Miswaangano Yesu Yacooko—Bumboni Bupati bwa Kasimpe
1. Ino bana Israyeli mapobwe akali kubapa coolwe cakuzinzibala kuyeeya nzi, alimwi akubandika twaambo nzi tuyandika tujatikizya kasimpe kakumuuya?
1 Bana Israyeli bansiku bakali kuswaangana ziindi zyotatwe mumwaka kutegwa basekelele mapobwe. Nokuba kuti bamaalumi balikke mbabakeelede kujanika, ziindi zinji mikwasyi yoonse yakali kuunka ku Jerusalemu kuti bakasekelele miswaangano eeyi iikkomanisya. (Dt. 16:15, 16) Miswaangano eeyi yakali kubapa coolwe cakuzinzibala kuyeeya alimwi akubandika twaambo tuyandika tujatikizya kasimpe kakumuuya. Ino ntwaambo nzi tumwi twakasimpe? Komwe nkakuti Jehova ngu Sikupa siluyando. (Dt. 15:4, 5) Kamwi nkakuti tulisinizyide kuti ulakonzya kutusolweda akutukwabilila. (Dt. 32:9, 10) Bana Israyeli bakali kukonzya kuyeeya kuti, mbobali bantu baitwa azyina lya Jehova, bakeelede kutondezya bululami bwakwe. (Dt. 7:6, 11) Mbubwenya buyo asunu, miswaangano yesu yacooko iicitwa mwaka amwaka ilatugwasya.
2. Ino muswaangano wacooko uyoomwesya buti mumuni wakasimpe?
2 Pulogilamu Imwesya Mumuni Wakasimpe: Kumiswaangano yesu yacooko, kulaba makani, zisobano, zitondezyo, alimwi akubuzya-buzya, zyoonse zimwesya kasimpe kayandika kamu Bbaibbele. (Joh. 17:17) Kwabelekwa kale milimo minji mukulibambila muswaangano uuboola. Mbunga ya Jehova ilimukubamba pulogilamu iijatikizya ziyandika lino munyika yoonse. (Mt. 24:45-47) Sena muliyandide kuyoobona akumvwa nzyomwabambilwa?
3. Ino tweelede kucita nzi kutegwa tubikkile maano ciindi camapulogilamu?
3 Ncobeni, tuyoogwasyigwa kapati kuti twajanika alimwi akubikkila maano kumapulogilamu mumazuba oonse otatwe. Amukalombe kuli basikumulemba mulimo kuti muyanda kuyoojanika kumuswaangano, ikuti naa tamunacita oobo. Mweelede kunoofwambaana koona kutegwa kamubikkila maano ciindi camapulogilamu. Banji cabagwasya kubikkila maano kwiinda mukumulanga mwaambi naambaula alimwi akulemba twaambo mubufwaafwi. Tamweelede kulekela fooni naa kancini kamuzyibya kuti kuli bamuyanda kuti kamunyonganye. Mutanoobandiki afooni, kulemba tugwalo twaafooni, naa kulya ciindi camapulogilamu.
4. Mbuti bazyali mbobakonzya kubagwasya bana babo kubikkila maano ciindi camapulogilamu?
4 Mumyaka yamasabata, ciindi mikwasyi yabana Israyeli boonse nobakali kubungana kuswiilila Mulawo ciindi ca Pobwe Lyazilawo, bakali kubungana antoomwe ‘abana’ babo “kuti baswiilile akwiiya.” (Dt. 31:12) Eelo kaka cilakkomanisya kubona banamukwasyi kabakkede antoomwe ciindi camuswaangano alimwi bana basyoonto kababikkila maano kupulogilamu! Kumangolezya, mweelede kwaalanga-langa makani ngomwali kulemba ciindi camiswaangano alimwi akwaabandika antoomwe amukwasyi. “Bufubafuba bulaangidwe mumoyo wamwana,” nkakaambo kaako bazyali ncobeelede kubalanganya kabotu bana babo, kubikkilizya abakubusi, kwaambisya ciindi cakulyookezya masyikati, muciindi ‘cakubalekelela’ buyo.”—Tus. 22:15; 29:15.
5. (a) Mbuti nsamino yesu mboikatembaula kasimpe? (b) Mbuti mbotukonzya kutembaula kasimpe kwiinda munsamino yesu notuli kumuswaangano?
5 Mbotulilemeka Kulatembaula Kasimpe: Mbotulilemeka notuli kumuswaangano kulakatembaula kasimpe. (Tit. 2:10) Bamwi balalangilila ciindi basimuswaangano nobatobela malailile alimwi akucita oobo cabusongo akulicesya. (Kol. 4:6) Mabbaaji ngotusama lyamuswaangano, taatondezyi buyo kuti kuli muswaangano naa kutuzyibya kubakwesu, pele apa bumboni kuli baabo batulangilila. Bantu balangilila nokuli muswaangano balabona kuti aabo basamide mabbaaji basamide kabotu alimwi cabulemu, ikwiindana ansamino iitapi bulemu iidumide munyika mazubaano. (1 Ti. 2:9, 10) Aboobo, tweelede kubikkila maano kunsamino yesu ciindi notuli kumuswaangano. Nokuba kuti muswaangano ucitilwa anze, nsamino yesu yeelede kuba yabulemu. Ikuti naa twayanda kucinca zisani wamana muswaangano, tweelede kuyeeya kuti tucili kumuswaangano alimwi tatweelede kuciindizya munsamino yesu.
