti masyoonto mapulogilamu kaatanatalika kutegwa mulange-lange zilembedwe akapepa kapulogilamu. Eeci ciyoomugwasya kulibambila mumoyo wenu kutegwa mukamvwisye twaambo tuyookananwa. (Ezr. 7:10) Ciindi sicuuno wamuswaangano naamba kuti nyimbo ziyanda kutalika kulila, amuziswiilile mpoonya amulibambile kutola lubazu mulwiimbo lwakujalula alimwi amupailo.

5. Ino mukwasyi wesu inga wagwasyigwa buti ciindi camapulogilamu?

⁵ Ikuti bamumukwasyi bakkalila antoomwe lyamuswaangano wacooko, bazyali inga bacikonzya kubona masimpe kuti bana babo balaswiililisya kumapulogilamu. (Dt. 31:12) Toonse tukulwaizyigwa kunootobelezya mu Bbaibbele lyesu ciindi magwalo naabalwa. Kulemba twaambo mubufwaafwi inga kwamugwasya kubikkila maano kumapulogilamu. Mpoonya, twaambo ntomwalemba tuyoomugwasya kwiibaluka twaambo tupati-pati twabandikwa mumakani. Mutataliki kubandika twaambo tutayandiki ciindi camapulogilamu nokuba kunyamauka-nyamauka. Ikuti kamujisi luwaile lwamunkomo, lutamunyonganyi pe naa kunyonganya bamwi ciindi camapulogilamu. Zyamana zibeela zyamuswaangano zyabuzuba abumwi, inga mwaizya abamwi kujatikizya twaambo twamukkomanisya.

6. Ino ncibeela nzi camuswaangano wacooko cilibedelede, alimwi ino mbuti mbotunga twacibelesya kabotu?

⁶ Kumuswaangano wacooko, tujisi coolwe cakuyanzana abakwesu alimwi abacizyi kwalo kutacitiki kubantu bakunyika. (Int. 133:1-3; Mk. 10:29, 30) Amukanze kulipandulula kuli baabo mbomukkede limwi aafwaafwi alimwi akubandika ambabo ciindi camasyikati. Oobu mbobubotu bumwi bwakuletelezya cakulya camasyikati alimwi akukkala abusena bwamuswaangano wacooko muciindi cakwiinka kuyoolida kubusena nkobasambalila zyakulya naa kuunka kuŋanda kuyoojika. Amubone masimpe kuti taakwe nomwaindwa coolwe eeci cakukulwaizyanya.—Rom. 1:11, 12.

7. Ino nkulibambila kuli buti nkotweelede kucita kujatikizya zisani nzyotuyoosama?

⁷ Kusama: Cilisalede kuti Jehova wakalailila bana Israyeli kuti babambe mayaayila muzyooko zyazikobela zyabo akwaanzya mayaayila intambo yacijulu-julu. (My. 15:37-41) Eeci cakali ciyeezyo ciboneka cakuti bakali bakombi ba Jehova baandaanizyidwe. Mazuba aano, zisani zyabulemu nzyotusama ciindi notuli kumuswaangano wacooko, zilatwaandaanya kubantu bamunyika. Kupa bumboni bubotu kubantu batulangilila nociba ciindi notuli muzintoolo musambalilwa zyakulya amana mapulogilamu. Aboobo, amukkale aansi kutegwa mubone zisani nzyomuyoosama.

8. Ino mbuti mbotukonzya kukambauka ciindi notuli mucilawo mucitilwa muswaangano wacooko?

⁸ Amupe Bumboni: Ikuti twalibambila, inga twacikonzya kupa bumboni kubantu ciindi notuli mucilawo mucitilwa muswaangano wacooko. Umwi mukwesu wakaunka kucintoolo nkobasambala zyakulya antoomwe amukaintu wakwe naakamana mapulogilamu, wakaile kutondeka bbaaji lyakumuswaangano ndyaakasamide akubuzya mwaalumi iwakali kwaabila zyakulya kuti: “Sena kuli bantu banji mbomwabona basamide mabbaaji aamusyobo ooyu?” Mwaalumi ooyu wakaingula kuti wakababona pele tanaakazyi kaambo bantu banji ncobakasamide mabbaaji aaya. Eeci cakapa kuti bazumanane kubandika, eelyo mukwesu ooyu wakatamba mwaalumi ooyo wakali kwaabila zyakulya kuti azoojanike kumuswaangano wacooko.

