Mazuba Otatwe Aakukatalusyigwa Kumuuya
1. Ncinzi ncotulangila kuyootambula kumuswaangano wacooko wamwaka uno?
1 Munyika ya Saatani eeyi iili mbuli cimpayuma kumuuya, Jehova ulazumanana kukatalusya babelesi bakwe. (Is. 58:11) Muswaangano wacooko uucitwa mwaka amwaka ninzila yomwe Jehova njabelesya kutukatalusya kumuuya. Muswaangano wacooko wamwaka uno mbuuyaabuswena, mbuti mbotukonzya kulibambila kutegwa tukakatalusyigwe kumuuya?—Tus. 21:5.
2. Ino nzyintu nzi nzyomweelede kulibambila?
2 Kutegwa mukajanike kumuswaangano mazuba oonse otatwe, ecino nceciindi cakulibambila akulomba ciindi cakulyookezya kumulimo kuti naa tamunacita oobo. Sena mulicizyi ciindi ncomunootola kuya kubusena kucitilwa muswaangano buzuba bumwi abumwi kutegwa kamusika mapulogilamu kaatanatalika akuyandaula aakukkala? Masimpe ngakuti tatuyandi kuyooyindwa nociba comwe cakulya cakumuuya cikatalusya Jehova ncaatubambila! (Is. 65:13, 14) Sena mwakalibambila kale nkomuya koona alimwi ambomuyooenda?
3. Ninzila nzi zikonzya kupa kuti swebo amukwasyi wesu tugwasyigwe amapulogilamu aamuswaangano?
3 Ncinzi ciyoomugwasya kubikkila maano ciindi camapulogilamu? Mazuba aamuswaangano, ikuti kacikonzyeka, mweelede kufwambaana koona. Mweelede kumulanga mwaambi naambaula. Amumutobelezye mu Bbaibbele lyanu mwaambi nabala magwalo. Amulembe twaambo mubufwaafwi. Banamukwasyi beelede kukkala antoomwe kutegwa bazyali kababagwasya bana babo kubikkila maano. (Tus. 29:15) Ambweni inga mwabandika abanamukwasyi twaambo tupati-pati twapulogilamu kumangolezya buzuba bumwi abumwi. Kutegwa bamumukwasyi wanu bakazumanane kukatalusyigwa wainda muswaangano, ciindi ca Kukomba Mumukwasyi mulakonzya kubandika twaambo ntomwakaiya ntobakonzya kubelesya banamukwasyi.
4. Mbuti mbotukonzya kugwasya bamwi mumbungano yesu kukatalusyigwa kumuuya?
4 Amugwasye Bambi Kukatalusyigwa: Tuyanda kuti bambi abalo bakatalukwe kumuuya. Sena kuli basikumwaya bacembeede naa bamwi mumbungano bayandika lugwasyo kutegwa bakajanike kumuswaangano? Sena mulakonzya kubagwasya? (1 Jo. 3:17, 18) Baalu, kwaambisya balangizi batubunga, beelede kubona kuti basikumwaya bali boobu bagwasyigwa.
5. Mbuti mbotuyakwaabila tupepa twakutamba bantu kumuswaangano wacooko? (Alimwi amubone kabbokesi kali atala.)
5 Mbubwenya mbuli kaindi, mvwiki zyotatwe muswaangano kautanatalika, tuyootalika kutamba bantu kutegwa bakajanike. Mbungano zyeelede kuba amakanze akwaabila tupepa twakutamba bantu kumuswaangano wacooko kubantu banji bali mucilawo cabo. Tupepa ntobatiikasiye bamumukwasyi wanu ciindi cakutamba bantu kumuswaangano caakwiinda tweelede kuletwa kumuswaangano kutegwa mukatubelesye ciindi nomucita bukambausi bwamukwiizya. Makani aambi kujatikizya tupepa ootu ayoopegwa mubuzuba bwakusaanguna bwapulogilamu. Tupepa ntomutakabelesyi ooko kuyoocitilwa muswaangano mukatupe basikugwasyilizya nomunjila mubusena mucitilwa muswaangano. Amubambe kapepa komwe nkaambo kayooyandika ciindi nokuyoopegwa makani aamamanino mubuzuba bwatatu.