6. Mbuti mbotukonzya kuba alukamantano lwa Bunakristo kumuswaangano?
6 Muzyiindi zyamapobwe, bana Israyeli bakali kukkomana kwiinda mukuyanzana abakombinyina bakali kuzwa mumasi aakabazingulukide alimwi eeci cakali kubapa kukamantana. (Mil. 2:1, 5) Ciindi camiswaangano yacooko nciindi bunyina bwanyika yoonse nobutondezyegwa kapati. Ibubambe oobu bubotu ibuli ncibeela caparadaiso yakumuuya kanji-kanji bulabakkomanisya bantu batulangilila. (Int. 133:1) Aboobo kamuletelezya cakulya camasyikati akulida antoomwe akuyanzana abamwi bali abusena buswaanganinwa muciindi cakuzwa kuyooula cakulya. Eeci cilakonzya kumugwasya kuyanzana abakwesu abacizyi mbomubambene limwi.
7. Ikuti naa bukkale bulazumizya, nkaambo nzi ncotweelede kulyaaba kugwasyilizya amuswaangano?
7 Bantu batulangilila kanji-kanji balakkomana ciindi nobabona mbuli miswaangano yesu mboyeendelezyegwa alimwi anobazyiba kuti milimo yoonse ilagwasyilizyigwa abasikulisungula. Sena mulilyaabide kugwasyilizya kubeleka? (Int. 110:3) Mikwasyi minji ilalyaaba kugwasyilizya kutegwa bayiisye bana babo kuba amuuya wakulyaaba. Kulyaaba kugwasyilizya amuswaangano nenzila mbotu yakuzyibana abasimuswaangano, ikuti naa mulaansoni. Nibakamana kubeleka kumuswaangano wamasi, mucizyi umwi wakati: “Bantu banji bakaliko tiindakabazyi, ndakazyi buyo bamukwasyi wangu abeenzuma basyoonto. Pele nitwakali kusalazya, ndakabazyiba bakwesu abacizyi banji. Cakali kukkomanisya kapati.” Kuyanzana abalongwe besu kwiinda mukugwasyilizya kubeleka amuswaangano kuletela lukkomano. (2 Ko. 6:12, 13) Ikuti naa tamunalyaabide kugwasyilizya amuswaangano, mweelede kubabuzya baalu kutegwa bamwaambile kuti naa muleelela.
8. Mbuti mbotuyootamba bantu kumuswaangano?
8 Amubatambe Bantu Kutegwa Bazoomvwe Kasimpe: Mbubwenya mbuli myaka yoonse, nsondo zyotatwe kautanacitika muswaangano, tuyootola lubazu mumulimo wakutamba bantu. Mukutamba bantu ooku, mbungano ziyookambaukila muzilawo zinji. Kuti naa kuli tupepa twakutamba bantu tuyoocaala, amukatuletelezye kumuswaangano. Tuyoobelesyegwa abasimuswaangano mubukambausi bwamukwiizya mucilawo muyoocitilwa muswaangano.
9. Amwaambe zyakuluula zitondezya kuti mulimo wesu wakutamba bantu kumuswaangano ulagwasya bantu banji.
9 Sena bantu balazumina kukutambwa ooku? Kumuswaangano umwi, sikugwasilizya umwi wakagwasya banabukwetene kujana aakukkala. Mpoonya bakamwaambila kuti bakatambula kapepa kakutamba bantu kumuswaangano alimwi bakaamba kuti “kakabakkomanisya kapati.” Bakeenda musinzo uulampa makilomita aali 320 kutegwa bajanike kumuswaangano! Alimwi mucizyi umwi naakali mumulimo wakuŋanda aŋanda, wakaabila kapepa kakutamba bantu kumuswaangano kumwaalumi umwi walo iwakatondezya kuti uyanda kuzyiba zinji kujatikizya muswaangano wacooko. Mpoonya mucizyi ooyu wakabandika kwaciindi cilimbocibede amwaalumi ooyo kujatikizya muswaangano. Nikwakainda buyo mazuba masyoonto ciindi kali kumuswaangano, mucizyi ooyu wakabona mwaalumi ooyo kabali antoomwe amweenzinyina kumuswaangano, alimwi bakalijisi amabbuku mapya aakagusyigwa amuswaangano ooyo.
10. Nkaambo nzi kujanika kumiswaangano yesu yacooko ncokuyandika kapati?
10 Mapobwe aakali kucitwa abana Israyeli cakali citondezyo caluyando kuzwa kuli Jehova cakubagwasya “kumumanina milimo cakululama acakusinizya.” (Jos. 24:14) Mbubwenya buyo, kujanika kumiswaangano yesu yacooko iicitwa mwaka amwaka ncibeela cabukombi bwesu ciyandika kapati alimwi cilatugwasya ‘kuzumanana kweenda mukasimpe.’ (3 Jo. 3) Tulijisi lusyomo lwakuti Jehova ulabalongezya bantu bayanda kasimpe, kuti bakajanike kumuswaangano alimwi akugwasyigwa.