9. Ino mbuti mbotukonzya kutondezya kulumba kuli yooyo Wakatutamba, Jehova?

⁹ Nokuba kuti mbakwesu bayookanana makani oonse, kubuzya-buzya alimwi akucita zitondezyo, Taateesu wakujulu Jehova Ngomwaabi siluyando wapobwe lyakumuuya eeli licitwa amwaka. (Is. 65:13, 14) Tulatondezya kulumba kuli yooyo Wakatutamba kwiinda mukujanika mazuba oonse alimwi akuzumanana kulya cakulya cakumuuya cili coonse caabilwa. Sena mwamanizya kale kulibambila kutegwa mukacite oobo?

[Kabbokesi kali apeeji 5]

Ziyeezyo zya Muswaangano Wacooko

◼ Ciindi Camapulogilamu: Mazuba oonse otatwe imapulogilamu anootalika aciindi ca 8:20. (Ku Maanda Aakucitila Miswaangano Mipati, milyango iyoojulwa aciindi ca 7:00.) Ciindi nyimbo zya Bwami zyaakutalika kulila, toonse tweelede kuti tukakkale mumasena eesu kutegwa mapulogilamu akatalike cabulemu. Mu Buzuba Bwakusaanguna mapulogilamu ayoomana aciindi ca 15:55, mu Buzuba Bwabili aciindi ca 16:05, eelyo mu Buzuba Bwatatu ayoomana aciindi ca 15:30.

◼ Kwakusiya Myootokala: Mumasena aamuswaangano wacooko oonse, kuyooba busena bwakusiya myootokala kakunyina kubbadelesyegwa. Mabbaaji aamuswaangano wacooko ngaayoobelesyegwa kuba cizibyo cakusiya myootokala.

◼ Majwi Aakucenjezya: Kufwumbwa naa mpaali mpomwasiya mootokala naa ncinga yenu, amubone kuti zyintu eezyi zilikkiidwe ciindi coonse, alimwi mutasiyi cintu cili coonse kuti kacilibonya. Zyintu zyenu zyoonse amuzisise akuzikkiila. Alimwi amubikkile maano kuli bakabwalala balo bayandisya kujanika aabungana bantu banji. Eeci cibikkilizya kutasiya cintu cili coonse cidula kakunyina uuliko azyuuno nzyomukkede kumuswaangano wacooko. Kulatambulwa twaambo tujatikizya bantu bamwi basoleka kucenga akubba bana kuzwa abusena bwamuswaangano wacooko. Mwalombwa kuti mupakamane.

◼ Kubamba Aakukkala: Busena bwakukkala inga bwabambilwa buyo baabo mbomwaboola limwi mumootokala naa bamumukwasyi mbomukkala limwi.

◼ Cakulya Camasyikati: Mwalombwa kuti mukaletelezye cakulya camasyikati muciindi cakuti mukazwe abusena bwamuswaangano kuya kukuula cakulya iciindi cakulyookezya. Inga mwabelesya mutaanga kunyamwida cakulya uukonzya kubikkwa munsi aacuuno cenu. Mitaanga mipati, mabbodela alimwi abukoko tazizumizyidwe abusena bwamuswaangano.

◼ Zyakusanga: Tulakonzya kutondezya kuti tulalumba kwiinda mukusanga cakuliyandila kumulimo wanyika yoonse ku Ŋanda ya Bwami yesu naa kumuswaangano. Macceki oonse aasangwa kumuswaangano ayelede kulembwa kuti: “Watch Tower Society.”

◼ Ntenda: Ikuti kwacitika ntenda abusena bwamuswaangano iiyandika busilisi, amubone sikugwasyilizya uuli afwaafwi walo uyoozyibya bacibeela ca Lugwasyo Lutaanzi kutegwa ibakwesu beelela kupa lugwasyo lutaanzi amuswaangano bakabone ntenda eeyo akupa lugwasyo.

◼ Kulekkooda: Mincini yakulekkoodya iili yoonse tayeelede kubikkwa kumincini yamajwi naa kumagesi aabelesyegwa alimwi tayeelede kunyonganya bamwi ciindi niibelesyegwa.