6. Muunzila nzi motukonzya kutondezya kuti tulalilemeka amuswaangano?
6 Kulilemeka Kabotu Kulakatalusya: Aciindi bantu banji ‘nobaliyanda’ alimwi nobatabikkili maano kuli mbobalimvwa bamwi, eelo kaka cilakatalusya kuba akati ka Banakristoma ibalilemeka kabotu! (2 Ti. 3:2) Tutondezya kuti tulalilemeka kabotu kwiinda mukunjila mubusena mucitilwa muswaangano caluumuno alimwi akubambila buyo busena aakukkala aabo mbotukkala limwi kuŋanda, mbotwaboola limwi mumootokala, naa mbotuyiisya Bbaibbele. Tulatobela malailile asicuuno natwaambila kuti tukkale ansi kutegwa tuswiilile nyimbo zilila cibeela cimwi acimwi nociyanda kutalika. Ciindi camapulogilamu kutegwa tutabanyonganyi bamwi tweelede kuzima maselofooni naa tuncini tutuzyibya kuti kuli uutuyanda. Alimwi tulatondezya kuti tulabikkila maano kwiinda mukutabandika, kulemba tugwalo twaafooni, kulya, naa kweendeenda ciindi camapulogilamu.
7. Mbuti mbotukonzya kukatalusyanya notuyanzana abakwesu?
7 Kuyanzana Kukatalusya: Miswaangano itupa coolwe cakukatalukwa notuyanzana a Banakristo bakamantene. (Int. 133:1-3) “Amujalule myoyo yanu” kwiinda mukuyanzana abakwesu alimwi abacizyi bazwa kumbungano zimbi. (2 Ko. 6:13) Mulakonzya kubikka mbaakani yakuzyibana amuntu mupya omwe naa mukwasyi mupya omwe buzuba bumwi abumwi. Ciindi cakulyookezya masyikati cilapa coolwe cakucita oobu. Aboobo kamuletelezya cakulya camasyikati akulida antoomwe akuyanzana abamwi bali abusena buswaanganinwa muciindi cakuzwa kuyooula cakulya. Eeci cilakonzya kumugwasya kuba abalongwe bapya.
8. Nkaambo nzi ncotweelede kulisungula kubeleka amuswaangano, alimwi mbuti mbotukonzya kucita oobo?
8 Eelo kaka cilakatalusya kubeleka antoomwe abakombima mumulimo uusetekene! Sena tamukonzyi kulisungula kugwasya mudipatimenti imwi naa kugwasya mbungano yanu mumulimo ngoyapegwa kubeleka? (Int. 110:3) Ikuti naa tamunapegwa mulimo, amubone bali mu Dipatimenti Yamulimo Wakuliyandila amuswaangano. Kubelekela aamwi kulakkomanisya alimwi kulauubya-ubya mulimo.
9. Nkaambo nzi ncotweelede kubikkila maano mbotulilemeka ambotuboneka ciindi camuswaangano?
9 Kulilemeka Kabotu Kulakatalusya Kuli Batulangilila: Tuli basimuswaangano kwamazuba oonse otatwe amuswaangano, kutali buyo ciindi camapulogilamu. Aabo batulangilila notuli mudolopo naa kubusena nkotucitila muswaangano beelede kubona kwiindana kuliko akati kesu alimwi abatali Bakamboni. (1 Pe. 2:12) Nsamino yesu akulibamba kwesu kumuswaangano, nkotoona, alimwi akumasena aakulida zyeelede kumulemeka Jehova. (1 Ti. 2:9, 10) Twasama mabbaaji eesu, basikulangilila bayoozyiba kuti tuli Bakamboni ba Jehova. Eeci ciyootupa coolwe cakubaambila kujatikizya muswaangano wesu alimwi akubakambaukila.