◼ Mafwuta Aanunkilila Kapati: Tulakonzya kubeetelela bantu kwiinda mukutabelesya mafwuta aanunkilila kapati naa mapefyuumu aakonzya kunyonganya baabo baciswa bulwazi bwakufwundilila naa malwazi amwi aakozyanya ayaaya.—1 Kor. 10:24.

◼ Mafoomu aa Amuzumanane a Muntu Ooyu: Foomu ya Amuzumanane a Muntu Ooyu (S-43) yeelede kubelesyegwa kupa twaambo tujatikizya muntu uuli oonse uutondezya luyandisisyo akaambo kabukambausi bwamukwiizya mbotwacita ciindi camuswaangano wacooko. Basikumwaya beelede kuletelezya foomu ya Amuzumanane a Muntu Ooyu yomwe naa obile kumuswaangano wacooko. Mafoomu amanizyigwa kulembwa, ayelede kupegwa ku Cibeela Cilanganya Mabbuku naa kuyoopa mulembi wambungano yenu mwaakujokela.—Amubone Mulimo Wesu wa Bwami wa February 2005, p. 7.

◼ Cisobano: Kunyina muntu uuzumizyidwe kweendeenda acibumbili naa mumbali lyacibumbili kuti afwotole bantu ciindi cacisobano, alimwi kunyina uuzumizyidwe kunyonganya bamwi ciindi cacisobano. Mwalombwa kuti mubafwide luse bakwesu kwiinda mukutabasinkila. Bana beelede kukkala antoomwe abazyali babo. Basikugwasyilizya balizumizyidwe kwaandanya bana bakkede antoomwe akubatola kubazyali babo naa aanze aabusena buswaanganinwa kutegwa batanyonganyi bamwi.

◼ Lubbapatizyo: Ku Maanda Aakucitila Miswaangano Mipati ikuli zizyiba zyakubbapatizyilwa, baswiilizi beelede kutobela malailile aakuti kabakkede ciindi calubbapatizyo. Kumasena ooko lubbapatizyo nkolucitikila kubusena bumbi mbuli kumulonga, kucizyiba naa kalonga, bana tabeelede kuzuza kumbele lyabasikubbapatizyigwa, muciindi caboobo beelede kweendela musyule lyabasikugwasyilizya. Cilibonya kuti kwamyaka minji bantu bapati ibajanika ciindi calubbapatizyo mbasyoonto kapati. Nobaba bazyali babana babbapatizyigwa tabaunki kuyoolibonena lubbapatizyo lwabana babo. Bazyali alimwi abantu bapati bamwi bakulwaizyigwa kujanika kulubbapatizyo kutegwa bagwasilizye mukupa kuti aciindi eeci kakuba bulemu kapati.

◼ Kusowa Tombe: Tuyanda kuti busena bwesu bwamuswaangano wacooko kabusalala akusumbula lyoonse. Ikuti katubikkila maano alimwi akubwezelela cakulya cesu casyaala, mapepa alimwi azyintu zimwi akuzisowela kubusena busowelwa tombe amuswaangano wacooko, eeci citondezya mbotulyaabide kuli Leza. Ciindi camuswaangano wacooko uuboola, toonse atukasoleke kusalazya busena bwesu bwakukombela alimwi akulilemeka kutegwa tulemeke “muziyanza zyoonse lwiisyo lwa-Leza Mufutuli wesu.”—Tit. 2:10.

◼ Zimbuzi: Bana basyoonto beelede kusindikilwa abazyali lyoonse naa muntu umwi mupati ciindi nobaunka kucimbuzi naa kukusamba kumaanza bazwa mucimbuzi. Kumiswaangano, ziindi zimwi bana tabakkalikani kwainda woola lyomwe naa kwiinda waawo. Kutegwa bajane kaambo kabapa kweendeenda, bunji bwaziindi bana balaba acilengwa cakwiinka-inka kucimbuzi ziindi zinji ciindi camapulogilamu, calo cipa kuti bamwi banyonganizyigwe. Ikuti bazyali baambila mwana aumwi kuti aunkile limwi kucimbuzi mapulogilamu kaatanatalika, inga tiikwayandika kuti batalike kunyonganya lyamiswaangano ciindi cisyoonto buyo bazwa kucimbuzi. Alimwi kusindikila bana nobaunka kucimbuzi alimwi akukusamba kumaanza bamana kubelesya cimbuzi kupa kuti bana besu basyoonto bakwabililwe.