10. Ino nzyakuluula nzi zitondezya kuti ikulilemeka kwesu kwa Bunakristo kupa bumboni bubotu?
10 Ino kulilemeka kwesu ciindi camuswaangano kubajatikizya buti bamwi? Kweelana acakalembwa mumuteende umwi, mupati wamulimo acilawo mpobakacitila muswaangano wakaamba kuti: “Bantu aaba balaabulemu. Tulakkomana kuba ambabo mwaka amwaka.” Mwaka wamana, muntu umwi uutali Kamboni wakasweekelwa cikwama camali kuhotela kwakali koona basimuswaangano. Mupati wahotela nibakamupa cikwama camali azyintu zyoonse kazikkwene, mupati wahotela wakaambila mukamwini cikwama kuti: “Cabota kuti Bakamboni ba Jehova bajisi muswaangano alimwi muhotela muzwide mbabo. Buyo-buyo cikwama cako nicatajanika.”
11. Ino ndugwasyo nzi ndobakonzya kupa ba Dipatimenti Yalugwasyo Lutaanzi, alimwi ncinzi ncobeelede kuzyibila limwi basimuswaangano?
11 Lugwasyo Lutaanzi: Dipatimenti Yalugwasyo Lutaanzi igwasya buyo muntenda zyacibukilambuta. Tacili cibbadela naa busena nkotukonzya kubweza misamu. Mwalombwa kuletelezya misamu njomubelesya lyoonse, misamu yamwida, mabbandeji, mapini, alimwi azimwi zili boobu, nkaambo zyintu eezyi tazinooliko kumuswaangano. Aabo baciswa bulwazi bwakusuntuka, bwasyuga, bwamoyo naa malwazi aambi, beelede kuletelezya misamu njobabelesya. Beelede kuti kabali amuntu umwi wamumukwasyi naa wamumbungano yabo uubuzyi kabotu bulwazi bwabo alimwi uukonzya kuzyiba cakucita ikuti naa kwabuka penzi. Kulaba mapenzi amuswaangano ikuti bantu baciswa-ciswa basyaala balikke mpoonya baciswa. Naa kuli bamwi ibaciswa bulwazi bukatazya pele tabajisi bamukwasyi bakonzya kubalanganya, ibaalu beelede kwaambilwa kutegwa babikke bubambe bwakuti bagwasyigwe. Tacikonzyeki amiswaangano kubajanina maanda aalubazu nkobakonzya koona aabo baciswa.
12. Muswaangano mbuuyaabuswena, ncinzi ncotweelede kukanza kucita, alimwi nkaambo nzi?
12 Miswaangano yamwaka uno yaswena afwaafwi. Kwabelesyegwa ciindi cinji anguzu mukubamba mapulogilamu amuswaangano wacooko aakatalusya. Amukasolekesye kuti mukajanike mazuba oonse otatwe, alimwi amulibambile kuyoolya cakulya Jehova ambunga yakwe ncobamubambila. Amukakatalusye bamwi kwiinda mukubabikkila maano, kuyanzana ambabo calukkomano, alimwi akulilemeka kabotu. Mpoonya nywebo alimwi abambi muyoolimvwa mbwaakalimvwa umwi wakajanika kumuswaangano mwaka wamana wakalemba kuti, “Kunyina cimbi ncindiyeeya cakandikkomanisya mbuli muswaangano ooyu!”
[Majwi aakwelelezya sikubala aali apeeji 3]
Mbubwenya mbuli kaindi, mvwiki zyotatwe muswaangano kautanatalika, tuyootalika kutamba bantu kutegwa bakajanike
[Majwi aakwelelezya sikubala aali apeeji 5]
Nsamino yesu akulibamba kwesu kumuswaangano, nkotoona, alimwi akumasena aakulida zyeelede kumulemeka Jehova
[Majwi aakwelelezya sikubala aali apeeji 6]
Amukakatalusye bamwi kwiinda mukubabikkila maano, kuyanzana ambabo calukkomano, alimwi akulilemeka kabotu
[Kabbokesi kali apeeji 3-6]
Malailile a Muswaangano Wacooko wa 2011
◼ Ciindi Camapulogilamu: Mazuba oonse otatwe mapulogilamu anootalika aciindi ca 08:20. Ku Maanda Aakucitila Miswaangano Mipati, milyango inoojalulwa aciindi ca 07:00. Ciindi nyimbo zya Bwami zyatalika kulila, toonse tweelede kukkala mumasena eesu kutegwa mapulogilamu kaatalika cabulemu. Mubuzuba bwakusaanguna mapulogilamu ayoomana aciindi ca 15:55, mubuzuba bwabili aciindi ca 16:15, alimwi mubuzuba bwatatu aciindi ca 15:10.
◼ Kwakusiya Myootokala: Mbokunga ku Maanda Aakucitila Miswaangano Mipati busena mbusyoonto kwakusiya myootokala, kuti kacikonzyeka aabo bajisi myootokala beelede kumvwana kutegwa kabeenda antoomwe.
◼ Kubamba Aakukkala: Busena bwakukkala inga bwabambilwa buyo aabo mbomwaboola limwi mumootokala naa banamukwasyi mbomukkala limwi, abaabo mbomuyiisya Bbaibbele.—1 Ko. 13:5.
◼ Cakulya Camasyikati: Mwalombwa kuti mukaletelezye cakulya camasyikati muciindi cakuti mukazwe abusena bwamuswaangano kuyakuula cakulya aciindi cakulyookezya. Inga mwabelesya mitaanga iitali mipati kapati kunyamwida cakulya. Zyakunyamwida cakulya zikonzya kupwaika tazizumizyidwe amuswaangano wacooko.
◼ Kusanga: Tulakonzya kugwasyilizya bubambe bwamuswaangano wacooko kwiinda mukusanga cakuliyandila kumulimo wanyika yoonse kumuswaangano wacooko. Macceki oonse aasangwa ayelede kulembwa kuti: “Watch Tower Society.”
◼ Ntenda: Ikuti kwacitika ntenda abusena bwamuswaangano wacooko iiyandika busilisi, amubone sikugwasyilizya uuli afwaafwi, walo uyoozyibya dipatimenti Yalugwasyo Lutaanzi kutegwa bakwesu beelela ibali mudipatimenti eeyi bakailange ntenda eeyo yacitika akupa lugwasyo.
◼ Busilisi: Ikuti naa kuli musamu ngomunywa ngobakamulembela kucibbadela, mweelede kuuletelezya, mbwaanga tabakamupi kumuswaangano wacooko.
◼ Mafwuta Aanunkilila Kapati: Atutondezye luyando kuli bamwi kwiinda mukutabelesya mafwuta aanunkilila kapati naa mapefyuumu aakonzya kunyonganya baabo baciswa bulwazi bwakufwundilila naa malwazi amwi.—1 Ko. 10:24.
◼ Mafoomu aa Amuzumanane a Muntu Ooyu (S-43): Foomu ya Amuzumanane a Muntu Ooyu yeelede kubelesyegwa kupa twaambo tujatikizya muntu iwatondezya luyandisisyo akaambo kabukambausi bwamukwiizya mbotwacita ciindi camuswaangano. Basikumwaya beelede kuletelezya foomu yomwe naa obilo kumuswaangano wacooko. Mafoomu ngomwalemba ayelede kutolwa kudipatimenti Iilanganya Mabbuku naa kumulembi wambungano yanu mwaakupiluka.—Amubone Mulimo Wesu wa Bwami wa November 2009 peeji. 4.
◼ Lubbapatizyo: Ku Maanda Aakucitila Miswaangano Mipati ikuli zizyiba zyakubbapatizyilwa, baswiilizi beelede kwaatobela malailile aakuti kabakkede ciindi calubbapatizyo. Kumasena ooko lubbapatizyo nkolucitilwa kubusena bumbi mbuli kumulonga naa kucizyiba, bana tabeelede kulunduka kumbele kwabasikubbapatizyigwa, muciindi caboobo beelede kwendela musyule lyabasikugwasyilizya. Cilibonya kuti kwamyaka minji mbasyoonto bantu bapati ibalikujanika kulubbapatizyo. Nobaba bazyali bajisi bana baunka kukubbapatizyigwa tabaunki kuya kulibonena lubbapatizyo lwabana babo. Bazyali alimwi abantu bapati bamwi bakulwaizyigwa kunoojanika kulubbapatizyo kutegwa kababulemeka bubambe oobu.
◼ Cisobano: Kunyina muntu uuzumizyidwe kweendeenda acibumbili naa mumbali lyacibumbili ciindi cisobano nocicitwa kuti afwotole, nikuba kunyonganya beebelela cisobano. Mwalombwa kuti mutanoobasinkili bakwesu. Bana beelede kukkala antoomwe abazyali babo. Basikugwasyilizya balizumizyidwe kwaandanya bana bakkede kabunga balikke akubatola kubazyali babo naa anze aabusena buswaanganinwa kutegwa batanyonganyi bamwi.
◼ Kusowa Tombe: Amubambe busena bwamuswaangano wacooko kutegwa kabusalala akusumbula. Kuti katuyobolola cakulya cesu casyaala, akubwezelela mapepa alimwi amafwuse ambi akwaasowela kubusena busowelwa tombe, eeci cilakonzya kupa kuti bantu bamulemeke Leza. Kumuswaangano wacooko uuboola, toonse atukasoleke kusalazya busena bwesu bwakukombela alimwi akucita kabotu zyintu “kutegwa munzila zyoonse bape bamwi kutembaula kuyiisya kwa Mufwutuli wesu, Leza.”—Tit. 2:10.
◼ Zimbuzi: Bana basyoonto lyoonse nobaunka kucimbuzi alimwi akukusamba beelede kusindikilwa abazyali naa amuntu umwi mupati. Kumiswaangano, zimwi ziindi kwainda woola lyomwe naa kwiinda waawo bana balakakilwa kukkalikila. Kutegwa bajane nzila yakuyoosobana, bunji bwaziindi bana balaba acilengwa cakuunka-unka kucimbuzi ciindi camapulogilamu, calo cipa kuti bamwi banyonganizyigwe. Ikuti bazyali babaambila bana babo boonse kuti baunkilelimwi kucimbuzi mapulogilamu kaatanatalika, inga tabakonzyi kukatazya kwainda ciindi cisyoonto buyo kuzwa nootalika muswaangano. Alimwi ndukwabililo kubana besu basyoonto ciindi notubasindikila kucimbuzi alimwi akukusamba.
◼ Mulimo Wakuliyandila: Tulakonzya kukkomana kapati kuti naa twalyaaba kucita mulimo wakuliyandila amuswaagano wacooko. (Mil. 20:35) Aabo bayanda kucita boobo beelede kulilembya ku Dipatimenti Yamulimo Wakuliyandila amuswaangano wacooko. Bana bajisi myaka yakuzyalwa iilela ku 16 abalo balakonzya kubeleka kabeendelezyegwa amuzyali naa uubalela naba muntu umbi mupati uuzumizyidwe amuzyali.
[Kabbokesi kali apeeji 4]
Ino Tuyakwaabila Buti Tupepa?
Kutegwa tukabape boonse bali mucilawo cesu, tweelede kwaamba mubufwaafwi. Tulakonzya kwaamba boobu: “Kamwaamba? Tutola lubazu mumulimo uucitwa nyika yoonse wakutamba bantu. Amubweze kapepa aaka. Makani manji mulaajana mukapepa aaka.” Kapepa kakutamba bantu kumuswaangano kakabambwa munzila iikonzya kubakkomanisya bantu, aboobo amubape munzila iikonzya kubapa kuti bakabone mpokali aatala. Amusungwaale. Notwaabila tupepa kumamanino aamvwiki, tulakonzya kwaabila amamagazini ikuti kacikonzyeka.